1 Na kutu etampia kai nanai, Yusupi demi ne mangfata mano wenunggamiei na ne munufoi deyo, "Woni inontarai ninisa ene karungwa na potang awao sayefang kariri eha wa, tuti ene doiwa woniai na mansiari-mansiari ne karung rorongwa. 2 Tuti woni nehu nofi peraki wai, na arikang mano fuifoi ne karungfoi tuti ne doi biai potang nayafo kontai." Ampefe mangfatafoi niari kariri fianai aino Yusupi medurai weifo. 3 Ahara mani, na kamiai kutung, inontarai fosa etawing Yusupi ne doroi fosa era tutu ene keledai fosara. 4 Wape arahio era to boriei weru bendari foi, wiro waroi kaharai mae, Yusupi medu we ne mangfatafoi deyo, "Moinenang bawi inontarai fosa, tuti masino wobusa mani, modu wesa boyo, ‘We fianie mebai ne bengfo na ne karira ne? 5 We fianie mehamanana nehu dai irufi wei nei ne nofi peraki we dunung tuti weaso nai nei? Menari karira paria.’ "

6 Na kutu Yusupi ne mangfata foi sobu eafo, medu wesa kariri fianai aino Yusupi dererai weifo nanai. 7 Eroa wei eteyo, "Fianai aino dai modurai we amea ninai? Amefafora we wiro amenari tonana kaha. 8 Dai mantaung wau boitawanai weo doi amesobuai na amene karung rorongne na kahofa Kanani fo, ametohong berahai we dai wau ampa. We fianie amehamanana emasi ete peraki na nemu dai ne munufoi? 9 Daie, wera na amene karungne, masino manei na amea andino kia nofi perakinei mani, wenani dino sobu aiboi mararehafo, tuti mano weine amea ambori amewewoming we dai wau."

10 Ainanaya Yusupi ne mangfatafoi medu wesa deyo, "Yo iroa we kaiwo memadurawa. Wape mandoni dino kia nofi perakinei mani, wenani dino ambori we woming we yaune, mae mano weine mea mani mera wa." 11 Mayeai esahera etu ene karungfo to kahofafo tuti mansiari-mansiari fiai ne karungfoi. 12 Tuti mangfatafoi sera sauarai na ene karungfo, na mano fubafoi paria sobu mano fuifoi, tuti sobu nofi perakifoi na Benyamini ne karung rorongfo. 13 Na kutu ne tafuaisa ewatioai nanafo, efosiabu ene ansungfo weo enemirorong fituaya fefe. Mayeai eruai ene karungfo to ene keledaifosa ayai tuti etaraberasa to bendarifoi aha.

14 Na kutu Yehudai tuti ne doroifosa era wa sobu Yusupi ne munufoi mani, Yusupi niayai na nanaifa. Ampefe etisangkapa eawemibuka esomiaweu euremi disangso kahofa wau, na Yusupi arongfo. 15 Yusupi medu wesa deyo, "We fianie menari toninaifa? Mewaitawangna kahae, weo inontaraio kariri yau nina mani wiro iwe aso kahae?" 16 Ainanaya Yehudai medu we Yusupi deyo, "Fianai aino ambori amemadurai tuti ameroa weai we dai waune? Tuti na fiani ambori ameteinawiai we amenari ne bengne? Allai deinawi amene sarawane ampa. Ampefe ninaia mani, amea tuti mano obu nofi peraki naifoi, amewewoming we dai wau." 17 Wape Yusupi yoa wesa deyo, "Bereri, wiro inari tonana kaha! Mandoni dino obu nofi perakifoi nai mani, wenani dino wewoming we yaune, wape mano weine mea mani, metarabera mea na mai we mene dai aha."

18 Etaramio Yusupi medufoa kai nanai, Yehudai da kefang Yusupia tuti medu wei deyo, "Daie! Yeyo imadu, roa we nemu mangfata ne yau, imadu kaiwo kuteai we dai wau. Tuti wiro kosou nemu mangfata ne yau fanai, weo dai wau mani nemu mambiriu toyario Firauni mantauni. 19 Dai wau butang nemu mangfata ne amea kawuru ampa, boyo, ‘Mene dai darang fo ne ete mene doroi siai maneie?’ 20 Tuti ameroa we dai wau, ameteyo, ‘Amene dai manei wepaituang ampa tuti ne kaisung fui manei, mano saubaunung na kutu dai wepaituangfo. Ne tafuai mireha ampa, mantauni dino darangne, uru mani une ai mansiari, nanai wedaya mani dai enewawuti paria.’ 21 Mayeai dai modu we nemu mangfata ne amea boyo, ‘Mehari we yau ma, ambori yetioi.’ 22 Wape ameroa we dai wau, ameteyo, ‘Kaisung foi wiro niayai waroi weru tamangna kaha, weo masino niayai waroi weru tamangna mani, tamanai ambori mireha ki.’

23 Mayeai dai modu we nemu mangfata ne amea, boyo, ‘Masino mene tahatui fuifoi wiro da ria mea ma kaha mani, wiro mewati urehune ahang kaha.’ 24 Na kutu ametarabera amea we nemu mangfatafoi, amene dai, ameteisaha kariri fianai aino dai modurai we ameane. 25 Ainanaya amene dai medu deyo, ‘Metarabera mea, mewori fiang kuteai we tata.’ 26 Wape ameroa wei, ameteyo, ‘Wiro amera to wana kaha. Masino amene tahatui fuinei da ria amea mani, arahio ambori amera to wanaifa. Weo wiro amewatio inontarai foi urengfo fanai, masino amene tahatui fuinei wiro da ria amea kahaifa.’ 27 Ainanaya amene dai, nemu mangfatafoi, medu we amea deyo, Mewaitawangnaifa weo nehu wiwingnei minohituti kaisung mandu we yau. 28 Mano fafongfoi da weru yau ampa, tuti imadu yeyo, tarai, andowa memuna miungni ampa, tuti paria sobu ninai wiro yetioi daraberahi kaha. 29 Masino kaisung nini mehari weru yau tuti sodai ne karirafo mani, mewedaya mano nuhu baibuane yau ambori ibiari to raimeri, weo isodai karira fefe."

30 Yehudai medu we Yusupi aha deyo, "Nemu mangfatafoi, amene dai manta darang, masino Benyamini darang. Masino kaisung nini wiro daraberahi ria amea we amene daia kaha mani, 31 taraie amene dai ambori mireha, weo deti kaisung nini kaha. Na tonanane amenari sarawaifa, weo amewedaya amene dai mano wepaitungfoi sobu dadirafo, donio biari to raimeri. 32 Wape nemu mangfata ne yau, yererai we amene dai kawurua ampa we yeitawangni. Imadu yeyo, ‘Masino ikari we dai ahang kaha mani, yauno iwesasari we dai wau we fitawafa.’ 33 Nanai wedaya mani yutang dai wau, maya mani, roa we nemu mangfata ne yau, inayai na ninai iwewoming we wau, iriwang kaisung nini daraberahi ria ne tafuaisa. 34 Weo todoni fino ametarabera amea we amene daia, masino kaisung nini wiro da ria amea kahai? Wiro nehu mambiriu feai we yeti fi karirao amene dai sodairafo kaha."