Iyyoobikaa Maxaafa 3

Iyyoobi Ilemeexxa Barra Bade

1 Okkonechchinni udumi’a Iyyoobi haso’ake’ni ke’exxi ilemeexxa barra badina’n

2 Hiyyee qici

3 «Ama anixxi anee horatteexxa hashsha

Ilemennexxe barra’anna ise’a hoola!

4 Iitti ilemennexxi barra dukande hexxowwaal

iimiki Mageni isee qaabbatoqqe’e

haranga ifi ise’a ifoqqe;

5 Himminni xaxee’naa’a dimma dukkana ise’e buqqo

duumanchi buqe’e abide’naa’a ifi ise’a leelloqqe’e;

6 Iitti hashsha dimma dukkanaxxe kaddowwaal

agenjoke’ninna woggatike laakkossa barruwwati giddo e’yite lako’endoqqe’e.

7 Iitti hashsha maseentote kaddowwaal

gammadi yookaan illillisa ise’ni hexxoqqe’e;

8 Lumoxxa jawwe hinaaka abbaayya giddika lumoka biniinchuwwa hoola hiyye lele’misaammaki manni

ettene barra’a hoola hiyyowwaal.

9 Eettene hashsha’a bakkalchuwwi ifa gophummadu;

iitti hashsha sooda gophpho’a yanna qeerrexxuummadu;

soodee’na ifi ifaan hinaaki hedumi gatuummadu;✝3:9 Erm. 20:14-18.

10 Rakko uudabo’noshsha

anixxe amake godobanaa’ni ilemabo’noshsha assa gopheemmaxxe ettene barra’a hoola!

11 Anixxe amake godobi giddo wode’e kade’e gatuunnadu!

Ilemenege’e hirba’ni maye’e Mageni ane’e shiya gophe?

12 Maye’e anxi ama gudeeda iseke’ni ane’e luu’mexxee

maye’e isi ununa iseka ane’e ununsite?

13 Silanni okkone wodda reyeennele;

ta’a konne wodda hafuura adhdheennan

14 Ta’a diigeme’e hedheeka motummatika minuwwa ifi’a ijaadhdheemmake

buttatike moyanjuwwanna insa’neeke ja’laabuwwinni silanni diiphe’e hafuura adhdheennan;

15 Mine ifike’ni biretika sibiljonna worqe wonshedheeke hayyichchuwwinni welti silanni diipheennani;

16 Yookaani ifa uudebaang mongeemmake lubbo afebaak ilemeechcho kaduunnadu;

17 Moogemeeki fuggaaleessi manni fuggo huja isixxi ookko gabalendeen

elo’e daffe’e itaammakinna ookko hafuura adhdhe.

18 Booji’emeemmaki manninna midde ookko nage’iki hedhaani

insa’ne’e ajajaammake mannixxe mootumma’ni gateeni.

19 Lummedheekinna jala hedheeki mitteba ookko hedhaani

garbooletixxi garbbumma gala ookko gattaan.

20 Rakkotinna abarki hedha’neeke manni’a ifi maye’a ife?

Yada’ni cummummi hiyya’ni hedha’neekee’e mayete uurre me’ashsha kaddeeki?

21 Ba’eeka maallaqa fiiddi hiyye’e hasaammake mannishsha

reyo’a reyo halsa’neeki manni maye’a uurre me’ashsha kadde?✝3:21 Wal. 9:6.

22 Reye moogemeele gamada’neki manni

maye’e uurre’e me’ashsha kadde?

23 Me’a’neeki ori itti duudeekenna

Mageni itti cufe’e xillikki asseeki manji

mayete hedhot uurre’e me’ashsha kaddeeki?

24 Oodhishsha ani’a itate kaddeeni

indiddo wodi’insha dunenneni.

25 Sodaatennexxi yaane ane’e hanqattebaani

ane’e godobi kuleexxi anenaa’ni gattebaani.

26 Rakkonna abara malee’e

nage’a afe’e hafuura adhdhebo’noni» hiyye.