1 Iyyoobi hiisse'e haaso'ee qici:

2 «Eeti! Ani tinni dhugaate kaddeexxa eg'eneenneni

yanne kinni Mageni edo manji

hitta qullichcha kada dande'a?✝

3 Isoo ayyi morome dande'e?

Isi kuma qortuma qoreele

konne giddii'ni mitte dande'e hisaaki hedhebaani.

4 Mageni beekakenna hunnaameessakeni;

ayyete Isi hiyyeexxa gibe midhemebaaki gataaki?

5 Dedhange'ni koobuuwwa linqi linqi assaan

mufateexxinna fottossaan.

6 Mageni butta isexxe bakkanaa'n lele'misaan

ise itti hana hexxemmaxxa kinuwwanna sheke sheke assaani.

7 Arishsho fuldabaashsha

urjuwwatinna iffaabaashsha hoyya dande'ani

8 Ayyeenna gargaarsa laqedhebaang iima dhiseeki isoteni

Isi abbaayatike danbala'i hana tarkaafata'nee me'ani✝

9 Bakalchakanna wele iima duuchchi darre'n hexxexxa urjuwwa,

dadeeki Magenoken.

10 Isi hujaaxxa lumolluwwa yaanuwwa laakkoonee dhaqqanbabaani

Isi assaaxxa mambe'a yaanuwwanna

tennete hinee egenne birrabaani

11 Mageni ani birii'ni sa'eelenna afabo'noni;

ani biri'a dageelenna konnete hiyye egenabo'no.

12 Haseechcho adhdhoole ayyinna hoyye dande'abaani

ayyinna, ‹Mayee iitta assitata'ette hiyye› isoo qora dande'aaki hedhebaani

13 Mageni mufatoole

Re'aabi hinaake Abbaayyati bininchixxa gamuwwa

lekka isixxi hunda sa'aani.

14 «Anita, iso'ni hitta hisse'e dande'e haaso'anno?

Iso maa hiyyee moromanno?

15 Qullichchake kadennelenna

murte uwwaaki Mageni ani'a mararaashsha soodatanno malee

Iso'ni hisse haaso'abo'non.

16 Ye'edhee'na laqe'e hisse haso'eelenna

hiyyannoxxa caqasse hiyabo'no

17 Hobonbalteti ane'e enqe butuchcheen

ittani, tola boddichchanga anee madeesse bireen.

18 Hafuuranganni inqo adhdhonaa walebaan

abari ane'ni bira saxxaashsha asseen.

19 Afennexxe hunnani isinni wa'laanichcho abixxano hiyyabe'noshsha

isoo geyaaki hunnaameesi hedheba'a;

murtetixxe songo'n morome'e ifinaa'n hiissedhanno hiyyabenoshsha

isoo murtetibaa dande'eexxi iyyedagaak hedheba'a.

20 Ane'ni mitte balleessanna gori hedhebaani; yane kinni aningi haaso'i anee balleesanjoke assaan;

anke afo'onaa'n fuldeexxe duuchchiinxe Mageni ane'ni muraan.

21 «Balleesssa ane'n hedhagophphoolenna

ta'inni elqi'a ifi xexxe'atabo'noni

hedhotinna ane'e gibisse'en

22 ‹Mageni balleessaakanna balleessa afebaaka bira'emmaxxee›

duuchchiinxi mittendeni

hiyyenneki tennexxeeteni.

23 Balleessa afebaaki manji mitte rakkonni dedhange'ni reyaawodda

Isi konee manjicho'ni oso'laani.

24 Mageni butta fuggaaleyyetixxe anga'ni sa'isse uwwe'eni

Isi hayyooletixxa ille abideeni

tenne'e asseeki Magenoke kadagophoole

ayyeteta?

25 «Bari aniki mitte gammachchiissa'neexxa yaane udebo'noki

wiinamee sa'a'neeni.

26 Isinna qoocceti gisinemmaxxe hoboloshsha gonga'neeni

woyi bute adhdhammake sinbirishshanna wiinama'neen.

27 ‹Gungunso waalee;

mittele gammade'e oso'lanno› hiyyonnolenna,

28 Mageni ane'e ati balleessa affeboxxoni hiyyagophammaxxee

dhibonna rakko ane'ni kexxaaxxee sodaata'ennen.

29 Yoona balleessanjoke kade lellennechchinni

tola maayeta eelo'anno?

30 Biso anika saamunik anshedhe'e

angatanna haranjiki ca'a assedhonnolenna,

31 Seemma anixxi midde anee jibbitaa qico'ni

bale giddi'a anee darbitetten.

32 «Isi anishsha manjoke kada gopheemmaxxee

murtetixxe songo'ni mare

weli hubanto hiyya dande'abe'no.

33 No'oo lamiingee murte uwwaaki hayyichchi afemuummadu! 34 Qaaro ifikenni anee bararassabaashsha,

ifike kutinni Mageni anee gana waaleele,

35 Ani manni anee hedenneshsha kada gopheennaxxee

isoo sodaatebe'nong haaso'annan.