1 Hafuura afebe'noni;

hedhaanneki barinna haru'meedheen;

baletinna ani'a ummende'e qophphotteen.

2 Anee oso'laaki manni boga duuchcha wo'meeni;

anee miina'neexxanna uudeennen.

3 «Ee Magenoo! Anxe yaane'ni atee malee haaso'aaki hedhebaani;

atinni calli ani'a annake kadi.

4 Hende egennabaashsha,

heduma insa'neeka duuchchiteetteni;

tennexxee anee injiffantaashsha assitaboxxoni.

5 Alfaaxxe la'oxxee hiyyeexxi

ifika jaalo sa'isseexxi uwwaaka manjo

isixxe oosexxi ille baxxa.

6 «Mageni anee manji geebaake manjo asse;

manni ane'n cirqataake manjo kadenne.

7 Yaadotenaa'ni kexeexxa ille anee jululli hiteeni;

qa'late'e gaaddiddote kadenne.

8 No'o dhugaatikeni hiyya'n hedaammaaki manni alaayyeen;

no'o qulliyyeteni hiyyaammaki manni

anee fakkaataake Mageno ulfeessabaake manjo'ni mufateeni.

9 Qullichchi manni dhugaatenaa'ni gorabaani;

Mageniinki manninna hunnande'nni hunna lephpha'nee me'aani hinaa'ni hendaani.

10 «Duchchiingi higgeenna daginne'e edishsha haasottineele;

ha'no giddii'ni mitte beeka midde afabo'noxxa ege'neennen.

11 Bari ankinna mude'eeni;

yaadi ankinna anxe qalbexxi halcha tola gatteen.

12 Kunni manni hashsha barrate hiyya'ni

ifa kinni dukkanate hiyya'neen.

13 Konnechchinni edi'a heqedhdhaanneki

mini anki hirreessakeni;

ma'na anxa dukkana giddo fa'annoni.

14 Hirreessi, ‹Anke anna,› kadaan;

anee ittaaxxi corroquwwa, ‹Anixxe amanna anixxe dayyo,› kandaan.

15 Anita addatannolchchi maachcho hedhe?

Ani'a kaddaaxxa yaane uudaakita ayyete hedhe?

16 Addatannolchchi aninni welti bale giddi'a me'a?

Mitteba aninni hirreessi giddi'a e'yaa?»