1 Na rahida bei, Yahwei Deinawi ne taraifoi we Abrahami kefang we ai tarbantini na Mamrei. Rahida nani maninggapoi paria, ampefe Abrahami minohi na ne yawa tendafoi rahutu borongfo. 2 Na kutu fioai ureng nanai, na tantuma deti inontarai mantoru itoroari na ne yawa tenda refongfo. Deti itoru tonana fo, sikera da we sitorua. Ainanaya disangkapa awebuka somi aweu ureng disangso kahofa wau,✝ 3 medu we itoru deyo, "Dai muntorune, masino muntomaya mani, wiro muntora fanai mae muntominohi ukai arafanai na ninai ria yau tuti ifata muntoru ki. 4 Ika mereha feai ma iruai muntoawemirengwa tuti muntominohi ukai na ai arowawahi ninai. 5 Mae imainenang fiang feai we muntorang, ambori muntone taraiwai wemambiriu aha, akawuru wori muntoreo muntora mani, ambori muntora ki. Weo dai muntora kawuru to nehu katai inayai nai nini ma fefe." Ainanaya itomadu wei itoreyo, "Yo, tonana mani nari kariri fianai aino modurai nanaia."

6 Ainanaya Abrahami sikera da to ne yawa tendafoi afui, medu we Sarai deyo, "Wukahera! Ka tepung beng sewa fo saki bei tuti wukahera nari roti we bulati feai!" 7 Ainanaya Abrahami sikera da we ne fiahung fosara, kia sapi antungno netarai biriayai, tuti angni mani miaing manei we ne mangfatafoia we kiutuwi ambori yangni ahera. 8 Mayeai Abrahami kia ui fiahung sisasa* feai, ui batang feai tuti sapi taraio masa feai, kiara dohongnai watai na itoaromifo we itorang. Na kutu itorampifo, Abrahami doa rurang itoru na ai arowawahi fo.

9 Ainanaya itomadu itoreyo, "Nemu wiwing Sarai andi doni?" Yoa we sitoru deyo, "Andi wani, niayai na yawa tenda rorongfe fo." 10 Manei na sitoru medu we Abrahami deyo, "Taramuma, Yau ambori yarabera yau we wau ma, na fuina bo da ahamafoi. Na rahida bonani nemu wiwingno Sarai ambori sobu kaisung manei ki." Na kutu nanai Sarai taradidau kaiwo itomadurafo, weo doari na yawa tenda rorongfo, na itokurumifo fefe.✝

11 Abrahami tuti Sarai uweinongkutungna tuti Sarai wiro deti fiwiwing ahang kaha. 12 Ampefe Sarai mirari tuti medu na enerorong deyo, "Todoni wori ausobu arikang manei we dohong faraise auru? Weo yau tuti nehu mangnei auweinongkutung ampa."✝

13 Ainanaya Yahwei medu we Abrahami deyo, "We fiani Sarai mirari tuti medu deyo, ‘Taraie nehu arikang raie? Iwewiwingkutung na mae.’ 14 Fianai aino dadira we Yahwei niari ne? Kariri fio antanafa imadurai kawurua nanai, amani fuina bo da ahamafoi, ambori Yarabera yau we wau ahama ki. Na rahida bonani Sarai ambori ne kaisung manei ki."✝ 15 Wape Sarai fefora deyo, "Wiro imiri kaha." Weo mitai fefe. Wape Yahwei medu deyo, "Bereri, antanafa muri!"

16 Ainanaya inontarai mantorufo itora wa tuti Abrahami datuti sitorua. Itora wa sobu katai bei, na katai nani itowati we bendari Sodomia. 17 Yahwei medu na enerorong deyo, "Fianai aino Yeyo Inari ninai, Yediwarai weru Abrahamia ne? 18 Weo Abrahami nini dino ne ririafoi ambori we kaiwasa fiabai tuti ewemambiriu, tuti na i ambori kaiwasa na nunei sentenang esobu moangfo. 19 Andino Yau yiriri we deunau ne arikangfosa tuti ne ririafosa kiai. Ambori enari kariri fianai aino Yeinawiai wesafo, na enari ne bengfo tuti etoa rahangnai. Donio Nehu kaiwo arerai Yohongnai we Abrahamifo ambori Yohong kaririai."

