1 Iyyoobinna hiyye hiissee qici:

2 «Ta'anna lumoxxe yadonninna aalachchonni hedhenneni;

oodhdha'ni raaronnolenna; ta'anna Mageni anee ganaa walebaan.

3 Isi afemaaba eg'nennele,

hedhaa'neeba mare geyennele hitta eyyanna'a!

4 Yaane anixxanna iso'ni ku'laannan

amme ballessa afebo'noxxa taakka langanna hiyya'n haaso'aannan.

5 Maa hiisse'e ane'ni haaso'aaxxa uudannan

maa hiyyaaxxanna laqaannan.

6 Eega, Mageni isixxe lumoxxe hunnanni anee ganuun?

Waawwo'o; yaane kinn haaso'aannexxe laqaa malee, ganabaan.

7 Ani mitte balleessa afebo'no manji ookko isinni moromannoo;

hayyichchi ank Magenkinna ‹balleessa affeboxxo› hiyye ane'ni muree duuchchi woddi'a anee leexxa fulchaan.

8 «Yaane kinni isika hasito boroti darre'n marennen ookko hedheebaan;

dhidhimmi darre'inna wirri hiyyennen afa gopheen.

9 Isi middi darre'n huje hujate'n hedheen ani kinni afabo'no

bita'i darre'inna wirri hiyyennen afa gophenneni.

10 Isi taakkaarro anxe duuchcha ege'neen

hega anee uudoolenna worqeetishsha ca'aa hiyye giddii'n fulannon.

11 Isi eeyyake ora'ni me'enneni

elqenna kayya daaqebo'noni.

12 Ajaja isiki gadhi darre fulabo'non

hiyyichcho isikanna godoba ank giddo uggudheennen.

13 «Murte muraki isonden isoo hoyyaakinna hedhebaan;

Isi haaseexxa duuchcha assaan.

14 Ane'n kaddoo'a hedeexxa duuchcha muuxaan

konnee fakkaataaka heddo yaaduwwanna afeen.

15 Tennexxe isi edo uurratee yo'oshsha sodata'ennen

tennee hedanno wodda midde alayya'ennen.

16 Magen godob ank culphisaashsha assee

duuchchiinxa dande'aki Mageni anee alalshe.

17 Dukkana dimmi anee buqqe'e afabo'noshsha assoolenna

dukkanatixxi birasa'ne anee haaso'a hoyyitebaan.