1 Na rabuang bonani Yakupi niayai na nu Kanani, kataio tamang niayai weinontarai aisei foi. 2 Kaiwo kariri Yakupi tuti ne ririafoi mani sonina.

Na kutu Yusupi ne fuina suraya itu (17) fo mani webariboaia, deitawang wedua kambing tuti domba ria ne tafuaisa, na tamang ne wiwingno Bilhai tuti Silpai une arikangfosa. Tuti Yusupi deisaha fi karira ne tafuai enari fo we tamangno Yakupi.

3 Israeli enewawu Yusupi sewa weru ne arikang mano wei fosa, weo Yusupi nini saubaunung na kutu Yakupi weinongkutungfo. Na rahida bei Yakupi demi inontarai manei niari ansung dewaroi mehikai paria bei we Yusupi. 4 Na kutu ne tafuai ewatioai we ene dai enewawu Yusupi sewa ea nanai, ampefe enemirireuwi tuti wiro emadu nari wei kaha.

5 Na diru bei mani Yusupi demiei. Na kutu deiriri ne amieifoi we ne tafuaisa nanai, ne tafuai enemirireuwi paria aha. 6 Weo medu wesa deyo, "Metaramio nehu amiei nei, 7 yemiei yetio tanayai na romi tuti tawora potangno takutuia. Na tantuma nehu potangfoi doatiraia mimoya, tuti mene potangfo era ma etoawari nehufoi tuti esomi aweu ene raindengfo sobu kahofa wau we nehufoi."

8 Ainanaya ne tafuaisa emadu wei eteyo, "Boitarahio wemananu tuti weparenta amea re?" Ampefe enemirireuwi mambiriu aha, weo ne amieifoi, tuti ne kaiwo medurai kariri ne amieifoi disang enemirorongfoi.

9 Ainanaya demiei amiei siai bei aha, tuti deiriri we ne doroifosa. Medu deyo, "Yemiei aha mani, yeti wo faisi, embai faisi tuti awaha suraya boyari esomi we yau." 10 Na kutu deiriri amieifoi we tamanai tuti ne tafuaisa nanai, tamang suari deyo, "Amiei fiani dino boiriri aha ninai? Boitarahio yau, inamuai tuti ne tafuaisa kiai ametisangkapa ameawemibuka amesomi aweu ameuremine disangso kahofa we wau e?" 11 Ampefe ne tafuaisa enemirorong pirahai wei paria, wape tamangno Yakupi enetituai amieifo na enerorongfoi pampang.✝

12 Na rahida bei mani, Yusupi ne tafuaisa erawa ewaitawang wedua etamamifoi ne kambing tuti domba na Sikemi. 13 Mayeai Israeli demi Yusupi deyo, "Ro to Sikemi, we nemu tafuaisa, weo enayai ewaitawang wedua tane kambing tuti domba fosa fo." Yusupi yoa deyo, "Yo, daie ira." 14 Israeli medu deyo, "Roa boti nemu tafuaisa tuti tane kambing tuti domba fosa enayai na mai e, mayeai barabera wau ma boisaharai we yau."

Ampefe Yakupi demi da weru enang Hebroni. Tuti Yusupi da paria sobu Sikemi. 15 Na kutu Yusupi da sera we ne tafuaisa na katai wiarora weninoi foi nanai, sobu inontarai mang manei na nanai. Inontarai foi dutangni deyo, "Wera we fiani e?" 16 Yusupi yoa wei deyo, "Isera we nehu tafuaisa. Botisa mani boisaharai we yau, na doni ewaitawang wedua kambing tuti domba fosa?" 17 Ainanaya inontaraifoi medu wei deyo, "Era weru katai nini ampa. Itarahuo emadu weo era to Dotani." Ampefe Yusupi da ria ne tafuaisa paria to Dotani.

