1 Abrahami ne wiwingno Sarai minohi darang fuina piaring piareia itu (127). 2 Mayeai Sarai mireha na Kiryat-Arbai, neo fuininai esahuai we Hebroni, na kahofa Kanani. Ampefe Abrahami da ma minohi saia deidu we ne wiwingfoi.

3 Na kutu Abrahami saia kai nanai, ne wiwingfoi wiatai mae daweruia, da wa medu we inontarai Heti mano ene kahofa fosa. 4 Medu wesa deyo, "Yau mani inontarai aiseio ira ma inayai rahang mea na ninai. Masino meroa we yau mani, metohong kahofa kuteai we iwori ambori isarai nehu wiwingfoi nayai."✝

5 Inontarai Heti fosa eroa we Abrahami eteyo, 6 "Toninaifa terai, dai wau mani inontarai fuabaio ametato wau na nayai rahang amea nina. Ampefe wurai nemu wiwingwai na amene fafo bengne, wiro manei na amea deiaya wau we wurai nemu wiwingwai na fafone kaha." 7 Mayeai Abrahami somi we dohong mahikai we inontarai Heti fosa weo emadu tonanafo, 8 tuti medu deyo, "Masino meroa weai we ika nehu wiwingfoi ma isarai na nina mani, mefata yau na metutang Efroni, Sohari ne kaisungfoi. 9 Masino miaya mani dewayang ne wingsaburung Makpelai wiatai na ne romi reafo wanai we yau. Tuti ne mahikai mani dewayangnai na ne harga mai, tuti ibaitai ambori mewati terai na meuremine, ambori wingsaburung nanai we katai nehu fafo."

10 Na kutu nanafo mani, Efroni kontai minohi rahang inontarai Heti fosa na katai efanduhisa nai foi, na rahutu bendari borongfo. Mayeai na inontarai Heti euremireafo, Efroni, inontarai Heti foi medu we Abrahami deyo, 11 "Daie, taramuma. Na nehu inontaraio amene nu boyari nesa euremireane, imadurai mau we yeyo, yohong romifoi tuti wingsaburungfoi kontai we wau we wurai nemu wiwingwai nai."

12 Ainanaya Abrahami somi we inontarai Heti fosa na earomireafo, 13 mae medu we Efroni na inontaraifosa euremifo deyo, "Masino roa tonana mani, taramu imadu mau ne, romifoi ibaiti sentenang. Ka nemu doi ibaitai naya ne mau, ambori ika nehu wiwingfoi ma isarai nayai."

14 Efroni yoa we Abrahami deyo, 15 "Daie taramuma. Kahofa kutu ne harga doi peraki piaring we bea (400) nanai wefieai we turu kaha, ampefe ka nemu wiwingwai ma wurai nayai." 16 Abrahami yoa we fianai aino Efroni medurafo, ainanaya deto doi peraki piaring we bea (400) fo, ambori titua doifo kariri mantawayangfi fosa etitua toa fo. Mayeai dohongnai we Efronia tuti inontarai Heti fosa ewatioai na euremifo kontai.

17 Ampefe Efroni ne romio wiatai na Makpelai na Mamrei do wanang murangfoi, Abrahami wioriri wei we nenia, romifoi, wingsaburungfoi tuti ai kiaio doari na romifoi kontai ne doari na kahofa deraungfo kai. 18 Kahofa tuti fi tifu kiaio doari na nanafo dohongnai we Abrahamia, tuti inontarai Heti mano efanduhisa na rahutu borong bendarifoi eroa weai, weo kahofa nanai Abrahami ne fi fine. 19 Ainanaya Abrahami kia ne wiwingno Sarai ma sirai na wingsaburung Makpelai, na bendari Mamre do wanang murangfoi, amani Hebroni na kahofa Kanani foi. 20 Tonanaifa kahofa tuti wingsaburung na Makhpelaio Abrahami wiori ria inontarai Heti fosa we nefi fine, we dohongnai we kahofa fafo.