1 Namaatichchi Tsoofari hiisseexxi hiyyee haaso'ee qici:

2 «Konne haaso'i duuchchi'a hiissichcho uwwaaki gophema?

Mitti manji konne qico lallabeexxe'e dhugaatike kada dande'a?

3 Koo Iyoobi! Kunni ati lallabbaateki lallabi no'o haaso'a kuteechcho fakkaate?

Konne qico duchcha no'o'ni geerartatto wodda atee xixaaki hedhebaachcho labbe?

4 Yaadiki Mageno, ‹ani dhugaate'ni hedhenne hiteetteni

Ani ati edo qullichchakeni› hiteetteni.

5 Hita eyyanna'a, silanni Mageni ate'ni haaso'eele

dhuugatika hiissichcho ati'a hiisseele!

6 Beekkuminki ori heddoke kademmaxxee

Gotti konne orika beekkuma silanni ati'a ifiseele

Mageni ate'e xixe'eki xixichchi

xixemiyyo hasissamma jala kadeexxa egendaattani.

7 «Mageniinke beekkumika dhi'mo yaada dandeette egndatto?

Duuchchiinxa dande'aaka Mageno qo'nisse affatto?

8 Magenokee iima bayyateba

ati'a kinni dhaqqabbaboxxo iimi darre

Mageni hundike wiidda'ni hexxeexxe yaane ege'ne

atikinni egendeboxxo

9 Mageniinki lumminni buttatike lumminni caala lumoken;

abbaayyati caalanna ba'laken.

10 «Mageni dage'e atee usureele

murtetixxe songo'ni iyyemareele

ayyetei Isoo hoyya?

11 Mageni dharcha manna eg'needheeni

insa'ne cubbo hunjaawodda sammi hiyye uudabaani

12 Gowwi manji beekake kadee hiyyo

biniinchi manjoke kade ileeme hiyyoteni.

13 «Kaddo malee, ati kinni qalbeti higgetexxi faaci'witottoletaa

anga atixxanna Mageniinbaa bande'e iso soodattottole,

14 Cubbo huja waaldottole

atike duunkaana'ninna fuggoxxa yaane hexxabaashsha assittottole,

15 Ookkone wodda toggi hite

mitte shooki belo baqqi hite'e uuddattoni

mittelchchi'anna ruphphi hitaboxxonig jabattee hexxaton.

16 Rakko atixxa duuchcha deete'e

sa'emmake wodi'ishsha qaabbattattoni

17 Hedho atixxi saafo'iinxa arishsho caaldee iffa

dukkanatinna gorsixxe xa'leshsha kaddaan.

18 Addattettaxxee soda'abelo hexxattoni

Magenikinna atee heqqaammaxxee ruphphi hitaboxxong hafuura adhdhitee nage'iki hexxattoni.

19 Soda'a belo diiphphe kexxatton

heddi manni atenaa'n elle alfo'a hasaani.

20 Fuggaaleeyyetixxi ille affabaani

baanje fullammaki ori duuchchi insa'nenaa'n ba'aani;

insa'nenna udumaa reyotee halchinaani.»