शैन्तरे राजकुमारेरू ज़र्म
1 फिरी भी मुसीबती सेइं भेरतां अंधकार च़लो गालो। पेइलू त तैनी जबूलून ते नप्ताली प्रदेशां केरू अपमान कियूं, पन आखरी दिहाड़न मां भूमध्य सागरेरे पासे यरदन दरियारे पारेरे गैर कौमां केरे गलीले महिमा देलो।
2 ज़ैना लोक आंधरे मां च़ेलि राहोरे थिये तैनेईं बड़ो ट्लेकड़ार लाव; ते ज़ैना लोक बड़े आंधरे सेइं भरोरे मौतरे मुल्खे मां रहते थिये, तैन पुड़ बड़ी लौ चमकी।9:2 मत. 4:15;लूक. 1:79. 3 हे इश्शे यहोवा तीं इस्राएली कौम बधाई, तीं तैस बड़ो आनन्द दित्तो; तैना तेरे सामने फसल कटनेरो ज़ेरो आनन्द मनातन, तैना एत्रे खुश भोतन ज़ेन्च़रे लोक लूटरो माल बंटते वक्ते खुश भोतन। 4 किजोकि तीं तैसेरे मेट्टू पुड़ां भारी जुऊं ते तैसेरे कंधे पुड़ लट्ठ, ते तैस पुड़ ज़ुलम केरनेबालो डण्डो, इन सब तीं एन्च़रे ट्लोड़ू ज़ेन्च़रे बड़े पेइले मिद्यानी केरे दिहाड़न मां कियोरू थियूं। 5 किजोकि जंगी मां लड़नेबाले सिपाही केरे बूट ते खूने सेइं भरोरां लिगड़ां सब अग्गी मां फुकोई गालां। 6 किजोकि इश्शे लेई अक मट्ठू पैदा भोल्हु, असन अक मट्ठू दित्तू गालू; ते राज़ तैसेरे कंधे पुड़ भोल्हु, ते तैसेरू नवं अद्भुत सलाहकार, सामर्थी परमेशर, हमेशारो बाजी, ते शैन्तरो राजकुमार रख्खू गालू।