1 ጎዳ ጋላቲቴ፤

ኢዛ ሱን ጼይጊቴ፤

ኢዚ ኦዳ ኦሶታ

ካዎቴታ ኤሪሲቴ።

2 ኢዛስ ጊንጾ ጊግሲቴ፤

ጋላታ ዬካ ዬጺቴ፤

ማላሊሲዛ ኢዛ ኦሶ ኡባ ዮቲቴ።

3 ጌሻ ሱንን

ኢዛይሳን ጬቄቲቴ፤

ጎዳ ኮይዛይታ

ዎዚናይ ኡፋዬቶ።

4 ጎዳኔ ኢዛ ዎልቃ ጾሞሲቴ፤

ኡባቶ ኢዛ ሲን ኮዪቴ።

5,6 ኢንቴኖ ኢዛ ኣይሌ

ኣብራሃሜ ዜሬቶ!

ዶሬቲዳ ያቆቤ ናይቶ!

ኢዚ ኦዳ ማላሊሲዛ ኦሶታ፥

ኢዛ ማላታኔ ኢዚ ፒርዲዳ

ፒርዳ ኣኬኪቴ።

7 ኢዚ ጎዳ ኑ ጾሳ፤

ኢዛ ሱሬ ፒርዳይካ

ሳኣ ኡባ ቦላ ዴስ።

8 ኢዚ ባ ጫቆ ቃላ ሜርናስ

ባ ኣዛዚዳ ቃላ ሺ ዬሌታ

ጋካናስ ናጌስ።

9 ኢዚ ኣብራሃሜስ ጫቂዳ

ጫቆ ቃላ፥

ዪሳቃስ ኢሚዳ

ቃላ ባሌና።✝105፡9 ሜ 12፡7፤ 17፡8፤ 26፡3

10 ሄሳ ያቆቤስ ዎጋ፥

ኢስራኤሌሲካ

ሜርና ጫቆ ቃላ

ሂስቲዲ ሚን ኤሲዴስ።✝105፡10-11 ሜ 28፡13

11 ቃሴካ፥ «ኔስ ካናኔ

ቢታ ኢማና፤

ኢዚካ ኔ ዜሬታስ

ላታ ጊዳና» ጊዴስ።

12 ኢስቲ ቆዳን ቂ ጉታኔ

ካናኔ ቢታን

ቤቴ ጊዲዲ ዲዛ ዎዴ፥

13 ኢሲ ዴሬፔ ሃራ ዴሬ፥

ኢሲ ካዎቴፌ

ሃራ ካዎቴ ዩዪዳ።

14 ጾሲ ኢስታ ኦኒካ ቆሃናስ

ኢሚቤና፤

ኢስታ ጊሻስ ካዎታ ሴሪሼ፥

15 «ታኒ ቲይዳይታ ቦቾፍቴ፤

ናቤታ ቆሆፒቴ» ጊዴስ።✝105፡14-15 ሜ 20፡3-7

16 ጎዳይ ቢታ ቦላ

ኮሻ ዬዲዴስ።

ኢስታ ካ ኡባ ይሲዴስ።✝105፡16 ሜ 41፡53-57

17 ጊዶ ኣቲን ኢዚ ባ ኣሳ ኣሻናስ

ኢስታፌ ሲንን ኣይሌቴስ

ባይዜቲዳ ዮሴፌ ኪቲዴስ።✝105፡17 ሜ 28፤ 45፡5

18 ኢዛ ቶሆቲ ካቴናን ዋጼቲዳ፤

ኢዚ ሳንሳላታን ቃሼቲዴስ።

19 ኢዚ ካሴ ዮቲዳይሲ

ፖሌታና ጋካናስ

ጎዳ ቃላይ ኢዛ ፓጪዴስ።✝105፡18-19 ሜ 39፡20—40፡23

20 ካዎይ ኣስ ኪቲዲ

ኢዛ ቢርሺሲዴስ፤

ዴራ ሃሪዛይሲ

ቃሾ ኬፌ ኬሲዴስ።✝105፡20 ሜ 41፡14

21 ካዎዚ ኢዛ ባ ኬስ

ጎዳ ኦዴስ፤

ባስ ዲዛ ኡባ

ኣቆታ ቦላ ሹሚዴስ።✝105፡21 ሜ 41፡39-41

22 ሄሲካ ሹሜታ

ማራራ ካሌና ማላኔ

ጊታ ኣሳታ ኣ ኤራቴ

ታማርሳና ማላ ሱንዴስ።

23 ሄሳፌ ጉዬ ኢስራኤሌይ

ጊብጼ ጌሊዴስ፤

ያቆቤይ ካሜ ቢታን

ቤቴ ኣስ ጊዲዲ ዴኢዴስ።✝105፡23 ሜ 46፡6፤ 47፡11

24 ጎዳይ ባ ኣሳ ኬሂ ጮራሲዴስ፤

ኢስታ ሞርኬታፔ

ኢስታ ኣ ሚንዴስ።

25 ኢዚ ጊብጼ ኣሳይ

ባ ኣሳ ኢጻና ማላኔ

