1 «Dubarte gaabbetixxe illeni uudabo'noshsha kakateenneni.

2 «Iimii'n Mageniinbaa'ni

manjokee muremeeki manjinki qoobbi maachcho?

Iima hedheeke duuchchiinxa dande'aaki Mageni

manjokee uwwechchi maachcho?

3 Fuggaaleessa manjo'n ba'ne elobaaxxa hujaake'n fuggoxxi ege'nendaaxxebaa?

4 Assennexxa duuchcha Mageni uuda'nebaa? Takkaarro anixxa duuchcha dooyyaakebaa?

5 «Dhara haaso'enneexxe kaddoole

lame afo'ike kadoonnole

6 Mageni dhuugatixxe mike'n anee mikowwaali;

balleessa belo hedhenexxanna ege'nowwaal

7 Dhugaatike oranaa'n goreennexxe kaddoole

ille anixxi uuddeexxa duuchcha goodobiki yorennexxe kaddoole

anga anixxinna cubboti xurootteexxe kaddoole

8 Ani facaalsenneka weli manji itowwaal

midha anixxanna goggonshe birrowwaal

9 Wele melaalle'a godobi anee jammi hiyyoole

anke ollalchixxa are aadhonnaa gaabboonole,

10 Are anixxi mannakee garbake kadde'e daltowwaal weli labballi isenni welti galowwaal 11 tinni fuggoxxi hujee seeri mura woxissaaxxe

lumoxxe balleessanni. 12 Tinni cubbo giiratishsha gube'e manjo balleesitaaxxee

ani tenne cubbo silan hujeennele horatenelcho duuchcha silaa balleese biramman.

13 «Meyya labbak aniki erganjuwwi ane'ni ku'leexxa yanne tuffate waaloonole,

14 Mageni edo murtetee uurranno wodda

maa kadoonaa hedhenne?

Anee qoraakee qortumi'a maa hiyye hiissonnaa hedhenne?

15 Anee ama anixxike gadaameessi giddo dadeeki erganjuwwa ankanna dadeengeba?

Duuchchiinga no'o gadaameessi giddo dadeeki isondebaa?

16 «Hiyyeeyye kadhateechcho hoyeedhe ege'nebo'no,

aro'o affebaaxxa melaalluwwa ooxxaana'a waale ege'nebo'no,

17 Anna affebaaxxi oose so'lo'witaa'naa

qofi ite ege'nebo'no

18 Yaane kinni oosummatenaa'n ta'i qico'n insa'ne'a anniinsha kadeenne

baro anke duuchcha'n aro'o affebaaxxa gargaarenneni.

19 Mitte manji daaree'naa yookaan mitti rakkichchi

oddo'waachcho gophe'e duwwi hedhee'naa afe'ee,

20 anke gedhebixxe oordanni hujendeexxa seemma oddeese'naa

eebbe'e ke'eexxi anee eebbisebaak hedhebaan.

21 Murtetixxe songo'n haaso'ennexxa duuchcha adhdhinaaxxa ege'nonnolenna

anna affebaaxxa oose miidhonaa anga anxa insa'ne'n wirri asse ege'nebo'noni.

22 Tennee duuchcha assebo'noxxe kaddoole anga anixxi ceekotenaa'ni goshendowwaal;

mikitake'ni enqende qurubbi hitowwaal.

23 Mageniinxa bala ani sodaataannen;

isike gaachchannannaa'ni kexxeexxinni mitteelchchonna assa dande'ebo'non.

24 «Ille anxa karrate'n uggudhdhe eg'nebo'non

yookaan ca'itte woorqe'inna addate ege'nebo'non,

25 Karra anxi bira saxxeen

duroommee heddo maallaqa alfeennen hiyye gammade ege'nebo'non,

26 Arishshotixxa bifa

agenjiinka wa'ichcha ifa uude'e,

27 Konneechchuwwa sho'iki Magenoonfaton'naa sobemebo'non

boba ga'na'n konnechuwwa ulfeesse ege'enebo'non

28 Iitta assa iima hedheeke Mageni edo addatema gophatee kaddemmaxxee;

iitta assa Mageni reyotixxa murte muraashsha assitaaxxe cubbon.

29 «Anee gibammaki manni rakkataa wodda gammadebo'non

yookaan fuuggoxxi yaane insa'ne'ni geltaa wodda ililisebo'non

30 Naapha anka biro'a Mageno soodata'n

cubbo huje eg'nebo'non.

31 Anke bitumiki manni

‹Isike minenaa'ni itee goddebaaki hedhee?› Hiyye dhugaa haaso'aan.

32 Ora me'aaka manna adhdhenne malee;

keessunsa gophe'naa'a gadho galeeki hedhebaan.

33 Balleessa anxa ifi giddo sho'edhebo'non;

wele mannishsha cubbo buqedhebo'non.

34 Ardiinxi bira sa'ne anee alallishitee'naa

mini hadixxi cee'manna anee sodaachissee'naa;

cuqqi hiyyebo'noki mine shoomennexxi yanna hexxebaan.

35 «Silanni hiyyennexxa laqaaka afennele!

Hiissichcho anka konne kokeessannan; kunseten ank beessisi.

Duuchchiinxa dande'aaki Mageni ani'a hiissichcho uwwowwaal!

Anee ku'la'neeki ku'la'neexxa yaane silaan borreesse shiqishee'na'a afennele!

36 Silaan dhugaa duuchchiing leellishsha duggumote'n dulke'e

kallachchiinsha albake'ninna uggudhdhannan.

37 Mitte hayyichchishsha Mageni edo shook belo qokki hiyye'e;

assennexxa duuchcha mitte mitteti iso'n kulannan.

38 «Fichchuwwiinka annuwwa miice'e;

hunnati qadaada insa'neeka adhdhe'e hucconnole,

39 Fichchuwwiinka annuwwa yaadise'e;

mitteelchonna uwwebe'noki daffa insa'neeka iitoonnole

40 Iikki bogi dinnetixxe bakka'ni ute;

soo'iinxe bakka'ni anso fulchowwaal.»

Iyyoobi haaso'a uurrise.