1 ኣቤት ጾሳዉ!

ሃ ኪጻይ ታስ

ቆ ጋኪዳ ጊሻስ

ኔ ታና ኣሻ።

2 ቶሆይ ኤቂዛሶይ ባይንዳ

ጫሬን ሚቴታዲስ፤

ጪማ ሃ ጊዶ ጌላዲስ፤

ሃ ዳምባላይ

ታና ሚታና ሃኔስ።

3 ታኒ ማዶ ዴማናስ

ዋሳሼ ዳቡራዲስ፤

ታስ ቆ ፖራንዴይካ

ሜሊዴስ።

ታ ጾሳ ናጎን ዲሺን

ታ ኣይፌይ ባልጁሚዴስ።

4 ታና ሜላ ጮ ኢጺዛይቲ

ታ ሁኤ ቢናናፔ ዳሮ።

ዎርዶራ ታና ሞርኪዛይቲኔ

ታና ይሳናዉ

ኮይዛይቲ ዳሪዳ።

ታ ካይሳ ኤኮንታ ሚሽ

ታና ቃንጻ ጊዳ።✝69፡4 ማዛ 35፡19፤ ዮሃ 15፡25

5 ኣቤት ጾሳዉ!

ታ ኤያቴ ኔኒ ኤራሳ፤

ታ ኦዳ ናጋራይ

ኔፔ ቆቴቲቤና።

6 ኣቤት ጎዳዉ፥

ኡባፌ ዎልቃማ ጎዳዉ!

ኔና ሂዶታ ኦዳይቲ

ዬላቶፔቶ፤

ኣቤት ኢስራኤሌ ጾሳዉ!

ኔና ሚን ኮይዛይቲ

ታ ጋሶን ካዉዮፌቶ።

7 ታኒ ጫሽ ኔ ጊሻስ

ጋዳ ዳንዳያዲስ፤

ታ ኣይፌሶይ ዬላቲዴስ።

8 ታኒ ታ ኢሻንታስ ኢማ፥

ቃሴ ታ ኣዬይ ናይታስ

ኣላጋ ጊዳዲስ።

9 ታኒ ኔ ኬስ

ሚሼቲዛ ሚሾይ

ታና ታማ ማላ ጹጌስ፤

ኣሳይ ኔና ጫዪዳ ጫሻይ

ታና ጋኪዴስ።✝69፡9 ዮሃ 2፡7፤ ኦሮ 15፡3

10 ታ ጾማሼ ዬካዲስ፤

ሄሳንካ ታ ቂታዲስ።

11 ታኒ ካዮ ማይኦ ማይኣዲስ፤

ኢስታስካ ታኒ ቶሴስ*69፡11 ቶሴ፡ ቶሴ ጌቴቲዛ ቃላዚ ሌቆስ፥ ቂስ፥ ሄሳ ሄሳ ማላስ ጎኤስ ኣታዲስ።

12 ታኒ ካታማ ጌሊዛ ፔንጌን

ኡቲዛይታስ ዚጊርሳስ ኣታዲስ፤

ማቲዛይታስ

ዬስ ጊዳዲስ።

13 ኣቤት ጎዳዉ!

ታኒ ጊዲኮ ኔና ዎሳይስ።

ኣቤት ጾሳዉ!

ኔ ዶሪዳ ዎዴ

ታ ዎሳ ሲያ፤

ኔ ሜርና ሲቆን

ኔ ኣሺዛ ኣሾዛ ታና ቤሳ።

14 ጫሬን ሚቴቶንታ ማላ

ታና ኣሻ።

ታና ኢጺዛይታፔ ታና ናጋ፤

ጪማ ሃፌካ ታና ኣሻ።

15 ዲኦ ሃ ታና ኤፎፖ፤

ጪማ ኣባይ ታና ሚቶፎ፤

ጪማ ኦላይ ታ ቦላ ዎዶፎ።

16 ኣቤት ጎዳዉ!

