1 यहोवा ज़ोते, एज्जा सब ट्लिशोरो लोकव, पैनी कां एज्जा; ते ज़ैन कां रुपेइये नईं तुस भी एइतां घिन्ना ते खाथ! दाछ़रो रस ते दुद्ध मुफते मां एइतां घिन्ना।✝ 2 ज़ै खानेरी चीज़ नईं, तैसेरे लेई तुस किजो रुपेइये लातथ, ते ज़ैस सेइं पेट न भेरोए तैसेरे लेई किजो मेहनत केरतथ? ते मन लेइतां मेरी शुना, तैखन रोड़ी चीज़ां खाएले ते चिकनी-चिकनी चीज़ां खेइतां रज़्ज़ेले। 3 हे मेरे लोकव ध्यान देथ, ते मीं कां एज्जा; ते शुना तैखन तुस ज़ींते राले; ते अवं तुसन सेइं हमेशारो करार केरेलो, मतलब दाऊदे पुड़ अटल दयारो करार।✝ 4 शुना, मीं तै* रियासतां-रियासतां केरे लोकां केरे लेई अक शहादत ते प्रधान ते हुक्म देनेबालो ठहरावरोए।✝ 5 शुन, तू एरी कौमी ज़ैस तू न ज़ानस तैन कुजालो, ते एरी कौमां ज़ैना तीं न ज़ानन तीं कां दौड़ती एज्जेली, तैना तेरे परमेशर यहोवा ते इस्राएलेरे पवित्रेरी खातर इन केरेली, किजोकि तैने तीं शान-ओ-शोकत दित्तोरीए।

6 ज़ांतगर यहोवा मैल्ही सखते त तैसेरी तलाशी मां राथ; ते ज़ांतगर तै नेड़े आहे तैस पुकारा।