1 «Hobonbaltetixxe birasa'nee'ni kexxeexxa godobi anee culphise

alayyee raafemmenneni.

2 Haaso'a wodda haaso'a isika laqqe

dindinsotishsha dindima'neeka iska hiyyichcho caqanseen.

3 Banqo isixxa imi'n butti'a duuchchi booncho'n facaasaan

buttatixxe gabala qico'ninna geessisaan.

4 Ookkoneechchi udumi'a Mageniinke haaso'ixxi gungunso laqende

sodaachchisa'neek Isiki haaso'i balaqiinsha balaqa'nemman

banqotiki xalaqqisinna ta'a ta'anni xalaqisaa'naa

isike haaso'ika gaachchanninna gungunso laqisa'emman

isike haaso'ika hafuura lanqaa wodda banqo hoyya'nemabaan.

5 Magen haaso'a wodda hafuuri isikixxi mambe'iinxi dindinso laqende

no'o egennabo'noxxa lumolla yaanuwwa assaan.

6 Kaade, buttate'n ibbaashsha assaan

jaba xeeninna ganashsha ajajaan.

7 Isi dadeemmaki manni huje isixxa ege'no'aa

duuchchiingi manni huje urrisahaha assaan.

8 Ookkone wodda biiniichchuwwi baqatee sho'omamaba'a e'yaan

galaammabanna me'anni.

9 Jabaxxa diidaallo bita'in ke'isan

qorri callixxa diidallonna middi'ni iyyedagaan.

10 Hafuuri Mageniinki wode'e qiidisaan

jijjiirenna kaadete assaan.

11 Duumanchake'n wode'e ba'ise'e

giiddii'n banqotanna dhuqaashshan.

12 Duumanchuwwi Mageniinxe akeetteshshan qarqara buttatike duchcha'n doyaan

ajajeemmaka ajajanna muuxxaan.

13 Mageni xeena gansiisaachchi

buttinna lashshi assatee

manna xixichchokee

yookaan no'o eya'neexxa lellishatetee.

14 «Koo, Iyyoobi! Haso'aannexxa co'o hite laqi;

Mageniinxa mambe'a hujuwwanna hubatte uudi.

15 Mageni duumanchuwwa hitta me'aashsha assa'neexxa

banqotanna hitta dhuqaashsha'neexxa egendeette?

16 Duumancha iima helelliseekanna duuchchiinxa ege'neeke Mageniinxa mambe'a huje egendeette?

17 Holatta'neexxi gammoojexxi diidallo gandoole

ati eebbinjik baqqatton.

18 Mageni iima baqqammaxxe daa'witeshsha dhisoole

ati Isi bira hexxe gargaartatto?

19 «Yaadi no'oki dukkaneemmaxxee

no'oxxa yaane shiqisha dande'a gonphaannaxxee;

Magenoke'n maa hinannoxxa no'o'n kuli.

20 Magenoke'n haaso'aannen hiyye ke'e

maayeeta anee baleesso'a angandinni ye'edhaannek?

21 Diidallo hurre iimatenaa'n filte ca'a assitaa wodda

ayyinna arishsho ba'qqi hiyye'e uuda dande'abaan.

22 Middi darre'n worqete fakkaataak iffi leellaan

Magenikinna sodaachchisaake gaachchanninni dagaan.

23 Duuchchiinxa dande'aaka Mageno afa dandeenabo'non,

hunna isixxinna lumoxxen

isinna dhuugaati muraaken.

24 Hedumiki ifi beekkolette assaaka manna tuffataammaxxee

manjji duuchchi isoo sodaataan.»