1 Na rahida bei Yakupi tuti Leai une kamitungno Dinai da wa suambawa wiwing Kanani maneiru teai na katai nani. 2 Mananu na katai nani mani inontarai Hewi dine, wonong fino Hemori. Na kutu antungno Sikemi deti Dinai nanai, wewuria tuti dohong kanggani. 3 Yakupi ne kamitungno Dinai kia enerorong paria, ampefe ne mayanafo tau wei nina. Donio yurai we wewori Dinai enerorongfoi ambori Dinai ne mayanafo tau wei. 4 Nanai wedaya Sikemi medu we tamangno Hemori deyo, "Daie! Yeyo irau kadawingfoi, ampefe roa butang wei."

5 Na kutu Yakupi taraoai we Sikhemi dohong kanggani Dinai nanai, wiro niari fieai kaha, weo ne kaisung fosa enayai na katai wiarora weninoifoi ewaitawang wedua ne fiahungfosa, ampefe Yakupi nemboru tutu kaiwofo paria etaraberasa wo.

6 Mayeai Sikemi tamangno Hemori da we Yakupia we medu riati. 7 Da wa mani tete Yakupi ne kaisung fosa etaraberasa na katai wiarora weninoifoi ma, tuti etarami kaiwofo nanai enemirorong pirahai tuti ehasou paria. Weo Sikemi kawurua dohong mamaya Israeli ne munurorongfo, na dohong kanggani Yakupi ne kamitungfoi. Na fi toninane, todoni kontaio wiro mai we nari kaha.

8 Ainanaya Hemori medu we Yakupi tuti ne kaisungfosa deyo, "Nehu kaisungno Sikemi enerorong sau we nemu kamitungwai paria. Kadono metohongni wei ambori kiari we ne wiwing. 9 Tuti roma tutabuhi kaiwo arerai, weo nemu inontarai wiwingnesa erau nehu inontarai mangnesa, tuti nehu inontarai wiwingnesa erau nemu inontarai mangnesa. 10 Menayai na katai nini ria amea, katainei fiabai we mea, menayai na ninai tuti merao nu nini na mantaung mea. Tuti menayai na ninaifa."

11 Mayeai Sikemi medu we Dinai tamangna tuti ne tafuaisa deyo, "Kadono meroa we fianai aino yutang weai nina, mae metutang we fiani mani ambori yohongnai ki, 12 masino fiembaitai fianai aino menemioane mani meteisaharai, tuti meteisaha arata ne fiabaifo. Yau ambori yohongnai ki, wape metohong kamitungfoi ikari we nehu wiwing."

13 Sikemi kawurua dohong kanggani Dinai, ampefe Yakupi ne kaisungfosa etatofa Sikemi tuti tamangno Hemori suru. 14 Emadu we suru eteyo, "Amemamaya we amene tahatuinei dau mangno wesunati kahafoi. 15 Ameroa we fio butang weane, masino wau tuti inontarai mangwasa kiai todoni kontaio mewesunati kariri amea. 16 Arahio ameroa we ametohong amene kamitungnesa mehasa we mene wiwing, tuti ameha mene kamitungwasa we amene wiwing. Amea kiai amenayai ria mea tuti tane nu boyari. 17 Wape masino wiro meroa we fio ameteyoai, we mewesunati fo kaha mani, ameha nari amerorombingnei tuti amera weru katainei."

18 Ainanaya Hemori tuti antungno Sikemi uroa we kaiwo emadurafo. 19 Sikemi bariboaifoi mani etatori paria na Hemori ne munurorongfo, i meinenang we sikaherawa daraberahi tuti dohong kariri kaiwo emadurafo, weo ne mayana tau we Yakupi ne kamitungno Dinai paria.

20 Mayeai Hemori tuti antungno Sikemi ura to rahutu borong bendarifoi tuti umadu we inontaraifosa kiai na bendarifoi ureyo, 21 "Inontarai wanisa ete enayai ria tata na mai. Ampefe bento enayai na nu nini tuti eteyo enayai na doni mani na mantaungsa, weo katai nini fiabai we ea kontai. Ampefe taha ene kamitungfosa we tane wiwing tuti ea kontai eha tane kamitungnesa we ne wiwing. 22 Wape inontarai wanisa ete enayai ria tata tuti tane nu boyari, masino mang ne tata kiai todoni kontaio tawe sunati kariri ea. 23 Tuti masino tanari kariri fianai aino eteyoa fo mani, ene fiahungfosa tuti ene fianggengfoi kiai ambori we tata kontai ki. Ampefe merama taroa we kaiwo eteyoafo, ambori tanayai ruhiai." 24 Ampefe inontarai mano efanduhisa na rahutu borong bendarifoi eroa we kaiwo Hemori tuti antungno Sikemi umadurafo. Ampefe mang mano ebabafosa na bendarifoi ewesunati.

25 Na rahida bo botorufoi na ewesunati ampo, na kutuo mang mano ewesunati fosa enumiruainso epirahai. Yakupi ne kaisung mandu, amani Simeoni tuti Lewi, Dinai ne tafuai suruine. Uka une sondufo, na mamunggasai usuayai to bendarifoi afui, na wiro umatai kaha. Mayeai umung mang fosara ehai. 26 Umung Hemori tuti ne kaisungno Sikemi na sondu kontai, mayeai uka Dinai weru Sikemi ne munufoi.

27 Ainanaya Yakupi ne arikang mano wei fosa erama etawa inontarai mano emarareha fosa ene fianggengfo na bendarifoi. Ehasou tutu ene tahatui Dinai, weo Sikemi dohong kanggani fefe. 28 Etawa ene fiahung kambingfosa, dombafosa, sapifosa, keledaifosa tuti fi kiaio nayai na bendari rorongfo tuti na borieifo. 29 Etawa ene rafoi kiai, ene arikangfosa tuti ene wiwingfosa, eru aitamuosa. Kontai etawa fi kiaio watai na munu rorongfo na bendarifoi.

30 Mayeai Yakupi medu we Simeoni tuti Lewi deyo, "Munari wonohune karira ampa, ampefe nina mani inontarai Kanani tuti inontarai Ferisi tuti inontarai mano enayai na nu nini enemirireu yau. Wiro tafau kaha, masino efanduhisa we etapa tata mani, etahatawang tata, emung tata awao taworu." 31 Wape uroa wei ureyo, "Mawa we dohong kanggani amene tahatuinei toyari wiwing dirue?"