1 Teemaanike bogki manji Elifaazi hiyye hiissee haaso'ee qici:

2 «Isi beeki manji

diidallotishsha umo eege egennebaaka haaso'a haaso'aa?

Godob giddo la'o afebaaka yaada aabixxa?

3 Beeki manji isi mitte woyi fuldabaaxxanna

gumma affebaaxxa moronsha moroma?

4 Ati Mageno manni sodaatabaashsha assitetteni;

Mageno sodataake manni'a gufote kaddeetten.

5 Balleesanjoke kaddettexxa haaso'ange'n ege'nishshaatten;

yaane kinni qarummatike haaso'inni buqqe saxxottaa wo'laanda'etten.

6 Anke afoo'inni atee balleesanjoke hiyyebo'non;

yaane kinni haaso'i atingi balleessanjoke kaddettexxa ege'nishaa'nnen.

7 «Manjo duuchchanaa'n edisse ilende'etteki atetee?

Koobuwwa dadendebaa edi darre ilendeetta'a?

8 Mageni ifixxe iimixxe songo'n maa mari'ateexxa laqqeetta?

Manjiinke beltonaa'n beeki atee calla hiyyotebaata?

9 No'o egennennexxi gadhi darre egendeettexxi heente?

No'o anfeebe'noxxi, yaane kinni ati calli affeettexxi heente?

10 Atike anni'a edissaaxxi

arrooteexxi geedhuwwa

yaadiki no'onninni welti hexxeen.

11 No'o darree'n Mageni ate'n

haaso'e jajjabeessa'neexxi atee geltabaa?

12 Godobiki mayee welebaa me'itatto?

Mayeete no'o'ni ille fulichita'etteki?

13 Magenoke'n mufatteetten;

tennexxee elobaaka afo'o Magenoke'n fulchiteetten.

14 «Manji ca'ichchake kada dande'a?

Manjiinki belti qullichchake kadaa?

15 Mageni midde ifixxa erganna adatabaan;

wele waalin iimatixxi iimuwwanna isixxe ille'ni luqqittetebaan.

16 Batto'e cubbo wodu'uffa ha'wa'neek manji fa'i

hittata ca'a hiyya dande'a?✝

17 «Ani hiyyaannexxa caqasi ati'a ifisannon;

uudennexxanna ate'ni haaso'annon,

18 Beekkole annuwwa ifikenaa'ni adhdhiteexxa

aninna ege'nennexxara kula'enne caqasi.

19 Mageni boga insa'ne calli'a uwweemman;

wele gosaki ardi insa'neexxe oddo'n makemeemmabaan.

20 Manjo miica'n tureeki fuggichchi manji,

lubboti hedheeke baro duuchcha'n rakata'nee hedhaan.

21 Baraarassitaxxa yaane calla manshati laqaan;

nage'iinxe yaana'inni isoo mulqedhaaki dagaan.

22 Hashsha fule'e nage'iki higaachcho fakkaatabaan;

shinno'a isoo bagediki heqqinaa'neechcho labbaan.

23 Alaattetike afo'o'ni ibo'a gonga'n

reyaaxxi itti dukkanto barra gelteexxa ege'naan.

24 Dedhange'n bogi iso'n dukkanaan;

mitti moyanji lolo'a qophpheeffatee'naa yaadammake manjishsha yaaddonna rakko iso'n bira saxxaan.

25 Tinni duuchchi kaddeechchi, Magenoke'n jallateen;

duuchchiinxa dande'aaka Gootta shollisheen.

26 Shollishee qicinna jabaxxanna ba'laxxa wonte abixxe

ifi duke'e isi boonchi'a guule daga'neeten.

27 «Alba booneexxi finniso'edheen;

hidhakanna furdatee wo'meedheen.

28 Kunni manji diigemeeke qachchuwwa'n

onuwwake'inna ibo'a dooqemmake minuwwi giddo hedhaaken.

29 Duroomatabaan;

karra isixxinna galdabaan;

buttate'ninna ba'latabaan.

30 Isi reyotixxe dukkananaa'n fulabaan;

giiratiki bubenji qoorseemmake haqichchixxe damuwwashshanna

shafa diidallo harcaassemmake haqqichchishshaten.

31 Is umo ifike ani lumoke hiyye hedaa'n ifi soboqqe'e;

tennenni la'o alfaaxxi hexxabaan.

32 Yanna geltebaang bagammakenna

damuwwa isixxi hanjexxammabaake haqichchishsha kadaan.

33 Raxxaaxxi yaanna geltebaangi harcaatammaxxe woyinetixxe gummashshanna

daraari harca'ammake ejersiinke haqichchishsha kadaan.

34 Mageno ulfeessabaaki manni

sanne belo reyaan;

matta adhdhaake mannik duunkaananna giirate ittaan.

35 Rakko ciniinfante fuggoxxa illaani;

godobi giddo xaqaro hendaani.»