ባ ኣይሌታ ቦላ

ዴንዳና ማላ ኦዴስ።✝105፡24-25 ኬሳ 1፡7-14

26 ሄሳፌ ጉዬ ባ ኣይሌ ሙሴኔ

ባ ዶሪዳ ኣሮኔ

ኢስታኮ ኪቲዴስ።✝105፡26 ኬሳ 3፡1—4፡17

27 ኢስቲ ጊብጼ ኣሳታ ሲንን

ጾሳ ማላታ፥

ካሜ ቢታን

ማላሊሲዛ ሚሽ ኦዳ።

28 ጎዳይ ማ ኪቲዲ

ሄ ቢታ ሚሲዴስ፤

ጊዶ ኣቲን ጊብጼ ኣሳቲ

ኢዛ ኣዛዞ ኢጺስ ጊዳ።✝105፡28 ኬሳ 10፡21-23

29 ኢስታ ሃ ሱን ላሚዲ

ሞሌታ ዎዴስ።✝105፡29 ኬሳ 7፡17-21

30 ኢስታ ቢታ ኡባ

ካዎዛ ኬካ

ሾይ ኩሚዴስ።✝105፡30 ኬሳ 8፡1-6

31 ኢዚ ኣዛዚን ቦጼይኔ ኡኤይ

ኢስታ ቢታ ኡባ ቦላ

ሾምኡሾምኢዴስ።✝105፡31 ኬሳ 8፡16-17፥20-24

32 ኢስታ ቢታ ቦላን ኢራ ጊሻስ

ሻች ዎልቃንራ

ቡኪሲዴስ።

33 ኢዚ ኢስታ ዎይኔ ቱራኔ

ባላሴ ሚ ኡባ ዲፒ ሂስቲዴስ፤

ኢስታ ቢታን ዴኢዛ ሚታካ

ሜንሬዴስ።✝105፡32-33 ኬሳ 9፡22-25

34 ኢዚ ኣዛዚን ቦሌይኔ

ቆዳይ ባይንዳ

ጉምባሮይ ኬዚዴስ።

35 ሂስቲዲ ኢስታ ጋዴን

ሞኪዳ ካ ኡባ ሚዴስ፤

ኢስታ ቢታን ዲዛ ጪሊላ ሚሽ

ኡባካ ዲፒ ሂስቲዴስ።✝105፡34-35 ኬሳ 10፡12-15

36 ጎዳይ ጊብጼ ዴሬን

ባይራታ ኡባ ዎዴስ፤

ኮይሮ ዬሌቲዳ ናይታ

ኡባካ ይሲዴስ።✝105፡36 ኬሳ 12፡29

37 ሄሳፌ ጉዬ ኢዚ ኢስራኤሌ ኣሳ

ዎርቃኔ ቢራ ኣሌቆራ ኬሲዴስ፤

ኢስታ ጊዶፌ

ኩንዲዲ ኣቲዳይ ኦኒኔ ባዋ።

38 ጊብጼ ኣሳቲ ኢስታስ

ዳሮ ያዪዳ ጊሻስ

ኢስቲ ኬዚ ቢሺን ኡፋዬቲዳ።✝105፡37-38 ኬሳ 12፡33-36

39 ጾሳይ ኢስታ ካማናስ

ሻራ ሚጪዴስ፤

ኦማርስ ኢስታስ ፖኢሳናዉ

ታማ ጊግሲዴስ።✝105፡39 ኬሳ 13፡21-22

40 ኢስቲ ሚዛ ሚሽ ኦይቺን

ኩራቾ ሚሳቲዛ ካፎታ

ኢስታስ ዬዲዴስ፤

ኢስታ ሳሎ ቁማ ካሊሲዴስ።✝105፡40 ኬሳ 16፡2-15

41 ኢዚ ዛላ ጳልቂን ሃ ፑልቲዴስ፤

ሻፋ ማላካ ዱጌ ባዞ ጎጊዴስ።✝105፡41 ኬሳ 17፡1-7፤ ታይ 20፡2-13

42 ኢዚ ባ ኣይሌ ኣብራሃሜስ

ጫቂዳ ጌሻ ቃላ

ሃሳኢዴስ።

43 ኢዚ ባ ኣሳ ኡፋይሳን፥

ባ ዶሪዳይታ ኢሊሊሳን ኬሲዴስ።

44 ኢዚ ኢስታስ ሃራ ካዎቴታ

ቢታ ኢሚዴስ፤

ሂስቲን ኢስቲ ሃራቲ

ዳቡሪ ኬሲዳ ካ

ኣይፌ ላቲዳ።✝105፡44 ኢያ 11፡16-23

45 ሄሳ ኢዚ ኦዳይ

ኢስቲ ኢዚ ዎዳ

ማራ ናጋናሳ፤

ኢዛ ዎጋካ ፖላናሳ።

ጎዳ ጋላቲቴ!