ኔ ሜርና ሲቆ ኪያቴ ማላ

ታስ ዛሮ ኢማ፤

ኔ ቃታ ዳሮን ታኮ ሲማ።

17 ታፔ ኔ ኣይሌዛፔ

ኔ ሲን ጌንፋ፤

ታኒ ዋዬቲዛ ጊሻስ

ታስ ኤሶን ዛሮ ኢማ።

18 ኔኒ ታኮ ሺቃዳ ታና ዎዛ፤

ታ ሞርኬታፔካ

ታና ኬሳ ላኣ ዬዳ።

19 ታ ቦላ ጋኪዳ ጫሻ፥ ዬላቴኔ

ካዉሻቴ ኔ ኤራሳ፤

ታ ሞርኬታካ ሁኤን ሁኤን

ኔ ዴማሳ።

20 ጫሺ ታ ዎዚና ማዱንን

ታ ሂዶታ ቃንጻዲስ።

ታስ ቃቲዛ ኣስ ኮያዲስ፤

ጊዶ ኣቲን ኢሲ ኣሲካ ዴና።

ታና ሚንዛ ኣስ ኮያዲስ፤

ጊዶ ኣቲን ኢሳዴካ

ዴማቤኬ።

21 ታኒ ጋፊዳ ዎዴ

ታስ ጫሚዛ ካ ኢሚዳ።

ታኒ ሳሜቲዳ ዎዴ

ታስ ጫላ ጳንቂዳ

ኡሹ ኢሚዳ።✝69፡21 ማቶ 27፡48፤ ማር 15፡36፤ ሉቃ 23፡36፤ ዮሃ 19፡28-29

22 ኢስቲ ሚዛ ማዳይ

ኢስታስ ዎጺማዴ ጊዶ።

ኢስቲ ያርሾ ያርሺዲ

ሚዛ ማዳይ ኢስታስ ጊቴ ጊዶ።

23 ጼሎንታ ማላ

ኢስታ ኣይፌይ ጎዜቶ፤

ኢስታ ዞኮይ ቁኒ ኣቶ።✝69፡22-23 ኦሮ 11፡9-10

24 ኔኒ ኔ ሃንቆዛ ኢስታ ቦላ ጉሳ፤

ኢስቲ ቆፖንታ ዲሺን

ኔ ቦሻይ ኢስታ ቦላ ጋኮ።

25 ኢስታ ዱሳሶይ ካይስ ጊዶ፤

ኢስታ ዱንካኔን ኦኒካ ዶፖ።✝69፡25 ሃዋ 1፡20

26 ኣይስ ጊኮ ኔኒ ቃጻይዳይታ

ኢስቲ ዬዴቴስ፤

ቃሴ ኔኒ ማዱንዳ

ኣሳታ ቦላ

ሜቶ ዳሪሴቴስ።

27 ኢስቲ ናጋራ ቦላ ናጋራ

ጉጂ ጉጂ ባና ማላ ኣጋጋ፤

ኔ ኢስታ ማሮፓ።

28 ኢስቲ ዴኦ ማጻፋፔ ቁጬቴቶ፤

ጺሎታራ ኢሲፌ ማዝጋቤቶፌቶ።✝69፡28 ኬሳ 32፡32፤ ኣጁ 3፡5፤ 13፡8፤ 17፡8

29 ጊዶ ኣቲን ታኒ ሳኬታሼኔ

ዋዬታሼ ዴኣይስ።

ኣቤት ጾሳዉ!

ኔ ታና ኣሻዳኔ ናጋ።

30 ታኒ ጾሳ ሱን

ዬን ጋላታና፤

ጋላታ ዬን

ኢዛ ጊታቴ ቆንጪሳና።

31 ሃይሲ ሳንጌቶንታ ቦራፔኔ

ኮርማ ያርሾፌ

ኣዲ ጎዳ ኡፋይሳና።

32 ቆሄቲዳይቲ ታና

ጾሳይ ኣሺዳይሳ

ቤኢዲ ኡፋዬቴቶ።

ኢንቴኖ ጾሳኮ ሺቂዛይቶ

ኢንቴ ዎዚናይ ሚኔቶ።

33 ኣይስ ጊኮ ጎዳይ ሂዬሳታ ሲዬስ፤

ቃሾ ኬን ዴኢዛ

ባ ኣሳካ ካና።

34 ሳሎይኔ ሳኣይ፥

ኣባይኔ ኢዛ ጊዶን

ዎጺ ቃጺዛ ኡባቲ

ጾሳ ጋላቴቶ።

35 ጋሶይካ ጾሲ

ጺዮኔ ኣሻና፤

ዩሁዳ ካታማታ ዛሪዲ ኤሳና።

ኢዛ ዴሬይ ሄ ቢታ ላቲዲ

ሄን ዴኣና።

36 ኢዛ ኦሳንቻታ ዛሬይ

ሄ ቢታ ላታና፤

ኢዛ ሱን ሲቂዛይቲ

ሄን ዴኣና።