18 Na wairoi ne tafuai ewatioi. Wape wiro da wa kefang ea kaharai mae, emadu ruhi kaiwo kawurua we emungni. 19 Emadu wawerasa eteyo, "Mewatia, tane mano demiei biriufi da ma wanaifa! 20 Merama tamungni tuti tasoari to kamirei mereha sirahia ne bei. Tuti ambori tamadu tateyo, andowa memuna manei miungni ampa. Tuti ambori tawati kariri ne amiei deyoi foi antu ete bereri e!"

21 Wape na kutu Rubeni tarao kaiwo etamafo nanai, yurai we sawing Yusupi werusa, tuti medu wesa deyo, "Wiro tamungni fanai." 22 Mayeai Rubeni medu wesa aha deyo, "Wiro tawarami rika soi fanai tuti wiro taboia wekahai fanai, mae tasoari rarang kamirei mereha sirahiao wiatai na katai wiarora wekamamiei nini." Rubeni medu tonanai, weo yurai we sawing Yusupi tuti kiari we etamami Yakupi aha.

23 Arahio Yusupi da wa sobu ne tafuaisa nanai, na tantuma etisu Yusupi ne ansung mehikaio satari foi. 24 Tuti eharia esoari to kamirei mereha sirahiafoi. 25 Mayeai eminohi etampi. Na tantuma, ewatia mani, ewati inontarai Ismaeli mano etawayang fi, era na Gileati to Mesiri. Etaunaungso ene untafo na kesi tuti maning nungsai mamporifo. Etaunaungso untafo

26 Ainanaya Yehudai medu we ne doroifosa deyo, "Tamung tane tahatuinei tuti tatadiwari mani, wiro tasobu fiea kaha. 27 Todoni mani, mera ma tatawayangni we inontarai Ismaeli nesa. Wiro tatohong farioi fanai, weo i mani tane tahatui dine tuti tane rika boyari." Tuti Yehudai ne doroifosa eroa we kaiwo medurafo.

28 Donio na kutu inontarai Midiani* mano etawayang fi fosa era ma nanai, Yusupi ne tafuai eruaisi weru kamirei merehafoi ayai tuti etawayangni wesa, na doi peraki piarei (20). Ainanaya eha Yusupi to Mesiria.✝

29 Na kutu Rubeni da to kamirei mereha foia mani deti Yusupi ahang kahai nanai, fiosiabu ne ansungfo, weo enerorongfoi fituayai paria. 30 Mayeai daraberahi we ne tahatui fosa deyo, "Arikangfoi wiro niayai na kamirei merehafoi ahang kahaia, fianai aino ambori inari ne?"

31 Ainanaya eha Yusupi ne ansungfoi tuti emungno kambing manei, mayeai erorang ansungfoi na rikafoi. 32 Ansung mehikai pari nani, etemi manei na ea kia ansungfoi we etamamifoia we detioi, na medu deyo, "Ansung nini amesobui, ampefe dai boroangwei, nemu kaisungnei ne ansung fi dine ne?" 33 Na kutu Yakupi deroang ansungfoi nanai medu deyo, "Antu, nehu kaisungno Yusupi ne ansungfi dinini. Tarai andowa memuna miungni ampa. Oh, nehu kaisungno Yusupi mireha ampa! Andowa memuna fiosiabu netaraifoi." 34 Tuti Yakupi fiosiabu ne ansungfo, mayeai wiorakota enerabuang na ireu* nyumetang kerirafoi wairoi paria, weo minda we ne kaisungfoi fefe. 35 Ne arikang fosa kiai, mang tuti wiwing fosa erurai we ewaworiri. Manamo deiayasa deyo, "Bereri! Isai we nehu kaisungfoi paria ira riati isobui na raimeri!" Ampefe tonanaifa Yakupi minda pampang we ne kaisungno Yusupi.

36 Na kutu siari nanai kontaio, na Mesiri, inontarai Midiani fosa etawayang Yusupi we Potifari, inontarai mano wenunggamiei we mano ewaitawang wedua mananufoi.