1 «Tennee duuchcha ille anxenni uudenneni,

mansha anxenninna leqqeennexxi qalbeefateennen.

2 Ha'no egendinexxa aninna eg'neennenxeni;

hara ha'no jala hedhabe'non.

3 Yaane kinni haaso'i anki duuchchiinxa dande'aake Mageninniteni;

moromaanekinna isinniteni.

4 Ha'no kinni gowwumma ha'noxxa buyyatee dhaara haasootine'een;

akka affebaang ci'loondeexxi woyi fuldammaabaxxe ci'leeyyuwwan.

5 Silaani sammi hitine'eele!

Uudaake duuchcha'ni beekkolete fakkaattinaamman.

6 Anee moronsiisseexxa

ane'ni gelteexxa balleessa sammi hitine laqqe.

7 Ha'no isi Mageniinke summi'a dhara haasottina'neechcho labbee;

manjo sobati Mageno eeyyisina'neechcho ha'no'n fakkaattaa?

8 Isi'a gamissineebaata?

Ha'no isike golabaata?

9 Mageni dage'e ha'noo hubatee uudeele

dhuuchchiinxenni qullo fuldinaa?

Manjo sobbinaashsha Mageno sobbinaachcho labbee?

10 Sho'iki gamissinoole

Mageni ha'noo xixebaaki gattinabaani

11 Lumminne Ifikeeninna ha'noo sodaachchiisaan

qaaro Ifikenninna ta'anni ha'noo bararassaani

12 Mammaassi ha'nooki manjokee woyi fulammabaake qabuxxishshateni;

ha'nooxxi moromanna butuute gatammake faariinke mi'ishshateni.

13 «Yoona ha'no sammi hiyye

haaso'onnaa ani'anna bado uwwe;

ookkoneechchi uduma kadda'neexxi feeteexxi kadduuni.

14 Magnoke'n afo'o fulchedheennaxxee

anee shiyaaxxa ege'neennen.

15 Tennexxee Mageni anee shiyo'a hasoolenna

ane'ni mitti gataachchi hedhebaani

kaddo malee anixxa yaane iso'oni ku'lannoni

16 Cubbichchi manji Mageni edo dande'e shiqa gophaammaxxee

tennee jabaate assa anixxi anxe fayya'a buutote kada dandeetaan.

17 Haso'annexxa adda laqqe,

hiyyaannexxanna caqasse

18 Ani darree'ni ani hiyyannoxxa duuchcha elo qicinni bukki assedhee shiqeennen

Mageni anee ‹balleessa affebexxon› hiyyaaxxanna eg'neennen.

19 Anee ku'la'neeki hedhoole

moromebe'nong sammi hiyye reyonaa qixxeffateenneni.

20 «Ee Gootta! Ati edii'ni sho'omabe'noshsha

laqannexxa lame yaane ani'a assi;

21 Tininna, anee xixa waal

bararassitoxxee.

22 Ee, Magenoo! Edisse'e ati haaso'i

aninna hiissichcho ati'a uwwannon;

yookaani ani haaso'e'naa ati hiissichcho ani'a uwwi

23 Egeri hujennexxi cubbonna balleessa hitteexxe?

Dedha hujennekanna cubbo anxa ane'ni kuli.

24 Alba anenaa'n hoyyexxe'e

naaphiinshsa anee uddeteki mayeete?

25 Diidallo adhdhite me'itammake shafishshanna

bagoke huurishsha

anee gussite shorrita'ni sodaachchissa'ettelchchi maayeete?

26 Anee ku'ltotta'a borreessiteettexxi yaane yo'oshsha qararteexxen

bire oosummati wodda hujennexxa balleessa midde ani'a waaldebexxon.

27 Munnuqqi hiyyabe'noshsha lekka anixxa jirmuwwake'n usurte'e,

tarkaaffe anixxa duuchcha uudda'nee anee to'aatta'etten.✝

28 «Tennenaa'n kexxeexxa aloo'eechchishsha kadee gatannon,

bile itteexxe seemmashshanna ba'annon.