1 Utsi hiyyemaake boga'ni Iyyoobi hiyyemaak mitti manjichchi hedhemman; isinna fuggoxxe duuchchanaa'ni bayyate'e Mageno sodataammake, elokenna addatemeemmake manjjomman. 2 Isixxi oossenna torbaane labbaxxenna sase dubarramman. 3 Afeemmak hori: torbaane kuma Gedhebo, sase kuma gaala, mitte kuma qotiyyo onde dhibba harremmani. Ittani yo'ooshsha heddo isi'a huja'ni ergataaka manna afeemman. Boroti darre'ni hedhemmake bogguwwike manna duuchanaa'ni durummatinna isoo lekka uggaaki hedhemmabaan.

4 Iyyoobixxi labbaxxi oose aanchi aanchik ifi fike mine'ni mitteba bukki hite'e itta'ni ha'wita'n gammaddaamman; ifixxa sasiinxa dayyuwwa ye'e'na'ni mitteba inde'e ha'wina'emman. 5 Mitteba ite ha'watixxi barruwwa muuxendee uduma langa baro gorsan ke'eexxi Iyyoobi oose ye'iseexxi mitte mittende ifixxe oosexxee tolcha tolchaa'emman; tennee assaammalchchii, akimagaada anxi oose keekkattebaang godobi giddo Mageno yowwite cubbo hujjeen hiyye'e hedeemmaxxe'e oosettixxa cubbo biro'atemman.

6 Barratixxa barra iimmixxi ergganna Mageni edo shiqqe wodda durriisikinna welt shiqe.✝ 7 Duuchchi Woddiki Goottinna «Habaa'ni daggette?» hiyye durriisa qore.

Durriisikinna, «Buttate'ni elqe kayya mammaremaannan» hiyye.

8 Magenikinna Durriisa «Erganjo anka Iyyoobii'i meya hubbattenni uuddee'ette? Isishsha hedheek elokinna addatemeeki manjji buttate'ni hedhebaan; isi fuggoxxe duuchchanaa'n bayyate'e anee sodata'neeke dhugaatike manjon» hiyye. 9 Durriisikinna hiisseexxi «Iyyoobi atee sodata'neechch iittande? 10 Isiqqa atee sodata'neechch isoonna oose isixxa, afexa karra duuchcha heqqite'e nageessiteettaxxeeten; assedhexxe duchchan isoo eebbisse'e heddo hore utettexeeteba? 11 Yaane kinni afeechcho duuchcha birtettele uddaa'naanni atee yowwaan» hiyye.✝ 12 Mageni Durriisa «Eloxxen, yoona Iyoobi calla kissoxxe malee afeechcho duuchcha eetettexxa assedha dandeettatton» hiyye. Ookkonechchinni udumi'a Durriisi Mageni edii'ni fule me'e.

13 Mitte barraxxa barra Iyyoobixxi oose insa'neeke angafi mine'eni jilate'ni bukki hinee indda'ni woyinetika bulbulo ha'wina'neenge'ni 14 Iyyoobiba ergemeeki mitti manjichchi gonga'ni dageexxi «No'o duuchchiing qotilet hunja'eennan; harruwwatinna no'on bira dheedda'emman; 15 dedhange'ni Saabake bogiki manni dage loleexxi duuchchiin gechcho adhdhe me'e; atika erganjuwwanna wolaantichchiki shiye biree'na'a ani calli lubo gatee ate'ni kulonnaa dagennen.»

16 Ediseemmaki erganji haaso'a afoo'i'ni birebaang welengi erganji dageexxi, «Banqo ibbe gedhebokanna allalisano birtte, ani calli lubbo gatee ate'ni kulonna'a dagenne» hiyye.

17 Iikki erganji haaso'a afoo'ni birebaang weleeng erganji dagee'xxi, «Sasi qorbi Kaladaanik manni dedhangge'ni dage'e no'oo loleexxi gaaluwwakanna adhdhe'e erganjuwwakanna shiye biree'naa, ani calli lubbo gate'e ate'ni kulonna'a dagenne» hiyye.

18 Kunni erganji haaso'a afoo'ini birebaang welngi erganji dageexxi, «Oose attixxi duuchchinxi jilatee'e angafiinke mine'ni bukki hite'e itta'ne'e woyinetixxa booka ha'witaa'emmani; 19 gammoojje qiilli darre'ni kexxeexxi hobonbalte dedhaanga dagge'e mine dhiibbeeni, minikinna hedheeshshanni insa'ne'ni ibe shiyee'naa'a ani calli lubbo gate'e ate'ni kulonna'a dageennen» hiyye. 20 Ookkonechchinni udumi'a Iyyoobi iimi'a qophphi hiyye ke'eexxi yaadeemmaxxee seemma ifixxa dare umokanna haaxxe; buttanna kumbuyye sagada'n 21 «Ama anixxike godobanaa'ni ileme'e buttina uudenne baro mittilchchi afeennalchchi hedhemmabaan; reyanno barronna mittelchchonna adhdhe me'abo'non; Duuchchi Woddiki Gootti uwween; Duuchchi Woddiki Gootti adhdhe; Duuchchi Woddika Gootta galat geyowwaal!»

22 Iyyoobi, tinni hega uushsho duuchcha geltoolenna hara cubbo hujebaan; Magenoke'n fuggoxxa fulchedheba'a.