1 Shuha hiyyemaake bogiki manji Bilidaadi hiyye hiissee haaso'ee qici:

2 «Koo Iyyoobi! Mayeete haaso'a bira sa'issitaatteki?

No'onna haasonno; sammi hite'e caqasi.

3 Mayeete ati no'oo mittelchcho ege'nebaake horishsha assitaatek?

gowwiinshanna mayye no'oo uuddaattek?

4 Mufattottole atende ifi miitatooni;

ati mufattettexxee Mageni butta duwwi gatisaba'a.

Atixxe mufe'a kinjjuwwwa hedhemabaa'ni lele'misabaan.

5 «Fuggaaleessi manjixxi hedho xassiinsha baxxaan;

langaxxa xabammabaake giiratike bubenjishshaten.

6 Isi ifi xo'eeke minsha kadaan;

xabamak xassinna xo'aan.✝

7 Tarkaafatammaxxa hunna gophaan;

mannakee heddammaxxi fuggonna isoonni ibaan.

8 Ifiixxe lekanni mareexxi fonxorote'ni e'ye gangalataan;

9 Fonxorotinna lekka isixxa abiddeexxi

silli assitaan.

10 Buttinake'n wodaro isi'a fayende'een;

me'aake ora'ninna fonxoro uggende'een.

11 Qarqara isike'n sodaachchiissaaxxi yaane gunde'een;

isoo udumii'ninna hordoffa'n shorrita'neen.

12 Isinna solo'ik hunna gophaan,

jabaxxe rakko'ninna ibaan.

13 Bisi isiki alagonpheti huqqataan;

reyotinna isoo adhdhitaan.

14 Na'ge'iki hedhaammake duunkaaninaa'n xuqqi hiyyaan;

manjo duuchcha'n mooteexxi iitti reyo iso'n geltaan.

15 Mini isik giddo mittilchchinna gataachchi hedhabaan.

Isike galduma'ninna diin fifixendaan.

16 Isi, hundii'n hiddi bagee'naa,

shafuwwi harca'emmake haqichchishsha kadaan.

17 Buttate'n isoo qaabbaataaki hedhabaan;

summi isikinna buttatenaa'n ba'aan.

18 Isi lubboti hedhaammake mannixxe oddo'n,

ifakenaa'ninna dukkanatibaa hunemaan.

19 Ifike ardi giddii'ni ila belo gataan;

isike mine'ninna ofoldaaxxi isixxi ila hexxabaan.

20 Boroti darrekinna dhidhimi darreki manni

iso'n gelteexxa rakko laqeexxi alaayye qexer hiyye.

21 Woldonni fuggaaleeyyetee uudu'maachchi konnenden;

Mageno sodaatabbaake mannixxinna tennenden.»