1 ኣቤት ጎዳዉ!

ታ ጺሎቴን ማጋኒዛ

ማጋና ሲያ፤

ታ ዋሶዛ ኤዝጋ፤

ጪሞይ ባይንዳ ዎሲዛ ዎሳስ

ዛሮ ኢማ።

2 ታስ ጺሎቴ ኔፔ ዮ፤

ቱማ ኔ ኣይፌይ ጼሎ።

3 ኔኒ ቃማን ታና ጾሞሳዳሳ፤

ታ ዎዚና ፓጫዳሳ፤

ኔ ፓጪዳ ጊዲኮካ

ታ ቦላ ኣይኮካ ዴማቤካ።

ታ ኢንጻርሳይ ኢታ ሃሳይቤና።

4 ታኒ ሃራ ኣሳ ማላ

ኢታ ቃላ ሃሳይኬ፤

ታኒ ኔ ኣዛዞ ናጊዛ ጊሻስ

ጌኔ ኦጌ ካላቤኬ።

5 ታ ቶሆቲ ኔ ኦጌፔ

ሃንዳሪሾንታ ማላ

ታ ታንጎይ ኔ ኦጌፔ

ካሬ ኬዚቤና።

6 ኣቤት ጾሳዉ! ታኒ ዎሲን

ኔኒ ሲዪዛ ጊሻስ

ታኒ ኔና ዎሳይስ፤

ኔ ሃይ ታኮ ዛራዳ፥

ታኒ ኔስ ዮቲዛይሳ ሲያ።

7 ባንታ ሞርኬታፔ ባቃቲዛይታ

ኔ ኡሻቻ ኩሼዛን

ቆታዳ ኣሺዛይሶ!

ኔ ኪያቴ ማላሊሲዛ

ኦጌራ ቆንጪሳ።

8 ኔ ኣይፌ ጪሮ ማላ ታና ናጋ፤

ኔ ቄፌታ ጊዶን ታና ቆታ።

9 ኡንኤዛ ኢታታፔኔ

ዶዲ ኡቲዳ ዎልቃማ

ሞርኬታ ኩሼፔ

ኔ ታና ኣሻ።

10 ኢስታስ ቃቲዛ ዎዚናይ ባዋ፤

ኦቶሮ ሃሳያ ሃሳዬቴስ።

11 ታኒ ቢዛሶ ኡባን

ኢስቲ ታና ዶዴቴስ፤

ታና ዱጌ ቢታን ኩንዲስ

ዬጋናስ ዴሬቄቴስ።

12 ኢስቲ ባንታስ ሚዛ ሚሽ

ኮይዛ ጋሞ ማላ፤

ዎይኮ ጌማን ዛማዲ ናጊዛ

ዎዳላ ጋሞ ማላ።

13 ኣቤት ጎዳዉ! ዴንዳ።

ታ ሞርኬታራ ኤቄታዳ

ኢስታ ሾጫ፤

ኔ ማሻን ኢታታፔ

ታና ኣሻ።

14 ኣቤት ጎዳዉ!

ሄሳ ማላ ኣሳታፔ

ታና ቆታ፤

ኢስታ ቃዳይ ሃ ሳኣ ዴኦ

ጻላ ጊዲዛ ኣሳፔ

ኔ ኩሼን ታና ኣሻ፤

ኔ ማዝጋባን ሚንጂዳ ቂጻቴፔ

ኢስታ ካልሳ፤

ኢስታ ናይታስ ዳሪዲ ቲርፖ፤

ኢስታ ናይታ ናይታስካ

ጊዲ ፓላሆ።

15 ጊዶ ኣቲን ታኒ ጺሎቴን

ኔ ሲን ቤያና፤

ታኒ ቤጊዛ ዎዴ

ኔ ቦንቾ ቤኣዳ ኣላና።