1 Ookkoneechchi uduma Eelihuumi lebexxi hiyyee qici:

2 «Koo, Iyyoobi! Ani Mageni edo qullichchake hitaatexxi seerakee?

3 Mageno ‹Ani cubbo huja gophoonnole ati maa la'o alfitatto?

Aninna maa lephphanno?› hitee qorteetten.

4 «Ta'a ani ati'aanna atinni welti hedheeke jaluwwa atikee

hiissichcho uwwaannen.

5 Toggi hitee iimi'a uudi

iimi darre hedheeki duumanchi atenaa'n hittee qicco bayyatte hedhexxa qalbefati.

6 Cubbo hujjoottole Mageno maayiki miitatto?

Balleessa lebbe bira sa'issite hujjootole isoo maa assitatto?

7 Qullichchake kaddottole Magenokee maa lebbatto?

Isi atenaa'n alfaachchi hedhebaan.

8 Cubbo hujjoottole mittattoki atishsha hedheenge manjon,

eleoxxa hujjettexxi la'o uutaaki manjongeeten.✝

9 «Mannik miiccami insa'neni birasa'oole

miicammakixxe anganaa'ni wodaaka alfatee raarraan.

10 Yaane kinni, ‹Ane dademmaki Mageni

manni lumoxxe rakko giddo faaro farsaashsha assaaki,

11 Biniinchi caala no'o bararachchiisaaki

ci'ati caalanna beekake kandannoshsha assaaki? Isi haba hedhe?› Hiyyaaki hedhebaan.

12 Insa'ne raarraan Mageni kinni hollaameeyyetenna fuggaaleeyyete kandeemmaxxee

hiissichcho insa'ne'a uwwabaan.

13 Dhugaaten, Mageni dhariinxa soodachcho laqabaan;

Duuchchiinxa dande'aaki Mageni wirri hiyyenna insa'nee uudabaan.

14 Mageno uudebe'no hitottolenna

yaane atixxi isi eddo hexxemaxxee ossite heqqedhi,

15 Iittanni Mageni mufate mura woxisabaake

manji fuggoxxa assaa woddanna bashshi hiiyyeexxi waalaake ate'n labbee?

16 Koo Iyyoobi! Woyi fulabaaka haaso'a tolanga bira sa'isitaaten;

hitaattexxanna egendebexxong ca'li hitee haasotaatten.»