बरतेरे नियम
1 यहोवा ज़ोते, "ज़ोरे सेइं चिन्डां मार, ते किछ भी पत्रोवं न रख, नरशिंगेरी ज़ेरि आवाज़ उच्ची केर; मेरी प्रजा तैसेरो पाप मतलब याकूबेरे घराने तैसेरो पाप हिरा। 2 ज़ैना रोज़ मेरी आराधना केरतन ते मेरी बत ज़ान्नेरे लेई एरी इच्छा केरतन ज़ेन्च़रे तैना धर्मी लोकन, ते ज़ैनेईं अपने परमेशरेरे हुक्म मन्नोरे भोन, ते ज़ैना धर्मेरे नियम पुछ़तन ते परमेशरेरे नेड़े एजने सेइं खुश भोतन। 3 तैना लोक ज़ोतन, ‘कुन वजाए कि असेईं बरत रख्खू, पन तीं तैसेरी खबर न नेइ? असेईं दुख झ़ैल्लो, पन तीं किछ ध्यान न दित्तू?’ शुना, बरतेरे दिहाड़े तुस अपनि इच्छा पूरी केरतथ ते अपने सेवकन करां मुश्किल कम्मां करातथ। 4 शुना तुश्शे बरतेरो फल ई भोते कि तुस एप्पु मांमेइं लड़तथ ते बुरैई सेइं धक्के मारतथ। ज़ेन्च़रे बरत तुस अज़ काल केरतथ, तैस सेइं तुश्शी प्राथना सुर्गे तगर न पुज़्ज़े। 5 ज़ैस बरते अवं पसंद केरताईं, मतलब ज़ैस मां मैन्हु अपनो आप दीन केरे, कुन तुस इस तरीके सेइं केरतथ? कुन क्रोड़ी झाऊ एरी ज़ेरि झुकानी, एप्पु हैठ टाट बिछ़ानू, ते मांज़न खिलारनी तुस बरत ते यहोवा खुश केरनेरी दिहाड़ी ज़ोतथ?
6 "ज़ैस बरते सेइं अवं खुशी भोताईं, तैन कुन इन नईं, कि अन्याय सेइं दबोरे दास, ते ज़ुलमेरू जुऊं ट्लोड़तां तैन छुटाथ, ते सब जुआं केरे टुक्ड़े-टुक्ड़े केरथ?58:6 लूक. 4:18-19;कह. 21:3;याक. 1:27. 7 कुन तैन इन नईं कि अपनि रोट्टी नियन्ने बेंटतां देथ, अनाथ ते मारे-मारे फिरने बाले लोकन अपने घरे आनथ; ज़ैस कोन्ची तुसां नग्गे लाथ त तैस लिगड़ां देथ; ते एपनी कौमरे ढ्लान करां अपनो आप न छ़ुपाथ?58:7 इब्रा. 13:2-3;कह. 25:21;28:27;मत. 25:35-36. 8 अगर तू एन्च़रे केरेले, तैखन तेरी लौ झ़ेझ़ेरे ज़ेरि चमकेली, ते तू लूशी भेझ़ोलो; तेरी धार्मिकता तीं अग्री-अग्री च़लेली, यहोवारी महिमा तीं पत्ती रक्षा केरतां च़लेली।58:8 भज. 37:6;यिर्म. 33:6;लूक. 1:78-79. 9 तैखन तू पुकारेलो ते यहोवा जुवाब देलो, तू फरियाद केरेलो ते तै ज़ोलो, ‘अवं इड़ी आईं,’ अगर तू ज़ुलम केरनो ते होरन पुड़ अंगलोइ खड़ी केरनी छ़ेडी देस, ते दुष्ट गल्लां ज़ोने करां बाज़ एजस, 10 अगर तू नियन्नेरी दिल खोलतां मद्दत केरस, ते ज़रूरतमन्दां केरि ज़रूरतां पूरी केरस, तैखन आंधरे मां तेरी लौ चमकेली, ते तेरू बड़ू आंधरू दुपहरां केरू ज़ेरू चमकेलू। 11 यहोवा तीं लगातार च़लातो रालो, ते कालेरे वक्त तीं रज़ानेलो ते तेरी हेड्डी तरो ताज़ा केरेलो; ते तू सेगोरी बागी ते एरे नागेरो ज़ेरो भोल्हो ज़ेसेरू पानी कधी न शुक्के। 12 तेरे लोक खानदानेरे लोक बड़े च़िरेरे उज़डोरे ठारन फिरी बसाले, तू पीढ़ी-पीढ़ी केरि पेवरी बुनियादी पुड़ घर बनालो; तेरू नवं ट्लुटोरे बाड़ेरू बनानेबालो ते बत्तां केरो ठीक केरनेबालो पेलू।"
थैकरी दिहाड़ी मन्नी
13 "अगर तू आरामेरे दिहाड़े अशुद्ध न केरस मतलब मेरे तैस पवित्र दिहाड़े मां अपनि इच्छा पूरी केरनेरी कोशिश न केर, ते आरामेरे दिहाड़े आनन्देरी दिहाड़ी ते यहोवारी पवित्र दिहाड़ी सेमझ़तां मन्नस; अगर तू तैसेरी आदर केरतां तैस दिहाड़े अपने बत्तां न च़लस, अपनि मर्ज़ी पूरी न केरस, ते एपनी गल्लां न ज़ोस, 14 त तू यहोवारे वजाई सेइं खुश भोल्हो, ते अवं तीं मुल्खेरे उच्ची ठारन पुड़ च़लेइलो; ते तेरे पूर्वज याकूबेरे हिस्से मरां फसल तीं खुवेइलो, किजोकि यहोवा एन ज़ोवरूए।"