1 Wape kaharifoi fiabai pampang na nu Kanani foi. 2 Tuti potangno eha kawurua na Mesirifo etangna kaia nanai, ene dai medu wesa deyo, "Mera wa mewori fiang kuteai we tata." 3 Ampefe Yehudai yoa we tamanai deyo, "Inontarai wenunggamiei na Mesiri foi deretawang amea kawurua na mambiriu paria. Deyo, wiro deti ameuremine fanai, masino amene tahatuinei wiro da riata kaha. 4 Ampefe masino dai roa we amene tahatuinei da ria amea mani, amemaya we amerawa amewori fiang we tata. 5 Wape masino wiro roa we dariata kaha mani, amea kontai wiro amera to wana kaha, weo inontaraifoi medu we amea kawurua ampa deyo, Wiro mewati urehune fanai, masino mene tahatuifoi wiro daria mea kaha."

6 Ainanaya Israeli medu deyo, "We fianie menari yau isobu dadira, na meteisaharai we inontaraifoi, weo mene tahatui manei ne?" 7 Tuti eroa wei eteyo, "Inontaraifoi dutang bera kariri amea pampang, dutang kariri tane munurorongne, deyo, ‘Mene dai darangfo ne? Mene tahatui mang manei konta ne?’ Tuti ameteisaha kariri fianai aino dutang amea weafo. Amea wiro amewaitawanai kaha weo i ambori medu deyo, ‘Meha mene tahatui wai ma.’ "

8 Mayeai Yehudai medu we tamangno Israeli deyo, "Roa we kaisungnei daria yau, ambori amemainenang we amera ahera, donio tatarang, wiro tamarareha fanai, amea, wau tuti amene arikang nesa. 9 Yauno ambori iwaitawangnai. Masino wiro ikari we wau ma kaha tuti yohongni na aromu ne kaha mani, yauno inari sarawai we dai wau we fitawafa. 10 Tarahio wiro tatamang waroi kaha mani, tonina mani amera we beru kawuru ampa."

11 Ainanaya etamami Israeli medu wesa deyo, "Masino tonana mani, menari toninaifa, meha tane fianangno mahikaifo na nu nini, mesoniai na mene karungwa mehara metohongnai we inontaraifoi we fiembaitai, amani kesi*, aniwa ne maing, maningno nungsai mampori, kemiri bong tuti badami bong.* 12 Tuti meha doifo beru kiparai. Doio dohongnai tawera kawurua to mene karung rorongfo, todoni kontaio meha tawera aha, tarahio esoni sarawaifa. 13 Meha mene tahatuinei kontai, memainenang tuti metarabera mea we inontaraifoia. 14 Allai Mano Wemambiriu Sewafoi kadono niari inontaraifoi enewawu mea, donio sawing Simeoni tuti Benyamini, metarabera mea kiai we yau ahama. Wape we yau mani, masino nehu kaisungne suru unai weru yau mani, bento, imainenang kawuru ampa."

15 Ainanaya Yakupi ne kaisung fosa eha fiembaitafo tuti eha doi ne faufo beru kiparai, tuti eha Benyamini kontai, mayeai emainenang tuti era to Mesiri. Erawa sobu Mesiri fo tuti etoari na Yusupi arongfo. 16 Na kutu Yusupi deti Benyamini daria ne tafuaisa fo, medu we mangfata mano wenunggamiei we deitawang ne munufoi deyo, "Ka inontarai ninisa to nehu munu foia, mung fiahung manei tuti moinenangni we fiang, weo rahida rabuang mani inontarai ninisa etampi ria yau." 17 Mangfatafoi niari kariri kaiwo Yusupi medurai weifo, tuti kiasa era to Yusupi ne munu rorongfoi.

18 Na kutu kiasa to Yusupi ne munufoi nanai, ematai paria. Enemitituaitai tuti emadu wawerasa eteyo, "Fio wedaya kia tata to ninai ma mani, doio tawera ma nayai na tane karung rorongne na kutu reantenang ta ra to ninai ma ne, ambori etafu tata tuti enari tata we woming tuti eha tane keledai nesa." 19 Ampefe era kefang Yusupi ne mangfatafoi tuti emadu wei na rahutu borongfo eteyo, 20 "Daie, ameteyo amemadu ria wau! Amea mani raminde amera ma we amewori fiang. 21 Wape na kutu amerawa sobu katai bei we ametena nai tuti amefai amene karungne mani, amene doine nayai tantenang na amene karung rorongne. Wape kutu ninai ameha tawera ahamane. 22 Ameserawawerahai mandoni dino soni doifo to amene karung rorongfo ne, kutu ninai ameha doi siai feai kontai we amewori fiang nayai." 23 Wape mangfatafoi medu wesa deyo, "Menemboru, wiro mematai fanai, mene Allai tuti mene dai ne Allai andino soni doi to mene karung rorongwa. Mene doiwa mani iru kawuru ampa." Mayeai kia Simeoni to boriai tuti dohongni wesa. 24 Ainanaya mangfatafoi kiasa esuayai to Yusupi ne munu rorongfo afui, dohong mereha we eruai eawemifo, kontaio dohong fiang we ene keledai fosa.

25 Ainanaya emainenang fiembaitafo etamang we Yusupi dama na kutu rahida rabuangfo, weo etaramioai kawurua we etampi riati na nanaifa. 26 Na kutu Yusupi dawa sobu ne munufoi, eha fiembaitafo etohongnai we Yusupi na munu rorongfo, mayeai etisangkapa eawemibuka esomi aweu euremi disangso kahofa wau. 27 Ainanaya Yusupi dutangsa kariri enayai na maie, mayeai medu aha deyo, "Mene dai mano wepaituang meteikaririfoi niayai na maie? Tuti darangfo raie?" 28 Eroa wei eteyo, "Amene dai, nemu mangfatafoi niayai na mai, tuti darangfo." Mayeai etisangkapa eawemibuka tuti esomi aweu euremi disangso kahofa wau.

29 Na kutu Yusupi deti netahatui Benyamini mano une ai mansiarifoi, ampefe medu aha deyo, "Mene tahatui fuio meteikariri we yau fi dininie?" Mayeai medu aha deyo, "Kadono Allai dohong mahikaifo we nehu kaisung ne wau." 30 Ainanaya Yusupi sikera daweru nanai, weo enerorongfoi fituayai we aro ne tahatuifoi, ampefe sera we katai we sai nayai. Yusupi suayai to ne rorongfoi afui tuti sai na nanaia. 31 Saia kai nanai, mayeai yuairurang urengfo tuti da to boriei, enetawani tuti medu we ne mangfatafoi deyo, "Memainenang fiangfo."

32 Ainanaya ne mangfata fosa emainenang fiangfo, Yusupi nengfo na meja bei siai, ne doroi fosa enengfo na meja bei siai tuti inontarai Mesiri mano etampi ruhiai riasafo enengfo na meja bei siai. Weo inontarai Mesiri wiro etampi ruhiai ria inontarai Iberani kaha, weo fi nanai inontarai Mesiri ene wori fine. 33 Yusupi ne doroi fosa eminohi na arongfo, eminohi tatuwasa na mano reantenangfoi paria sobu mano fuifoi, donio ewati wawerasa na epapuhung paria. 34 Fiang we etangfo mani mangfata fosa eha na Yusupi ne mejafoi, wape Benyamini nengfo we bering fuba sewa ne tafuai enengfo. Ainanaya etampi tuti etunung ruhiai ria Yusupi na efaraise paria.