1 We rahida beiru teaia mani, Yusupi sobu kaiwo we tamang meninang. Ainanaya Yusupi kia ne kaisung mandufo suru, Manasyei tuti Efraimi itorawa itotuambawa Yakupi. 2 Na kutu Yakupi taraoai we Yusupi da ma fo, ampefe Israeli yurai we doari ayai minohi na fatao dena naifoi.

3 Mayeai Yakupi medu we Yusupi deyo, "Allai Mano Wemambiriu Sewafoi kawurua Deinawi netarai we yau na Lusi na kahofa Kanani foi tuti mioang yau.✝ 4 Tuti medu we yau deyo, ‘Yauno inari wau bawing separai, tuti Yau ambori inari nemu ririanei we kaiwasa bitoya. Yau ambori yohong nu nini we nemu ririanei we eneni we fitawafa.’ " 5 Yakupi medu we Yusupi aha deyo, "Nemu kaisung mandu utaubau unumi na kahofa Mesiri ne, na wiro ira to ninaima kaharai, amani Manasyei tuti Efraimi isahu suru we nehu kaisung toyario Rubeni tuti Simeoni. 6 Masino wobu arikang manea aha mani, nemu saine. Wape ene rafoi mani, esobuai na Manasyei tuti Efraimi. 7 Inari fi nina ne, weo enehutituai inamu Raheli. Na kutu yarabera yau na Padan-Arami mani inamu Raheli mireha na Kanani, kefangwe Efrata. Tuti isarai na wana na rang deraung to Efrata." Ninaia mani ahuai we Betlehemi.✝

8 Na kutu Israeli deti Yusupi ne kaisungfo suru nanai dutangnai deyo, "Kaisung mantei surui nina?" 9 Yusupi yoa we tamanai deyo, "Nehu kaisungno Allai dohong suru we yau na Mesiri nina." Ampefe Yakupi medu deyo, "Bohong suru kefang we yau ma, ambori imoang suru."

10 Rabuang bonani Israeli weinongkutungna tuti deti wawurai. Mayeai Yusupi dohong ne kaisungfo suru kefang tamangnaia, tuti tamangno fiaung suru tuti niuna suru. 11 Ainanaya Israeli medu we Yusupi deyo, "Woiroi paria, yeitarahio wiro yeti wau ahang kaha. Wape nina mani Allai dohong yau we yeti wau tuti nemu arikang nesa."

12 Mayeai Yusupi yabi ne kaisungfo suru weru tamangna weo uroa rurang tamangna fefe, tuti suang aweu ureng disangso kahofa wau. 13 Mayeaia mani Yusupi yu kaisungfo suru, uroa na tamang Yakupi arongfo. Dohong Manasyei doari na tamang Israeli eneung domoya foi, mae Efraimi doari na tamang eneung dowei foi. 14 Wape Israeli yuai warang domoya foia wiatai sau Efraimi nungkamieifoi, masino fui dine ki. Tuti warang dowei foi yuaisia wiatai sau Manasyei nungkamieifoi, masino Manasyei fuba dine ki. Ampefe Israeli sa wawera warangfo suru. 15 Mayeaia mani mioang Yusupi na medu deyo,

"Allai mano nehu tafui Abrahami tuti nehu dai Isaki

usomi wei foi mani,

Allai mano wiwiaing yau

yarang paria sobu nina, 16 tuti mano we Wewai sawing yau weru ne karirafo ne,

kadono Andino mioang kaisung ninisuru.

Donio wonohune kontaio nehu tafui Abrahami tuti nehu dai Isaki, watai we fitawafa na kaisung ninisuru

tuti kadono urawing separai bitoya na nunei."

17 Wiro Yakupi medu kaiwo moangfo kaharai, mae Yusupi deti tamang yuai warang domoya foi wiatai sau Efraimi nungkamiei foi. Fi nanai detioai wiro beng kaha, ampefe yu tamang warangfo weru Efraimi nungkamieifoi tuti dohongnai to Manasyei nungkamieifoi. 18 Yusupi medu we tamanai deyo, "Daie, wiro nari tonana fanai, weo Manasyei mani arikang fuba dine, ampefe bohong waramu domoya wai wiatai sau nungkamiei nei."

19 Manamo Yakupi deiayari deyo, "Nehu kaisungne wau, yeitawangno fianai aino inari nina. Manasyei kontai ambori we inontaraio etatori tuti ne ririanei ambori we kaiwasa fiabai bei. Masino tonanai ki, wape ne tahatui Efraimi ambori inontarai etatori sewa. Tuti ne tahatui ne ririafoi ewe kaiwasa fiabai sewa paria."

20 Mayeai na rahida nani kontaio, Yakupi mioang kaisungfo suru tuti medu deyo, "Inontarai Israeli nesa eteyo emoang inontarai manei mani, etafu muwonomine, emadu eteyo, ‘Kadono Allai niari wau nemu tarai toyari Efraimi tuti Manasyei.’ " Ampefe na tonanafo Yakupi dohong moang we Efraimi fafong weru Manasyei.✝ 21 Mayeai Israeli medu we Yusupi deyo, "Wairoi ahang kaha ambori imereha rai. Wape Allai ambori wiwiaing mea, tuti Kia mea metawera to mene wereng fosa ene nufoi aha. 22 Kutu ninai yohong kahofa mahikai Sikhemi we wau, wiro we nemu tafuaisa kaha. Kahofa nanai imamunara itahatawang inontarai Amori fosa tuti yewarai werusa na nehu sondu tuti afainei."