1 फिरी यहोवाए मीं सेइं ज़ोवं: 2 "तुस लोक इस्राएलेरे बारे मां ई कहावत ज़ोतथ, ‘खट्टी दाछ़ त दादे ते बाजीं खाई, पन दंत खट्टे मट्ठां केरे भोए।’ एसेरो कुन मतलबे? 3 प्रभु यहोवा एन ज़ोते कि मीं अपनि कसम, तुसन इस्राएले मां फिरी ऐह कहावत ज़ोनेरो मौको न मैल्हेलो। 4 हेरा, सेभी इन्सानां केरे प्राण त मेरे आन, ज़ेन्च़रे बाजेरो प्राण, तेन्च़रे मट्ठेरे प्राण; दूईये मेरे आन। एल्हेरेलेइ ज़ै प्राणी पाप केरेलो तैए मरेलो।

5 "ज़ै कोई धर्मी भोए, ते न्याय ते धार्मिकताई सेइं कम केरे, 6 ते पहाड़ां केरे पुज़ारी ठारन पुड़ रोट्टी न खाए ते इस्राएली केरे मूरती केरे पासे नज़र न दे, ते न बेखली कौन्शी कां जेवरो भोए, ते न तैस कौन्शी कां जेवरो भोए ज़ैस मासिक धर्म एवरो भोए, 7 ते न कोन्ची पुड़ ज़ुलम कियोरो भोए बल्के बन्धे रख्खोरी चीज़ कर्ज़ो देनेबाले वापस दित्तोरी भोए, ते न कोई लुटोरो भोए, बल्के नियन्ने रोट्टी दित्तोरी भोए, ते ज़रूरतमन्दे लिगड़ां दित्तोरां भोन, 8 ते न सूते पुड़ रुपेइयो दित्तोरो भोए, ते न रुपेइयां केरू सूत नियोरू भोए, ते अपनो हथ बुरे कम्मे करां रोकोरो भोए, ते मैन्हन मां सच़्च़ैई सेइं न्याय कियोरो भोए, 9 ते मेरे विधन पुड़ च़लतो भोए, ते मेरो कानून मेनतां कम कियोरू भोए, एरहो मैन्हु धर्मीए, तै ज़रूर ज़ींतो रालो, प्रभु यहोवा एन ज़ोते।

10 "पन अगर तैसेरू मट्ठू डैकू, या कातली या ज़ैन पापां केरो ज़िक्र बा कियोरोए तैस मरां कोन्ची केरतो भोए, 11 या बा ज़ैन रोड़े कम्मां केरो ज़िक्र आहे, तैन केरो केरनेबालो न भोए, ते पहाड़ां केरे मूरतन कां च़ाढ़ोरू खातो भोए, या पड़ोसेरी कौन्शी सेइं कुकर्म कियोरो भोए, 12 या गरीब गुरबे पुड़ ज़ुलम कियोरो भोए, ते होरे लोक भी लुटोरे भोन, या बन्धे रख्खोरी चीज़ वापस न दित्तोरी भोए, ते मूरती केरि पूज़ा कियोरी भोए, ते भिट्टां कम्मां कियोरां भोन, 13 सूते पुड़ रुपेइये दित्तोरे भोन, ते सूत नियोरू भोए, त कुन तै ज़ींतो रालो? तै ज़ींतो न रालो; एल्हेरेलेइ कि तैनी सब भिट्टां कम्मां कियोरन तै पक्‍को मरेलो, ते तै एपनी मौतरो एप्पु ज़िमेवार भोल्हो।

