1 «Duuchchiinxa dande'aak Mageni maayeete murte uuwwaaxxa yanna mura gophpheechchi?

Ardi isiki isi cubbaaleeyyete'ni muraaxxa barra haani qico'n heqqedha'ni hedha?

2 Fuggaaleesi manni gabala balleesa'n

moodheeka gedhebonna alla'linaan.

3 Anna affeebaaxxe oosexxa harre hunnat adhdhineen

aro'i reyeexxe manjichchoka qotiyyichcho liqakee abixxineen.

4 Hiyyeeyye xireeffante ora me'itabaasha hoyyine'e

insa'ne edii'n baanje sho'ommaashsha assinaan.

5 Hiyyeeyye qiilla gammoojje biniinchishsha

ifixxe oose'a ittaachcho hasito doonsa kiyya hinaan.

6 Wele manni'a hunja'n midha bukk assina'nee aassinaan

fuggichchi manjika woyinetike hiddichchike fichchanaa'n feshshillaani.

7 Hashsha duuchcha duwwi diinphe gallaan

boojjetee oddo'winnaaxxa seemmanna anfebaan.

8 Koobate'ni ganaaki xeeni biso insa'neeka shanshe biraan

eebbinjo halsine marre'e kinuwwa hanqalfine gallaan.

9 Anni reyeexxa oose uununakenaa'ni kunte ifi'a garbake asse'no'aa mucunqe adhdhinaan;

hiyyeessi manjika belto liqakee adhdhinaan.

10 Hiyyeeyye seemma afa gophpheemmaxxee duwwinn huje bobbaataan.

Midha aassinaaxxa yanna ladde dukka'ne aassitaan solo'witaan.

11 Fuggaaleeyyetike hiddichchike fichchanaa'n ejersiinxa zaayite miiccaan;

woyinetixxe gummanninna bulbulo giissitaan;

yaane kinni insa'ne dheeboti gubantaan.

12 Qachcha qachcha'inni manni reyo shiqee gadooda'neen

mado'eek manni gargaaro'a raaraan.

Yaane kinni Mageni insa'ne'n hunjeeka daba uda'ini ca'li hiyyeen.

13 «Ifa gibaake manna hedheen,

ifi maachcho kadeexxa ege'na gonpheemmaxxee ifinka ora me'inabaan.

14 Manjo shiyaak manji bogi soodebaang ke'ee rakkiyyenna hiyyeeyye shiyee

hashsha moorakee fulaan.

15 Yababulaaki manjichchi bogi hashshaxxe heqqedhe,

ayyiinna isoo uudabaashsha alba buqedhaan.

16 Moodhalshe hashsha mine undee moorakee e'yitaan

barra kinn sho'ondee hossaan

ifa eenabaan.

17 Sodaachchisaaxxi hashsha insa'nee gammachiissamaxxe'e

dukkanna dimma insa'ne'aa barrishshaten.

18 «Kaddo malee kinni fuggaaleeyye ta'a leelle'e iikki woddi ba'ammake wodiinke honbishshaten;

fichchi insa'neek gummisabaan,

insa'neeke woyinetike hiddichchike fichchi giddi'a maraak hedhebaan.

19 Kaade eebbinjiki baqqe'e wodi'i bage'e xo'oo hiyyee'naa gonphammashsha

cubbaaleeyye rerte'e moogendee'na'a gonphaan.

20 Ildeexxi amuwwanna insa'nee deetaan

maala insa'neekanna oolo ittaan

fuggichchi manni haqichchiinsha enqemmaan.

21 Tinni duuchcha insa'e'ni gelteechchi

ila affebaaxxa melaalle miinceemmaxxeetenna

aro'i reeyemmaaxxa melaalle elooxxa assa gonpheemmaxxeeten.

22 Yaane kinni Mageni hunna isixxenni mootummate'ni hedheeka manna hoyyaan;

galdumi insa'neeki elookenna fakkaatoole

reyo gantabaan.

23 Mageni insa'nee nage'iki he'neeshsha assoolenna

me'inaa ora duuchcha uudaan.

24 Fuggaaleeyye shiixxooxxa yanna gurra fuldoolenna

iikki woddi badda'atishsha bange ba'naan;

midhatishshanna haamemmaan.

25 Iitta kadabaan hiyyondoole dhaarichchake kadennexxanna

dhugaa haso'ebo'noxxa ayyete koka?