1 Na kutu Isaki weinongkutungna tuti urengfo fafa, donio wiro deti ahang kaha, ampefe sahu Esauwi ne kaisung fubafoi, tuti medu wei deyo, "Nehu kaisung ne waune." Esauwi yoa we tamangna deyo, "Daie, boyo!" 2 Isaki medu we Esauwi deyo, "Boti, iweinonggutung ampa, tuti wiro yeitawang rahida imereha nayafo kaha. 3 Ampefe ka nemu afaiwai tuti atowa, ro to airorongfo wera we andowa manei we yau. 4 Andowa netaraiwai rang ne maingfo kariri nehu fiang yohong weafo, mayeai ka we yau ma, ambori yangna kai mani imoang wau na iminohi yarang nina."

5 Wape Ribkai tarao kaiwo Isaki medurai we Esauwi, ne kaisungfoi. Na kutu Esauwi da to airorongfo sera we andowa we tamangnafo, 6 Ribkai medu we Yakupi, ne kaisungfoi deyo, "Arahio tarahuo tamamu medu we nemu tafua Esauwi deyo, 7 Wera we andowa manei, rangni we fiang maing we yau, ambori yang tuti imoang wau na Yahwei arongfo, na iminohi yarang nina. 8 Ampefe nehu kaisung ne wau, taramuo kaiwo imadurane tuti bohong kaririai. 9 Ro to tone katai kambing tuti domba etoa nayafo, birio kambing antung biriaya mandu, ambori irang suru we fiang maing we tamamuai toyario ne eneoafo. 10 Ka we daia we dang, ambori mioang wau na minohi darang nina."

11 Mayeai Yakupi medu we inangno Ribkai deyo, "Wape nehu tafua Esauwi ne taraifoi wenuawuru, mae yau mani bereri. 12 Dohonao dai wara kariri nehu tarainei we wenuawuru kahafo. Nana mani deitawangnai we itofari, ampefe wiro mioang yau kaha, mae deikanggani yaufe."

13 Wape inang medu wei deyo, "Yauno isodai ne tonanafo ne. Ampefe taramuo nehu kaiwone, roa ka kambing antung mandu ma." 14 Ainanaya Yakupi da wa kia kambingfo suru we inanai ma. Mayeai inang niaria we fiang maing, toyari fiangno tamang dohong we dangfo. 15 Mayeai Ribkai kia ne kaisung fuba Esauwi ne ansung mehikaio derarati na munu rorongfo ma, ainanaya demi ne kaisung fui Yakupi sataraifa. 16 Tuti sensang wedua Yakupi warangfo tuti rahanang we nuawuru kahafo na kambing rerawafo. 17 Ainanaya dohong fiangno yangnaia maing nanai tuti roti niunungfo we ne kaisungno Yakupia.

18 Ainanaya Yakupi suayai to tamang ne rorongfoi afui, tuti medu deyo, "Daie!" Tamang yoa wei deyo, "Nehu kaisung mandoni diwau?" 19 Yakupi yoa we tamanai deyo, "Yau Esauwi, nemu kaisung fubafoi di yaune. Yohong kariri kaiwo dai modurai we yaufe ampa. Boa bari wau munohi tuti bangno andowa tarai imungni tuti irangnia nini, ambori dai moang yau."

20 Mayeai Isaki medu we ne kaisungfoi deyo, "Nehu kaisung ne wau ahera paria we wobu andowane." Yakupi yoa deyo, "Yahwei, nemu Allai andino fiata yaune."

21 Ainanaya Isaki medu we Yakupi deyo, "Ro kefang yau ma ambori warahururang kariri wau, taraie nehu kaisung Esauwi di wau ete bereri e." 22 Mayeai Yakupi da kefang tamang Isakia, tuti tamang wararurang kariri tuti medu deyo, "Rawafuinei mani, rawafui Yakupi, wape wararengne mani, warareng Esauwi." 23 Ampefe Isaki wiro deroangno Yakupi kaha, weo wararengfo wenuawuru toyari Yakupi ne tafua Esauwi fefe. Wape na kutu Isaki de mioang Yakupi mani, 24 dutangnai aha deyo, "Taraie nehu kaisung Esauwi di wau e?" Yakupi yoa we tamangna deyo, "Yo! Yau aranane." 25 Mayeai Isaki medu deyo, "Bohong fiangwa kefang yau ma, ambori yang andowa taraio rangnawa, tuti imoang wau." Ampefe dohong fiangfo kefang we tamangnaia, mayeai tamang dangna. Tuti kia angguri kontai we tamangnaia we dunung.

