4 ते यहोवा तैस सेइं ज़ोवं, "इस यरूशलेम नगरेरे अन्तर इरां-उरां गेइतां मैन्हु तैना सब भिट्टे कम्मां केरे वजाई सेइं ज़ैना तैस मां कियां गातन, ओशा छ़डतन ते दुखे सेइं चिन्डां मारतन, तैन केरे कुपान पुड़ निशान ला।" 5 तैखन तैने मेरे शुन्ते बारे होरन सेइं ज़ोवं, "नगरे मां तैन पत्पती च़ेलतां तैन मारते गाथ; कोन्ची पुड़ दया न केरथ ते न नेरमी सेइं कम केरथ। 6 बुढे, जुवान, कुइयां, बाल बच्‍चे, कौन्शां, सब मैरतां नाश केरा, पन ज़ैस कोन्ची मैन्हेरे कुपाए पुड़ निशान भोए, तैसेरे नेड़े न गेइयथ। ते मेरे पवित्र ठैरी मरां शुरू केरा।" ते तैनेईं तैन बुज़ुर्गन करां शुरू कियूं ज़ैना भवनेरे सामने थिये।