1 Na'imake bogiki manji Tsoofaari hiisse hiyyee haaso'ee qici:

2 «Koo Iyyoobi! Ati hitettexxi yaane anee gubbeexxi haaso'annoshsha assiteen;

tennexxeeten haaso'oonna'a hoxemaannek.

3 Haasottaatta wodda duuchcha anee yowwitaattan;

kaddo malee hiyyennexxi hiissichcho ati'a uwwanno qico anende ege'nennen.

4 «Mageni manjo buttate'n hedho'a uggeexxe yaanna'n,

olmii'ni telchchi qico'ni iittande kaddeexxa egendeetten.

5 Fuggichchi manjiki gammadi harumaxxe yaanna'aten;

Mageno addatabaake manjiki gammadinna xu'u geyebaang ba'aaken.

6 Fuggichchi manji ifi duke'e hollati iima Mageno geyoole,

qeerredhenna umiki iimixxa huurre tuqoolenna,

7 Ifike foole'ishsha ijje ba'aan

isoo eg'neemmak duuchchinna, ‹Isi haba hedhe?› hiyyaan.

8 Oojjoti leelliteexxi baxxammaxxe yaaneshsha phirri hiyye ba'aan;

Hashshixxe waleellashshanna iikki woddi ba'aan.

9 Hedhdhamabaa'ni coxxe isixxa gonphammaxxee

mittele isoo uudeeki langaxxa isoo afabaan.

10 Oose isixxi manna sobatta'ni

anni hiyyeeyyetenaa'ni dabiki adhdheemmaka maallaqa hiissitaan.

11 Ka'umummati wo'ma hedhemmaki isiki bis

shiixxoxxe yanna uduma buttinake kadaan.

12 «Fuggichchi fuggoxxa ifike afo'i giddo itaatishsha xe'mi'lshoole

ifixxe boqo giddonna isee sho'edhoole,

13 Liqinsebaang afo'i giddo

isee corqa'n tuursoolenna,

14 Yaane kinni liqinsee uduma xe'me itti qaraartee

godob giddonna buutetixxe ha'lashsha kaddaan.

15 Fuggichchi manji iteexxa karra sifeeffatabaan;

itemmaxxa duuchcha Mageni honqo'ashsha assaan.

16 Fuggichchi manji buutetixxa ha'la ha'waani;

bofikina iddee isoo shiyaan.

17 Ardake

malebiinshanna adotishsha duneddaaxxa eebba

uudebaang reyaan.

18 Elo isixxa mannakee hiisse uwwa malee itabaan;

dadda'le alfemmaxxa karranna la'onfatabaan,

19 Tinni iitta kaddeechchi, hiyyeyye miice duuwwi gatise; ijaarebaaka mine mannakenaa'n adhdheemmaxxeeten.

20 «Haphphaaleessake kadeemmaxxee anee gelteen hiyyabaan;

tuu'leemmaxxi karranna isoo gattissabaan.

21 Isi donnake kadeemmaxxee welekee mittelchchona gatisabaani;

tennexxee isixxi karra kiphattabaani.

22 Feedhee qicinna dureessake kadoolenna hifo calla kadaan;

iso'ni duuchchi wodda rakko bira saxxaani.

23 Goddee iteenne hiyyaa wodda Mageni mufeti isoo ganaan;

ifixxa balanna xeeniinsha iso'n gansisaan.

24 Bagedokenaa'ni baaje fuloole

saggeettotike mogidinni otemaan.

25 Ottemaaki mogidinna giddi'a sa'eexxi elqee'n fulaan;

qarikinna tidho kukkuta'n gadhi'a xalli hiyyaan;

isinna alaayye qexeri hiyyaan.

26 Tuulemaxxi karra duuchcha dukkana dimma giddo baxxaan

manji uggebaaxxi giira isoo ittaan;

isike mini giddo gattaaxxi karra duuchcha gubattaan.

27 Hujemmaxxa cubbo iima farri assite kuldaan;

buttatinna naaphake kadde'e iso'n kexxaan.

28 Mageniinxe mufeexxa barra

isike minixxa karra duuchcha lola'i gudhdhe bukki asse me'aan.

29 Mageni xaqartyye mureedheechchi

fuggaaleeyyetik qoobbi konneten.»