1 Ookkooni Iyyoobinna hiisse hiyyee haaso'ee qici:

2 «Dhugaaten, ha'no beeka mannani

ha'noobaa uuduma beeki manni hedhaachcho ha'no'ni labbabaani!

3 Kaddo malee kinni

aninna ha'noo qicika heduma afe'enneni

hoone orinninna ha'noni butti'a hedhabe'noni

ha'no haasoottineexxa duuchcha ardi duuchchi ege'neexxebaa?

4 «Mageni soodachcho anixxa laqe'e hiisseexxe yannaara hexxemmani

ta'a ani, jaaluwwi aniki ane'ni oso'laake kadenneni;

mitte dedhibelo hedhennaki, qullichi manji manni duuuchchi ane'ni gebaake kadeenneni.

5 Rakko geltebaa manji

rakkateeka manjixxa rakko tuffata shoollaxxen;

yaane kinni ibbo'a timmi timmi hiyya'neeka ookkoe manjo ha'noo darbtinaan.

6 Mulqedhaake mannik duunkaani weekamabaan;

hunna ifixxenni Mageno ajaja'neeshsha hedaakiir

Mageno mufachchiisaakiir nage'inginni hedhaa'neeni.

7 «Yaane kinni biniincha laqi atee barachchiisaan;

ci'a qor, ate'n kuldaani.

8 Yookaani buttixxanna woddi'i giddixxa daduwwa hubatte'e uuddee barattatton.

9 Konnechchuwwi duuchchinaa'ni Duuchchi Woddiki Gootti anga Ifixxini tennee asseexxa ege'nebaak hedhee?

10 Hedho affeexxi dada duuchchinna;

mitte mitte manjixxi lubbo Mageniinxe anga'ni hexxeeni

11 Manji ita arrabiki maqe'e xeema busha ege'nammshashanni

manshati haaso'a laqe'e elo yo'oka gargari hiissaan.

12 Woggati lummedheeki manji

beekkuma alfaan.

13 «Mageni kinni beekakenna hunna callikeni

Isi mambe'a gorsaallonna ege'naa afeeken.

14 Mageni diigoole ayyinna hiisse ijaarabaani

Mageni usuroole ayyinna tikabaani

15 Mageni xeena ganabashsha assoole caami dagaani

xeena ganaashsha assoole kinni lolaase butta duchcha'ni yaa'aan.

16 Mageni jaabakenna eeyyeexxa assaakeni

sobaakinna kadi soobemaaki manji,

lamiing anga Isixxe'n hedheen.

17 Isi hayyoole beekkeumi belo gatisaani

arda galchaammaka mannanna gowwake assaan.

18 Isi moyanjuwwa insa'nexxe mootenaa'ni dirrise garbake asaaani

motummatixxa seemmanna insa'neenaa'n fulcheexxi garbummatixxa oddeessaani.

19 Isi qeese qeessummatenaa'ni gatiseexxi shoraani;

arda galchammakaaranna baallomakenaa'n hoyyaani.

20 Ardi addataammaka manna sammi assaan;

geedhetanna beekum belo gatisasn.

21 Hayyoole shokishaani

jajjabbakanna hunna gophisaani

22 Dukkana giddo hunda hedheechcho farri asse lellishaani

dukkanna dimmanna ifake'ni jijiiraani

23 Isi gargari hexxeexxe gosaka arduwwa lummise'e gurra fulchaani; wirri asse'enna balleessaani;

arda bira sa'issaan; ittanni xexxeeraan.

24 Arda galchammaka manna gowwake asse'e;

ori hedhebaxxe qilla gammojje giddo doonisakiyya hinaashsha assaani.

25 Dukkana giddo titimmisaashshanna;

machcho'eemmake manjishsha gatantaraashsha assaani.