1 यहोवा ज़ोते, "हे धार्मिकताई पुड़ च़लने बालाव, हे यहोवारे तोप्पने बालाव, ध्याने सेइं मेरी गल्‍लां शुना; ज़ैस चट्टानी मरां तुसां घड़े जे ते ज़ैस खानी मरां तुसां कढोरे थिये, तैस पुड़ ध्यान देथ। 2 अपने पूर्वज अब्राहमे पुड़ ते तैसेरी कौन्श सारा पुड़ खियाल केरा; ज़ैखन तै अकैल्‍लो थियो, तैखने करां मीं तै कुजव ते बरकत दित्ती ते तैसेरू खानदान बधव। 3 यहोवा सिय्योने शान्ति दित्तोरीए, तै तैसेरे सुनसान ठैरन अदनेरे ज़ेरे ते तैसेरे गैर आबाद मुल्खे यहोवारे बागरो ज़ेरो बनालो; तैस मां खुशी ते आनन्द ते शुक्र ते भजन ज़ोनेरी आवाज़ शुनोली।

4 "हे मेरी प्रजारे लोकव, मेरे पासे ध्यान देथ; हे मेरे लोकव, कन लेइतां मेरी गल्‍लां शुना; किजोकि मेरी तरफां कानून दित्तो गालो, ते अवं अपनो नियम मुल्खे-मुल्खेरे लोकां केरि लौ भोनेरे लेई मज़बूत केरेलो। 5 मेरो छुटकारो नेड़े; मेरी मुक्ति बांदी भोवरीए; अवं अपनि शेक्ति सेइं मुल्खे-मुल्खेरे लोकां केरो न्याय केरेलो। जज़ीरे मेरो इंतज़ार केरेले ते मेरी शेक्ति पुड़ उमीद रखेले। 6 अम्बरेरे पासे तक्‍का, ते धेरती पुड़ नज़र देथ; किजोकि अम्बर तूएरू ज़ेरू गाईब भोइ गालू, धरती कपड़ेरी ज़ेरि पुरानी भोइ गाली, ते तैस पुड़ रानेबाले एन्च़रे मरेले; पन ज़ैन लोकन अवं छुटकारो देइलो तैना हमेशा ज़ींते राले, ते मेरी धार्मिकतारो अन्त न भोल्हो।

7 "हे धार्मिकतारे ज़ान्ने बालाव, ज़ैन केरे मने मां मेरो कानूने, तुसां ध्याने सेइं मेरी गल्‍लां शुना; मैन्हु केरि बदनैमी करां न डरा, ते न तैन केरे निन्दा केरने सेइं परेशान भोइयथ। 8 किजोकि ज़ैखन तैना विरोधी मरेले तैखन तैन केरि लाशी खर तैन कपड़ेरे ज़ेरे ते कीड़ो तैन उन्ना केरो ज़ेरो खेइ गालो; पन मेरी धार्मिकता हमेशा तगर राली, ते मेरो छुटकारो पीढ़ी-पीढ़ी तगर बनोरो रालो।"

9 हे यहोवा खड़ो भो ते मेरी मद्दत केर; अपनि शक्ति इस्तेमाल केर, ज़ेन्च़रे पुराने ज़माने मां ते बीतोरे पीढ़न मां, तेन्च़रे हुन्ना भी बींझ़। कुन तू तैए नईं ज़ैनी रहबेरे टुक्ड़े-टुक्ड़े किये, ते ज़ैनी अजगर भी च़िरतां छ़डो। 10 कुन तू तैए नईं ज़ैनी डुग्घे समुन्दरेरू पानी शुकेइतां छ़डू ते तैसेरे डुग्घारे मां अपने छुटेवरे लोकां केरे लेई बत बनाई? 11 एल्हेरेलेइ यहोवारे छुटेवरे लोक वापस एइतां सिय्योने मां जयजयकार केरेले, ते तैन केरे दोग्गे पुड़ हमेशारी खुशी गूंजती राली; तैन आनन्द ते खुशी मैल्हेली, ते दुख ते ओशा बन्द भोइ गाले।

12 यहोवा ज़ोते, "अवं, हाँ अव्वें तीं शान्ति देने बालोईं; तू कौनस ज़ै मरने बाले मैन्हु सेइं ते घासेरे ज़ेरे शुकने बाले मैन्हु करां डरतस। 13 ते अम्बरे फैलाने बाले ते धेरतरी मुनीयाद रखनेबाले अपने बनानेबालो यहोवा बिसरी छ़डोरोए, ते ज़ैखन बगावत केरनेबालो नाश केरने जो तियार भोते तैखन तैसेरे क्रोधे सेइं पूरे दिहैड़ी लगातार थरकते? पन बगावत केरनेबालेरो क्रोध कोड़ि राव? 14 कैदी लूशी आज़ाद कियो गालो; तै तैड़ी न मरेलो ते न रोट्टरी कमी भोल्ही। 15 ज़ै समुन्दरे उलट-पलट केरते ज़ैस सेइं तैसेरी छ़ेलहन मां गरज़न भोतीए, तै अव्वें तेरो परमेशर यहोवा आईं मेरू नवं सेना केरो यहोवाए। 16 मीं तेरे ऐशी मां अपने वचन छ़डे, ते अपने हथ्थे हैठ छ़ुपेइतां तेरी रक्षा की; कि अवं अम्बरे फैलेईं ते धेरतरी मुनीयाद रेखी, ते सिय्योने सेइं ज़ोइ, ‘तुसां मेरे लोकथ।’"✝

17 हे यरूशलेम बींझ़! खड़े उठ! खड़ी भोइ गा, तीं यहोवारे हथ्थे मरां तैसेरे क्रोधेरे कुटोरे मरां थरकानेबालो पियालो पूरो-पूरो पीयो। 18 ज़ेत्रे मट्ठेईं तैस करां ज़र्म घिन्नू, तैन मरां कोई न राव ज़ै तैसारी अगवाई केरतां च़ले, ते ज़ेत्रां मट्ठां तैसां पालां तैन मरां कोई न राव ज़ै तैसेरो हथ ठम्मे। 19 एना दूई मुसीबतां तीं पुड़ एवरिन, कौन तीं सेइं साथी मातम केरेलो? उज़ाड़ ते नाश, ते काल ते तलवार तीं पुड़ एवरीए; कौन तीं तसल्‍ली देलो? 20 तेरां मट्ठां बेहोश भोइतां हर एक्‍की बत्तरे ड्लेखी महाजाले मां हिरनेरे ज़ेरे फसोरेन; तैना यहोवारे क्रोधे सेइं ते तेरे परमेशरेरी धेमकी सेइं रेई जेवरेन।

21 एस वजाई सेइं हे दुखी नगरी* तू शुन, तू मतवाली त आस, पन दाछ़रो रस पीतां नईं; 22 तेरो प्रभु यहोवा ज़ै अपने लोकां केरो मुकदमो लड़नेबालो तेरो परमेशरे, तै एन ज़ोते, "शुन, अवं थरकाने बाले कुटोरे मतलब अपने सरकरे कुटोरे तेरे हथ्थे मरां नेइलो; तीं फिरी तैस मरां कधी न पीनू पेलू। 23 ते तैस तेरे दुख देनेबालां केरे हथ्थे मां देइलो, ज़ैनेईं तीं सेइं ज़ोवं, ‘लेटी गा, ते असां तीं पुड़ पव रेखतां अग्रोवं च़लम;’ ते तीं उलटे तुत्तरे उन्ढे लिकतां अपनि पिठ ज़मीनरी अग्रोवं च़लनेरी बत बनेइतां छ़डी।"