1 «Ta'anna koo Iyyoobi! Atee hiyyaannexxa laqi;

hiyyaannexxa duuchcha co'o hite'e caqas.

2 Haaso'onnaa shiqeennen;

hiyyaannexxinna suume anxe'n hexxeen.

3 Anxe qajeelummashsha haaso'aannen;

arrabo ankenninna dhuugaate haaso'annon.

4 Anee dadeek Magenoken;

hedho ani'a uwweeki duuchchiinxa dande'aaki Mageniinke hafuuran.

5 «Dandeettottole hiissichcho ani'a uwwi;

haasoottattolchcho qophpheeffatte'e uurite haaso'i.

6 Aninna ati Mageni eddo qixxenden;

aninna dademeenneki butinakenaa'niten.

7 Anee sodaatiyyo hasissabaani,

ani atee miica dande'abo'no.

8 «Haasoottettaxxa duuchcha caqasa'n tureennen

arrabo atikenaa'n fuldeexxa laqeennen.

9 Ati haasoottatto wodda ‹Ani balleessanna dedha afebe'no;

cubbo anee maqqebaake ca'ichchan.

10 Yaane kinni Magen anee ganatee mitte buuto anenaa'n hasseen;

naaphiinshanna anee uudeen.

11 Lekka anxa jirmiinxe oddo'n qarabe'e abideen;

me'aanneka ora duuchcha uuda'neen› hiteetten.✝

12 «Koo Iyyoobi! Kunni haasoottetteki haaso'i dhuugaate kadebaaxxa ate'n kula'ennen,

Mageni duuchchiinge Manji iimi darren.

13 Hittata Mageni manji kuleexxa laqabaan

hita'n maaye Mageno aallattatto?

14 Manji qabataba'a male'e

Mageni gargar hedheeke orinni haaso'aan.

15 Hashsha manni ma'na sa'e cokokki hiyye dhiphaa wodda

Mageni oojjotinna waleellati haaso'aan,✝

16 Ookkone wodda hiyyichcho isika lanqaashsha assaan;

xexe'antaasha assatinna sodaachchisaan,

17 Konne qicinni manji cubbo huja waalashsha assan

ifi sadinoteenaa'ninna gatisaan,

18 Lubbo insa'neexxa ba'netenaa'ni gatisaan

reyotenaa'ninna anjiraan.

19 Yookaan higgeenna manjiinke micci giddo ita'n duuchchi wodda hedhaake dhuukkubinni dhibemee

ma'natike jaalo kadeexxi hedhaashsha assee xixaan,

20 Konne qicinni dhuukkullichchi midha afo'iki abida gibisaan

eloxxi ita duuchcha midde iso'o eyyissabaan,

21 Huqqatatenaa'n kexxeexxa,

maali mude'naa miqe calli gataan.

22 Reyo geyeexxi

lubbo isixxinna baletibaa shiqqaan.

23 «Manjokee toggichcha ora leellishshaaxxe

kumuwwik laakko'endaaxxe Mageniinxe ergannanaa'n,

mitte isibaa daggeexxi isoo gargaartaaxxe hexxeen.

24 Erganjikinna isi'a marareexxi,

‹Isoo lubbo wodaaka afeennaxxee

reyo'a waldoxxe'e hiyya'nee› reyo ajajaan.

25 Tennexxe maali isiki oosetike bisishsha hige wo'maan;

ka'iimummate'ninna haaroba higaan.

26 Ookkone wodda Mageno soodataan,

soodachcho isixxanna Mageni laqaan;

isinna gamada'nee Mageno magenooffataan

Magenikinna isixxe qullummashshanni isi'a hira uwwaan.

27 Isinna manji edo urreexxi hiyyee farsaa qici,

‹Ani cubbo hujeneexxi dhuugaa dasseennen,

Mageni kinni balleessa anxishsha ane'n laakko'ebaan.

28 Lubbo anxa reyyotena'n gatiseen

kunse ta'a hedhoti hedhee ifa udaannen› hiyye.

29 «Tennexxee Mageni iitta hexxeexxa yaane duuchcha

Manjokee higge higgeen assaan.

30 Hedhotika ifa uudo'a,

lubbo reyabaashsha assaan.

31 «Koo Iyyoobi! Haaso'annexxa co'o hite'e caqasi;

ani haaso'aannen ati sammi hiyyi.

32 Hita'ettelchchi hedhoole laqo;

ca'a hitottaa ati'a faaci'aannaxxee haaso'i.

33 Hita'ettexxi hedha gophphoole ani haaso'aannexxa ca'li hite'e laqi;

ani atee beekkuma barachchiisaanneni.»