1 «Manjiinke beltixxi wogga harumaxxen,

ittinni rakko callixxen.

2 Bada'atike daraarishsha leelle'e rake ba'aan,

gaaddiddotishshanna turebaang sa'aan.

3 Mayeeta at iitta hedhennexxa dada anee manjo hordoffa'etteki?

Murte ane'n uuttotaa songo anee shiqishshatto?

4 Batto'eechchonaa'n ca'ichchalchcho afa dande'aak manji hedhee?

Mittikinna midde dande'aak hedhebaan!

5 Manji hedhaaxxa wogga ati edonni murteettexxen;

laakkossa isekanna egendee birteeten;

atixxe murtexxe woggaxxa gabala sa'aaki hedhebaan.

6 Maallaqakee mannakee hujaaki manji huje biraa wodda gammadammashshan,

manji hucce galaake baro'ni gammaduun waal.

7 «Haqichchi karemoole

kichcho tutunjokenaa'n lata

damuwwatanna haaroba

daddadha dande'aan.

8 Hiddi isiki buttini giddo ture cimoole

kunni hiddi buttini giddo alo'oole,

9 Shamina wodi'inka alfoole langaxxe quuxxisaan;

wele haaroke haqichchishshan damuwwa fulchedhaan.

10 Manji kinni reye gataan;

reyeechchinni udumi'a haba afema?

11 Abbaayyati wodi'i bage xo'o hiyyammashsha

galaniki wodi'inna bagammashsha;

12 Iittanni manji reyeechchi udumi'a langaxxa higabaan;

iima saxxaa qico'n diiphemmanba gataan.

13 «Silaani anee reyeemmaki manni hedhammaba shoxxeettele,

mufe balleeffattato qico'n leella gopheennelenna,

ookkoo'n anee qaabbattattoxxa barra kuldeettele.

14 Isi manji reyeechchi uduma

higee hedhoti hedha'neechcho?

Hafuura adhdhannoxxi yaanna daggaa qico'n

konnee rakkotikanna abariinka baro

oosse sa'annon.

15 Ookkone wodda atinna anee yexxatton;

aninna hee hiyyannoni,

dada atinxa anee uudotta'a yortattoni.

16 Ookkone wodda anxe takkaarroxxa faana qortatton,

kaddo malee cubbo anixxa heddabexxon.

17 Usurre hunnemeemmake korishsha;

balleessa anixxa duuchcha anenaa'n fuggusitatton;

cubbo anixxanna ani'a birtatton.

18 «Tenne butta'n kinni

kooba tiggaaxxa

kinjikinna ifixxe bakkanaa'ni fottoqaaxxa,

19 Wodi'i kino qote birammashsha,

lola'i yo'oki buttina anshe birammashsha,

atinna iittanni addatammalchchonaa'n manjo hanqissatton.

20 Mittele hunnati isoo injifatte,

isoonna ibeeba gonphaan,

bifa isixxa jijjiirte'e ifi edii'n hoyyitatton.

21 Oose isixxa manni ulfeessa'nuu ege'neba'a,

ardi insa'nee fuggoxxa hiyya'noolenna afaba'a.

22 Isii ege'neechchi biso ifikixxe dhibo callan,

ifixxe rakko calli'a oodhaan.»