1 Teemaanike bogik manji Elifaazi hiyye hiissee qici

2 Manji Magenokee maa woyifula?

Wele waalni beeka manjo kadeexxenna kaddoolenna isi isinge umi'aate malee

Magenokee maa leba?

3 Ati hujjettexxi eloxxi huje duuchchiinxa dande'aake Mageni'a maa lebba?

Yookaan dedhi mitte belo atixxi hedha isi'a maa lebba?✝

4 Isi ate'n muureechchinna

iitta atee xixeechchi

ati isike jaalo kaddettexeetee?

5 Tinni duuchcha ate'ni gelteek fuuggichcha manjo kaddettexxeetenna

cubbo bira saxxeexxa hujjettexxeetebaa?

6 Dayyuwwa atikee liqeessitetteke maallaqi'a seeri belo abdinsaashsha assitetten;

welekanna seemma mulqexxe adhdhite duwwi gatissetten.

7 Soolo'we dheebote shaqeekee

ite ha'waachcho uuteboxxon

8 Ati fichcha insa'neeka hunnaameeyye jaaluwwa atikee uutetteni;

ati kinni tennee assatee hunna affeetteni.

9 Aro'i reyeexxa melaalluwwa gargaara gibbetten

anna affebaaxxe oosuwwaka galdumanna balleessiteette

10 Tennenaa'ni kexxeexxa kunseten fonxoro qarqara atik'ni fayendeen

deedhanige'n qexeri assaki alayyi ate'n dage'n

11 Bogi ate'n duukkanee'naa affaboxxon;

loola'ikinna atee buqeen.

12 «Mageni iimati iimi darre hedhaakebaa?

Uurjuwwa iima hexxeexxe kaddoolenna

Mageni kinn uurjuwwati immi darre hedhe isee butti'a uudaan

13 Ati kinni ‹Mageni maa eg'ne?

Duumanchi isoo buuqeemmaxxee

maa afee no'o'n mura?

14 Tenne dhisendeexxe iima hana mammaremaa wodda

duumanchi isoo afa kuteen

afabaan hiteetten›

15 Cubbaaleessi manni galaammake

edike galduma'ni galatee eeteette?

16 Insa'ne rennaxxi yanna geltebaang renneen

mine lola'i fottosse aadhe me'ammashsha fottonqeen

17 Insa'nenna duuchchiinxa dande'aaka Mageno, ‹No'onaa'ni bayyati,

maa no'aa assitatto?› hine.

18 Kaddo malee kinni mine insa'neeke'n qabeenna wonsheeki isoten

tennexxe ani konne'e fuggaaleeyyetika yaada adhdhannokebaan.

19 «Mageni fuggaaleessa manna'ni muree'naa

qajeeli manni uudaa wodda;

gammadaan oso'la'ni hiyyaa qici,

20 ‹Mageni no'oka naapha dhuugandin balleesse

karra insa'neexxe duuchcha'ni giira wore hiyyaan.›

21 «Tennexxe koo Iyyoobi, amo Mageniki araarende'e

jaalo atike assedhdhi

iitta assitoottole, Mageni atee eebbisaan.

22 Mageni atee barisiissa'neexxa barachcho adhdhi

hiyyichcho isikanna godoba galchedhi.

23 Duuchchiinxa dande'aake Magenibaa higgottole,

edo hexxetta woddishsha kaddatton

fuggoxxa huja atike duunkaananaa'n bayyisottele,

24 Worqe bukote'n hundottole,

Ofiirixxa worqenna wodii giddike kinjishsha darbittotole,

25 Ookkone wodda duuchchiinxa dande'aaki Mageni ati'a

worqetanna ca'ichcha birreti sibiljo kadaan

26 Ookkone wodda duuchchiinxa dande'aake Mageno'n gammadatton

isinni welti mittoondattoni.

27 Isoo soodattatto wodda soodachcho laqaan,

soodatetexxa duuchcha laaqaammxxee

wereega isi'a uutattoni.

28 Hujjottaa heddeettexxi duuchcha ati'a qaajeeldaan

me'itattoke ora duuchcha'n ifi ati'aa ifaan

29 Mageni hollaameyye shookishaan

salphatemmaka manna kinni gargaaraan

30 Anga attixxi qulloomatenaa'ni kexxeexxa,

cubbaleeyye fayyitaani;

nage'ikinna me'itaani.»