1 Ookkoneechchi uduma Iyyoobi Duuchchi Woddike Gootti'a hiyye hiissee qici; 2 «Ati assitottaa heddettexxa duuchcha assitattoxxa ege'neennen;

ayyinna atee hoyaaki hedhebaan.

3 Ani ege'nennexxi shixxoxxe calla kaddee'naanni,

‹maayyee ege'nebo'noxxa heddo yaane haaso'ennexxa anee qorteetten›

dhuugaandeni, ege'nebonoxxa,

heddo mambe'a yaanuwwaxxara haaso'eennen.

4 «Atinna anee, ‹caqasse'e ta'a,

anike qortumi'a hiissichcho hiissi› hiteetten.

5 Ani ta'i qico'n atixxa yaane ege'neenneki

manji hiyyeexxe calla laqatitemman;

Ta'a kinni ille anixxi atee uuddeen.

6 Tinni haaso'ennexxi duuchcha anee shookishsheemmaxxee

bukote'ninna bululoke'n ofo'le'e aadde aaga'ennen.»

7 Duuchchi Woddiki Gootti Iyyoobinni haaso'a bireechchinni udumi'a Teemaanike bogika manjichcho Elifaazii'i hiyyee qici, «Ha'no garbichcha aneke Iyyoobishsha anxe yaanexxara dhuugaa haaso'a gophphineemmaxxee ate'ninna lamiinge atike jaaluwwa'ni mufateennen. 8 Tennexxee ta'a ke'xxineexxi torbaane jibootanna torbaane gedhebiinxa korbeeyye adhdhitine'e Iyyoobibaa marre; ookko ha'no ifi ifinxe cubbo'a ciincatika tolcha tolche. Anki erganji Iyyoobi ha'nooxxee anee soodataani; aninna soodachcho isixxa laqennexxi cubbo ha'nooxxixxe qixxe'n ha'noo mufeti ganaannaxxa waalannon; ha'no Iyyoobishsha anxe yaanexxara dhuugaa haasoottinebaan.» 9 Ookkoneechchi uduma Teemaanike bogik manji Elifaazi, Shuhake bogi mnji Bilidaadinna Na'imaataawwichchi Tsoofaari marreexxi Duuchchi Woddiki Gootti ajajemmashshanni assine. Duuchchi Woddiki Goottinna Iyyoobixxa soodachcho laqe.

10 Iyyoobi sasiinge jaaluwwa ifikee soodateechchinni udumi'a Duuchchi Woddiki Gootti haaroba iso duuronse; edo afeemmake qaabeennanaa'ni caala lame anga asse uwwe. 11 Ookkone wodda Iyyoobiki dayyuwwi dayyuwwanna edo isoo ege'neemmki duuchchi isoo uudo'a dage; mine isike'ni ofolle; welti inde; Mageni iso'ni iyyedageemmaxxe jabaxxe rakko'a welti yaandeexxi dayyeessine; mitti mitting birretike sibilixxanna worqetixxa qube iyyedange'e isi'a uune.

12 Duuchchi Woddiki Gootti Iyyoobi edi woddi caala eebbise. Tennexxe Iyyoobi tommenna shoole kuma gedhebo, jaane kuma Gaala, mitte kuma qaanja qootiyo, mitte kuma meyyaxxa harre afeemman. 13 Haaroba torbane laballonna sase duubara i'le. 14 Dubarri ifiki giddii'ni taakkaxxika summa Yimiima; langaxxika Qetsi'o, sakkaxxika Qerenhafuuki hiyye fulche. 15 Buttate'ni Iyyoobika dubarra danchummati lekka insa'neexxa uggitaaxi duubarte hexxemmabaan. Iyyoobinna labbaxxe ifixxe oose'a uwweeshshanni dubarrakeenna geyaaka geego qoode.

16 Ookkoneechchi uduma Iyyoobi 140 woggaa ture'e; oosetixxa oosuwwanna sholgaxxe ila qico'ni uudaa qico'n geye. 17 Wogga godde'e cime'e reye.