26 Mayeai tamang Isaki medu wei deyo, "Nehu kaisung ne wau, ro kefang yau ma tuti nuna yau." 27 Ainanaya Yakupi da kefang tamangnaia tuti niuna tamanai. Na kutu Isaki niuna Esauwi ne ansungno Yakupi satarafo ne nunsaifo nanai, mioang Yakupi, na medu deyo,

"Tarai nehu kaisungnei ne nunsaine toyario nunsai airorongno Yahwei mioangna fo.✝

28 Kadono Allai ambori dohong randamang na rorafaisi bia sau nemu kahofane,

tuti kahofafo beng tuti potang kontaio angguri bitoya paria aha.

29 Kaiwasanei kiai na nunei ewemangfata we wau,

tuti kaiwasa na doni kontai ambori esomi we wau,

tuti wau weparenta nemu doroi fosa,

tuti nemu ai ne arikang fosa esomi we wau.

Mandoni dino deikanggani wau mani, wenani kontaio Allai deikanggani,

tuti mandoni dino mioang wau mani, wenani kontaio Allai mioangni."✝

30 Isaki mioang Yakupia kai tuti Yakupi da to boriai weru tamang Isaki, wiro waroi ahang kaha mae, ne tafua Esauwi daraberahi na sangfo ma. 31 I kontaio meinenang fiang maingfo, mayeai kia da we tamangnaia. Medu we tamanai deyo, "Daie, boabari wau bang andowa imuninei ne taraio irangnane, ambori moang yau." 32 Wape Isaki medu wei deyo, "Mandoni di wau?" Esauwi yoa deyo, "Esauwi diyau, nemu kaisung fubafi diyau." 33 Na kutu Isaki deitawangnai we Esauwi dinani, soiri tuti netaraifoi rirora, ampefe medu deyo, "Mandoni dino antanafa miung andowafoi tuti yangnia miasa kiari we yau ma nina? Yau yangna kai kawurua, na wiro roma kaharai tuti imoangni kawuruampa, tuti todoni kontaio i mani inontarai mano sobu moangfo ampa."

34 Na kutu Esauwi tarao kaiwo tamang medurafo nanai, enerorong pirahai tuti sai na mambiriu. Tuti medu we tamanai deyo, "Daie, moang yau kontai!" 35 Tamang yoa wei deyo, "Bereri! Wiro imoang wau kaha. Weo nemu tahatuifoi da ma tetofa yau, tuti kia moangno yohongnai we waufo ampa."

36 Esauwi medu deyo, "Antu to we i mani ahui we Yakupi, weo tetofa yau we beru ampa. Dewa nehu hakio iwe kaisung fubafo, tuti dewa nario moangnaio we yaufo." Mayeai Esauwi dutang tamanai aha deyo, "Daie, nemu moang siai feai we yau ahang kahae?"✝

37 Ainanaya Isaki yoa we Esauwi deyo, "Taramuma, iruasi kawurua we wenungkamiei sau wau. Tuti ne doroi fosa kawurua yohongsa ewe mangfata wei, tuti imoangni na yohong potang tuti angguri wei. Ampefe nehu kaisung ne wau, fianai aino yohongnai we wau ahang ne?"

38 Esauwi medu we tamangna deyo, "Daie, manta moangna beyari nanai terai na waune ne? Daie moang yau kontai." Tuti Esauwi sai na rawafui fiabai.✝

39 Mayeai tamang Isaki yoa wei deyo,

"Taramuo yau, wau* ambori nayai wairoi weru kahofa bengne,

tuti nayai waroi weru randamang na rora faisi.

40 Wau ambori munohifo na nemu fi mamuna wa terai,

tuti wau ambori wewoming we nemu tahatuifoi.

Wape masino rurai paria momuna mani,

ambori kaharai weru ne mambiriufo ki."✝✝

41 Esauwi enerireu Yakupi paria, weo moangno tamang Isaki dohongnai weifo. Mayeai Esauwi medu na enerorong deyo, "Waroi ahang kaha mae nehu dai ambori mireha rai. Na rahida antowe koya we dai foa kai mani, yau ambori imung nehu tahatui Yakupi!" 42 Na kutu Ribkai tarao fi ne kaisung fuba Esauwi samafo nanai, demi inontarai manei sahu ne kaisung fui Yakupi ma, mayeai medu wei deyo, "Nemu tafua Esauwi de biai ne kasoufo na miung wau. 43 Ampefe nehu kaisungne wau, taramuo nehu kaiwone. Moinenang we wowu nemu tarai to Harani, we rorohumang Labani. 44 Tuti munohi riati toura kuteai na nanai paria nemu tafuai ne kasoufo kai, 45 tuti aroporo fianai aino nari kawuru wei ampo. Mayeai ahang wori yemi inontarai manea eha wau to ninai ma ki. Weo wiro imaya we mumarareha na rahida boyari kaha."

46 Mayeai Ribkai da wa medu we Isaki aha deyo, "Wiro enehuoa kahai we wiwing Heti Esauwi kia suru we ne wiwingfo. Masino Yakupi kontai kia wiwing Heti manei we ne wiwing mani, wefianie yarang? Neo mahikai mani imereha ra."