20 Mayeai Yahwei medu we Abrahami deyo, "Itarahuo kaiwo atua bitoya paria kariri inontarai Sodomi tuti Gomorai we ene karira enari fo, tuti tarai enari sasari bitoya paria. 21 Ampefe Ibiari aweu Iwati kariri fianai aino inontaraine emadurai pampang kariri inontarai na bendarifo nanai ambori Yeitawanaifa, wetarai tonana ete bereri e?"

22 Ainanaya inontarai mandu weifo suru ura to Sodomia, mae Abrahamifo doari ria Yahwei. 23 Abrahami doa kefangni tuti medu wei deyo, "Ampefe Boyo mungno inontaraio enari ne bengfosa ria inontarai mano enari karira fosara ne? 24 Masino Wobu inontarai ewe piarua sura (50) na bendari nani enari ne bengfo, nana mani Wau mei bendari nania wiorua ne? Tuti wiro Tawing bendari nani kaha e, weo inontarai ewe piarua sura (50) enari ne bengfo enayai na bendari nani? 25 Kadono Nari tonana fanai, wiro Mung inontarai mano enari ne bengfosa ria inontarai mano enari karira fosa fanai. Weo manta Wauno kutu kaiwo na Boarahanai we inontarainei kiai na nu fine."

26 Yahwei yoa deyo, "Masino Isobu ewe piarua sura (50) enari ne bengfo na bendari Sodomi tonana mani, Yau wiro Imei bendari nania wioru kaha, weo inontarai ewe piarua sura (50) nanisa."

27 Abrahami medu aha deyo, "Boyai yau, weo iwemambiriu we imadu ria Sengne Wau, we yau mani manta kangganang di yau. 28 Masino Wobu inontarai ewe piarua ring (45) enari ne bengfo, na tonanafo Mei bendarifoia wiorua ne?"

Yahwei yoa wei deyo, "Bereri, Yau wiro Imei bendari nania wioru kaha, masino Isobu inontarai ewe piarua ring (45) enari ne bengfo enayai na bendari nani."

29 Abrahami medu aha deyo, "Tofino masino Wobu inontarai ewe piaru (40) terai na wanaifa, nana mani todonie?" Yahwei yoa wei deyo, "Yau wiro Inari tonana kaha, weo inontarai ewe piaru (40) enayai na bendari nani."

30 Mayeai Abrahami medu aha deyo, "Seng, wiro Kosou fanai we imadu aha ninaifa ne. Masino Wobu inontarai ewe piareia sura (30) terai, nana mani tofino?"

Yahwei medu wei deyo, "Masino Isobu inontarai ewe piareia sura (30) teraifa mani, wiro Imei bendari nania wioru kahaifa."

31 Abrahami medu aha deyo, "Boyai nehu sarawaio iwemambiriu we yutangnai pampang aha ninai. Seng, masino Wobu inontarai ewe piarei (20) teraifa mani tofino?"

Seng yoa wei deyo, "Yau wiro Imei bendarifoia wioru kahaifa, masino Isobu inontarai ewe piarei (20) enayai na bendari nani."

32 Ainanaya Abrahami medu aha deyo, "Seng, wiro Kosou yau fanai, yutang berahai webeyari ninai terai aha. Masino Wobu inontarai ewesura (10) terai na bendarifoi, nana mani tofino?"

Seng yoa wei deyo, "Masino na bendarifoi Isobu inontarai ewe sura (10) terai mani, wiro Imei bendarifoia wioru kaha."

33 Yahwei medua kai tonanai ria Abrahami nanai Da wa, tuti Abrahami kontai daraberahi to ne yawa tendafoi aha.