14 "फिरी अगर एरे मैन्हेरू मट्ठू भोए, ते तै अपने बाजी केरां एना सब पापेरां कम्मां हेरतां डरेरे मारे तैसेरां ज़ेरां कम्मां न केरतो भोए। 15 मतलब पहाड़न पुड़ मूरतन कां च़ाढ़ोरी रोट्टी न खेवरी भोए, ते न इस्राएली लोकां केरि मूरती केरि पूज़ा कियोरी भोए, ते न केन्चेरे कौन्शी सेइं कुकर्म कियोरोए भोए, 16 ते न कोन्ची पुड़ ज़ुलम कियोरो भोए, ते न कोई चीज़ बन्धे रख्खोरी भोए, ते न कोई लुटोरो भोए, बल्के अपनि रोट्टी नियन्ने मैन्हु दित्तोरी भोए, ते ज़रूरतमन्दे लिगड़ां दित्तोरां भोन, 17 ते गरीब मैन्हेरो नुकसान केरने करां हथ रोकोरो भोए, ब्याज़ ते सूत न नियोरू भोए, ते मेरे नियम मन्नोरे भोन, ते मेरे विधन पुड़ च़लतो भोए, तै अपने बाजी केरे अधर्मेरे वजाई सेइं न मरेलो, बल्के ज़ींतो रालो। 18 तैसेरो बाजी, ज़ैनी ज़ुलम कियो ते लूट-पाट कियोरी भोए, ते अपने लोकन मां बुरू कम कियोरू भोए, तैए अपने अधर्मेरे कम्मेरे वजाई सेइं मेरि गालो। 19 फिरी भी तुस लोक ज़ोतथ, किजो? कुन मट्ठू अपने बाजेरे अधर्मेरो भारो न छ़ूए? ज़ैखन मट्ठे न्याय ते धार्मिकतारां कम्मां कियोरां भोन, ते मेरे विधि मेन्नोरी भोन तैन पुड़ च़लोरो भोए, त तै ज़ींतो रालो। 20 ज़ै मैन्हु पाप केरेलो तैए मरेलो, न त मट्ठू अपने बाजेरे अधर्मेरो भारो छ़ूएलू, ते न बाजी मट्ठेरी; धार्मिकतारो फल मैल्हेलो, ते दुष्टे अपने दुष्टेरो फल मैल्हेलो।✝ 21 पन अगर दुष्ट मैन्हु अपने सेभी पापन करां फिरतां, मेरी सब विधि मन्ने ते न्याय ते धार्मिकतारां कम्मां केरे, त तै न मरेलो; बल्के ज़ींतो रालो। 22 तैनी ज़ेत्रे पाप कियोरे भोन, तैन मरां केन्चेरी याद तैसेरे खलाफ न कि गाली; ज़ैना धार्मिकतारां कम्मां तैनी कियोरां भोन, तैन केरे वजाई सेइं तै ज़ींतो रालो। 23 प्रभु यहोवा एन ज़ोते, कुन अवं दुष्टेरे मरने सेइं खुशी भोताईं? कुन अवं इस गल्‍ली सेइं खुशी न भोईं कि तै एपनी बुरी बत्ती करां फिरतां ज़ींतो राए?✝ 24 पन ज़ैखन अक धर्मी धार्मिकतारां कम्मां शैरतां बुरां कम्मां केरे, बल्के सब दुष्टेरे बुरे कम्मां केरे मुताबिक केरे, त कुन तै ज़ींतो रालो? ज़ेत्रां धार्मिकतारां कम्मां तैनी कियोरां भोन, तैन मरां कोई याद न कियूं गालू। ज़ै धोखेबाज़ी ते पाप तैनी कियोरी भोए, तैसेरे वजाई सेइं तै मरेलो।

25 "फिरी भी तुस लोक ज़ोतथ, प्रभु यहोवारी बत अक्‍कां ज़ेरि नईं। हे इस्राएली लोकव, हेरा, कुन मेरी बत अक्‍कां ज़ेरि नईं? कुन तुश्शी बत बुरी नईं? 26 ज़ैखन धर्मी एपनी धार्मिकताई करां फिरतां बुरां कम्मां केरने लगे, त तै तैन केरि वजाई सेइं मरेलो, मतलब तै अपने बुरे कम्मां केरि वजाई सेइं मरेलो। 27 फिरी अगर दुष्ट अपने दुष्ट कम्मन करां फिरतां, न्याय ते धार्मिकतारां कम्मां केरने लगे, त तै अपनि जान बच़ालो। 28 तै ज़ै सोच विचार केरतां अपने सेभी पापन करां फिरे, एल्हेरेलेइ तै न मरेलो, बल्के ज़ींतो रालो। 29 फिरी भी इस्राएली लोक ज़ोतन कि प्रभु यहोवारी बत अक्‍कां ज़ेरि नईं। हे इस्राएली लोकव, कुन मेरी बत अक्‍कां ज़ेरि नईं, ते कुन तुश्शी बत बुरी नईं?

30 "प्रभु यहोवा एन ज़ोते, हे इस्राएलेरे घराना, अवं तुसन मरां हर एक्‍की मैन्हेरो न्याय तैसेरे कम्मां केरे मुताबिक केरेलो। पसताथ, ते अपने सब पाप शारा, फिरी तुश्शो अधर्म तुश्शी ठोकरारी वजाह न बनेली। 31 अपने सब पाप ज़ैना तुसेईं कियोरेन, तैना दूर केरा, अपनि आत्मा ते अपनो मन बदला! हे इस्राएलेरे घराना, तुसां किजो मरथ? 32 किजोकि, प्रभु यहोवा एन ज़ोते, ज़ै मरे, तैसेरे मरने सेइं अवं खुशी न भोईं, एल्हेरेलेइ पसताथ, तैखन तुस ज़ींते राले।"