1 Na rahida bei kaharifoi miung na katai Isaki niayai naifoi, toyari ne dariai kawurua na rabuang bo Abrahami minohi darangfo. Ampefe Isaki da to Gerari, kataio inontarai Filistini ene mananu Abimeleki niayai naifoi. 2 Mayeai Yahwei deinawi netarai wei tuti medu wei deyo, "Wiro ro to Mesiri fanai. Nayai na kataio Yeisaharai we wau nei. 3 Na katai nini nayai we inontarai aisei. Yau ambori iwe riria wau tuti Imoang wau. Weo katai nini sentenang ambori Yohongni we wau tuti nemu ririanei. Tuti Yau ambori Yohong kariri kaiwo faforao Yohongnai kawurua we nemu dai Abrahami ne. 4 Yau ambori inari nemu ririanei bitoya netarai toyari awaha na rorafaisi. Tuti ambori Yohong katai nini sentenang we nemu ririanei. Tuti na nemu ririanei, kaiwasa na nunei sentenang esobu moangfo.✝ 5 Weo nemu dai Abrahami tarao Nehu kaiwone kawurua ampa. I niari kariri fi kiaio Yemi weafo, Nehu kaiwo kutuane, tuti Nehu kaiwo aunau ne." 6 Ampefe Isaki niayai na Geraria.

7 Na kutu inontarai Gerari fosa etutangni we Ribkai, Isaki yoa wesa deyo, "Rorohuwing dine." Weo Isaki mitai yoa we ne wiwing dine, enetituaitai dohonao inontarai fosa na katai nani emungnife tuti eha Ribkai, weo ureng bohi paria.✝

8 Isaki kawurua niayai na wanai wairoi kuteaia. Na rahida bei, Abimeleki mananu inontarai Filistini foi doari deti na suwireifoi aweu, na tantuma deti Isaki fiaung ne wiwingno Ribkai. 9 Mayeai Abimeleki sahu Isaki ma tuti medu wei deyo, "Yeitawanaifa weo i mani nemu wiwing dine. Todoni fino modu boyo nemu tahatui dine nina?" Isaki yoa wei deyo, "Enehutituaitai, masino yeyo nehu wiwing dine mani, inontaraifosa na katai nini emung yau tuti eha Ribkaife." 10 Wape Abimeleki medu wei deyo, "Fianai aino nari we amea ninai? Masino inontarai Gerari nesa manei dena ria nemu wiwingfoi, tuti fi nanai kawariai mani, wauno wedaya sasari we ameane." 11 Mayeai Abimeleki deretawang ne inontaraifosa kiai deyo, "Mandoni dino tetawa inontarai nini ete ne wiwingnei mani, ambori sobu aiboi mararehafo."

12 Na kutu Isaki niayai na katai nani, i dohong romi tuti sanang fi, na fuina bo nani kontaio fi sanangfo wetarai piaring we kiparai, weo Yahwei mioangni fefe. 13 Ne rafoi bitoya tuti ne rafoi bitoya aha, donio i weinontarai mano ne ra bitoya paria. 14 Isaki ne fiahung kambing, domba tuti sapi bitoya paria, kontaio ne mangfata erufi wei efau paria, donio inontarai Filistini fosa enemirorong pirahai wei. 15 Donio kamirei merehao tamang Abrahami ne mangfatafosa esirayai na raminde minohi darangfo, inontarai Filistini fosa etaukahobuai na kahofa aha.

16 Mayeai Abimeleki medu we Isaki deyo, "Ro weru amene katainei, weo nemu mambiriufo fuba sewa amea ampa." 17 Ampefe Isaki da weru Gerari, da to enang Geraria biaung ne yawa tendafoi tuti niayai na nanai. 18 Mayeai Isaki demi ne mangfata fosa esirai riwang kamirei merehao raminde tamang Abrahami ne mangfatafosa esirayafo, weo inontarai Filistini fosa etaukahobuai aha, na kutu Abrahami mireha kawuru ampo. Kamirei merehafoi kiai Isaki dohong wonongfo kariri wonongno raminde tamang Abrahami dohongnafo.

