1 Ta'anna Eelihuumi lebe haaso'e hiyyee qici:

2 «Mageniinxee haaso'aannexxi wele yaane hexxeemmaxxee

ate'n ca'a asse haaso'onnaa shiixxoxxa yanna ossite laqi.

3 Magenokenaa'n alfenneke beekkuminni

anee dadeeki Mageni dhugaatike kadeexxa kulaannen.

4 Haaso'i aniki dharake kadebaaxxa koki;

atinni welti haaso'aanneki ani woo'ma eg'na afennexxa ege'n.

5 «Dhugaaten, Mageni hunnaameessaken

ayyeenna tuffattabaan;

isi duuchchiinxe ege'neen.

6 Isi fuggaaleeyye lubbo galchabaan

miicemeeke manni'a kinni dhugaati muraan.

7 Mageni qulliyye heqqaan

insa'nee moyanjuwwiinsha mootete'n ofo'lisheexxi duuchchi wodda insa'nee ulfeessaan

8 Yaane kinni manni haachchabik uusuremoole

yookaan rakkotixxe fonxoronni abidemoole,

9 Ifi saadat

hunjeexxa cubbo Mageni inssa'ne leellishaan

10 Xixichcho lanqaashsha mansha insa'neexxa banaan;

fuggoxa huje waallee aadde aangaashsha insa'ne ajajaan

11 Magenoke ajajeemma'n ergatemmoole

gataaka baro insa'neeka goddikinna gammadiki sa'issinaan

12 Isixxa laqa ginboole wolaantichchik* mundaan

ege'na belonna rennaan.

13 «Qalbe giddo Mageno addatabaaki duuchchi wodda aara'nee hedhaan;

Mageni insa'nee mura woxisaa wodda gattowaall alfino'a soodantabaan.

14 Labbaki labbaken yabaabuleemmaxxee qoommeemman,

ka'umummande'n rennaan.

15 Mageni rakkote'n hedheekaara rakkotenaa'n insa'nee anjiraan;

gelteexxe rakko darre'n insa'nee ille manshanna banaan.

16 «Ta'a tennee yanna'ninna Mageniinxi halcha atee rakkoti giddiini fulcheexxi elollaa ita,

qore wo'nshite ittattokee galdumi qico'n geltattoshshaten.

17 Ta'a kinni balleessanjiinxi murte ate'ni murendeemmaxxee

geltaaxxa rakko adhate'n hexxetten.

18 Ayyinna atee karratixxe bira sa'nenni sobabaashsha

mattikinna atee dedhisabaashsha heqqedhi.

19 Atixxe karraninna

atixxe hunnake jabeenninni

rakko giddii'n fula dandeettabexxon.

20 Ardi ibeeba gophemaaxxi,

dukkanatixxi barra daggaashsha halchitoxxe'e.

21 Higgetexxi fuggoxxa hujjabexxoshsha heqqedhi;

rakkoti hega uudendaa'eettengechchi tennexxeeten.

22 «Mageni hittee qico hunnaameessake kadeexxa qaabbati;

isi duuchchiinga sa'aake barachchiissallon.

23 Mageno iitta assi hiyye ajajaaki,

yookaan, ‹fuggoxxe hujeetten› hiyye aallataak ayyete?

24 Manni faaroti saadeemmaxxa,

isixxa huje atinna saada deettoxxe'e.

25 Manji duuchchi Mageniinxa huje uude'een;

mannikinna bayya hedhee isee afe'een.

26 Kunse Mageni no'ooxxe sammo iimi darre lumoken!

Isike barika laakkossanna ege'naa dandeessissabaan.

27 «Isi wodi'iinka shamina buttii'ni iimi'a aadhaan;

xeenakenna asseexxi gansiisaan;

28 Duumanchii giddii'n wodi'i butti'a lola'aan;

baradikinna manjiinxe saanne duuchcha'ni ganaan.

29 Kaddo malee Mageni duumancha hitta diriirseexxanna,

ifike minenaa'n dindinsoti hitta dindima'neexxa

ege'na dande'aak ayyete?

30 Mageni eettenee dhi'mo abbaayya buqeexxi,

iseke qarqara'n ifixxa banqo hitta facaasa'neexxa uudi.

31 Konne qicinn Mageni arda ifika galcha'n,

itaachchonna geyaa qico'n isi'a qophpheessaan,

32 Banqotanna ifixxe anganni abidaan;

mureeba'anna ibbaashsha ajajaan.

33 Dindinso jabaki xeen gana'neexxa kuldaan;

horikinna midde hobonbalte dagga'neexxa ege'naan.