1 Barratixxa barra Duuchchi Woddike Goottixxi Mageniinxi erganna Duuchchi Woddike Gootti edo bukki hite shiqqee wodda durriisikinna insa'nenni mittemba afeme.

2 Duuchchi Woddiki Goottinna «Habaa'ni daggette? Hiyyeexxi durriisa qore; durriisikinna buttate'ni elqenna kayya maremaannani» hiyye.

3 Duuchchi Woddiki Goottinna durriisa «Erganjo anika Iyyoobii'i meya hubatte uuddeette? Isishsha hedheeki dhugaatiki eloki manji buttate'ni hedhebaani; isi elobaaxxe duuchchanaa'ni bayyate'e ane'e sodata'neeke addateme'eke manjon. Isoo balleessitottaa eetii'i ati'a uwonna'a anee tirtiirsiteettek dharkiten; ta'atenna kaddoole Iyyoobi woldishshanni addatenshat'eni jabaate'e hedheen» hiyye.

4 Durriisikinna hisseexxi, «Bisiinke gogiinxa bakka bisiinka goga» hiyyendeemmashsha «Manjiqqa lubbo ifixxa gatliso'a afeechcho duuchcha uwwaan. 5 Yaane kinni biso isika duuchcha gande'naa miidhemeele uuddaa'naanni Ate'e yowwaan.»

6 Mageni Durriissa, «Eloxxeni, iso shiltoxxe malee eetettexxa assi» hiyye.

7 Okkonechchinni udumi'a durriisi Mageniinbaa'ni ke'e me'eexxi Iyyoobi umokenaa'ni lekkati qico'ni bisi duuchchi mado'ashsha asse. 8 Okkonechchi udumi'a Iyyoobi bululo hunnammaxxe kose iima ofo'le mada balchiki hoqoolqate'ni ke'e.

9 Are isixxinna «Ta'anna ati Magenonge addatta'eet? Tenne mannii'ni Mageno yowwite reyi!» hite.

10 Iyyoobinna «Hitta Magno egendebaaxxe melaalleka haaso'a haasottette? Mageni eloxxa yaane no'a uwwa wodda gammadiki adhdhinnanno; rakko no'o'a uwwa woddata iso'ni gungummanno?» hiyye.

Iyyoobi tinni duuchcha rakkonna abara iso'ni geltoolenna fuggoka afo'o Magenoke'ni fulchedhe cubbo hujebaani.

11 Teemaani hinaake bogiki manji Elifaazi, Shuha hiyyemaake bogiki manji Bilidaadinna Naa'ima hiyyemaake bogiki manji Soofaari; kunni sasiing manni Iyyoobike jaaluwwammani; insa'nenna Iyyoobi'ni gelteexxa rakkonna abara lanqeexxi lanqo'anna jajjabeesino'a ifi ifike boganaa'ni fulle'e mitteba Iyyoobibaa dange. 12 Hanqonni he'ne'e Iyyoobi anfe, kaddo malee kinni Iyyoobite kadeexxa ege'nineemmaba'a; isumma egenneexxinna yaandeemmaxxee ifi fixxa seemma daddarra'n, buko ifi ifike umo'n fifilxina'n oo'ne hunbaashshine. 13 Hittee qico rakkateexxa uundeemmaxxee mittelchchonna iso'ni haasonnebaang torbaane barranna hashsha isi bira buttinake'ni ofolle turre.