19 Isaki ne mangfatafosa kontai esarai kamirei merehafo na enang Gerari nanai, esobu mereha urengfoi duwi pampang. 20 Mayeaia mani mantahung fiahung fosa na Gerari, erama emamuna we Isaki ne mantahung fiahung fosa. Emadu eteyo, "Kamirei mereha nini amene fi dine." Ampefe Isaki dohong kamirei merehafoi wonong fino Eseki, nana mani "Aiteta." Weo emamuna we Isaki ne mantahung fosa na wana.

21 Ainanaya Isaki ne mangfatafosa esarai kamirei mereha bei siai aha, wape inontarai Gerari fosa emamuna we Isaki ne mangfatafosa aha. Ampefe Isaki dohong kamirei merehafoi wonong fino "Sitnai" nana mani "Mamuna." 22 Mayeai Isaki da weru katai nani, tuti ne mangfatafosa esarai kamirei mereha bei siai aha. Wape wiro emamuna wei ahang kaha, ampefe Isaki dohong kamirei merehafoi wonong fino "Rehoboti" nana mani "Katai fiabai." Tuti medu deyo, "Ninaia mani, Yahwei dohong tata tahasau ampa, donio tanayai na mai na katai nini tuti tatawing separaifa."

23 Na nanai Isaki da to Bersyeba. 24 Mayeai dirua mani Yahwei deinawi netarai we Isaki, tuti Medu wei deyo, "Yau mani Allai mano tamamu Abrahami somi weifoi di Yau. Wiro mutai fanai, weo Yau ambori Iwe riria wau. Yau ambori Imoang wau tuti Inari nemu ririanei bitoya. Weo Yererai kawurua we Abrahami, Nehu mangfatafoi ampa." 25 Mayeai Isaki biaung mesba bei na Bersyeba we somi we Yahwei na nanai. I biaung ne yawa tendafoi tuti ne mangfatafosa esarai kamirei mereha bei na nanai.

26 Na rahida bei, Abimeleki mananu Gerari foi tuti ne mantaunau Ahusati, tuti Pikholi mano wenunggamiei we afai mamuna fosa, itorama itotuambawa Isaki.✝ 27 Ainanaya Isaki dutang sitoru deyo, "We fianie muntorama muntotuambawa yau ninai? Raminde nanai menemirireu yau tuti metata yau weru mene katainei. We fiani muntora we yau ma nina?"

28 Itoroa wei itoreyo, "Amewati terai na ameuremine we Yahwei weriria wau paria. Ampefe amemadu ameteyo ne mahikai mani, wau tuti amea tafafora tuti tatabuhi kaiwo arera ruhiai, 29 weo wau ambori wiro nari karirafo we amea kaha. Tuti amea kontaio wiro amenari karirafo we wau kaha, mae amenari ne bengfo we wau tuti ametua wau ro na maia. Kasau we amea ampa weo Yahwei mioang wau."

30 Mayeai Isaki meinenang fiangfo, etampi etunung ruhiai na mai. 31 Aha kamiaia mani, itorohong kaiwo arerai na itofafora ruhiai. Mayeai Isaki sawing sitoru tuti itora werui na maia.

32 Na rahida nani kontaio Isaki ne mangfatafosa era ma eteisaharai wei, kariri kamirei mereha esarai kawuru ampafoi, tuti emadu wei eteyo, "Amesobu mereha ampa." 33 Mayeai Isaki dohong kamirei merehafoi wonong fino "Syeba" nana mani "Fafora," donio bendari nani wonong fino Bersyeba* paria sobu ninai.

34 Na kutu Esauwi ne fuina piaru fo (40) mani, kia kamitung inontarai Heti mandu we ne wiwing, amani Yuditi, Beeri ne kamitungfoi tuti Basmati, Eloni ne kamitungfoi. 35 Wiwingfo suru unari Isaki tuti Ribkai unemirorong pirahai paria.