1 Eelihuumi lebeexxi haaso'a'ni hiyyee qici:

2 «Ha'no beekkole haaso'aannexxa laqqe;

ha'nonna qaroole hiyyaannexxa caqqasse.

3 Arrabik itatixxa xe'me egenammashshann

manshati haaso'a gargar hiissine egenaan.✝

4 Amme dhugaatixxa yaane fille egeno;

eldaaxxa yaanenna mitenba baranto.

5 «Iyyoobi hiisseexxi, ‹ani qullichchaken Mageni kinni dhuugaatixxa murte ani'a mura gibe.

6 Ani dhugaatinge kadeenn hedhee dharichchiinsha uudemeenne,

mitte balleessa afebe'no manji

fayyitabaaxxe madanni rakkata'eennen.›

7 Iyyoobishsha Magenoke'n roorreeki manji hedhee?

8 Isiki jaaluwwi fuggoxxa hujaake mannan;

hositi insa'neekinna fuggoxxa assaake manninniten.

9 Isinna hiisseexxi, ‹Mageno gammachchiisa

manjokee mitte la'onna uutabaan› hiyyeen.

10 «Ha'no qalbeeffatinaaki manni hiyyaannexxa caqasse! Fuggoxxa assa Duuchchi Woddike Goottanaa'n,

daba huja duuchchiniinxa dande'aake Magenonaa'n bayyattowwaal!

11 Mageni manjokee huje isixxishshann uwwaan;

me'a isixxishshanni hira isi'a uwwaan.✝

12 Duuchchiinxa danide'aaki Mageni haranga fuggoxxa yaane assabaan,

ayye'ninna dhugaa dassabaan.

13 Butta Magenoke'ni maganne uwweedheeki hedhebaan;

buttate'n hedheechcho duchcha'n moyaashsha harireekinna hedhebaan.

14 Mageni uffu hiyyeemmaka ifika hedhotika hafuura

ifibaa hiissedhe aadho'a hedeele,

15 Manjoke hiyyemeek duchchi mittenba mudeexxi

hige buttinake kadamman.

16 «Qalbeeffattaattole tennee laqi;

haaso'aaneka haaso'anna caqasi.

17 Dhugaa eeyyabaaki moya dande'a?

Qullichchakanna lumoka Mageno ballesesanjoke assitatto?

18 Moyanjo ‹Ati woyi fuldabexxoken›

ja'laabuwwakanna, ‹Ha'no fuggaaleeyyeten› ayyete hiyyaaki?

19 Mageni duuchchiinga anga isixxen dadeemmaxxee isi ja'laababuwwakeenna gamisabaan,

dureessa hiyyeessakenaa'n caalchiseexxi uudabaan.

20 Manni hashsha wodhakka dedhange'n reya dande'aan;

ardikinna roqoonse ca'li hiyyaan

worba manna hiyyemaakinna manjiinxi anga kissebaang gophemaan.

21 «Mageni manji me'eeka ora duuchcha afaaken;

mitte mittingixxa takkaarronna uudaaken.

22 Fuggaaleeyye Mageni edii'n itti shoo'onde gattaaxxi,

dimmi dukkana haranga hexxebaan.

23 Manji isi edo murtetee shiqo'a,

Mageni yanna isi'a woxaba'a.

24 Galchalluwwa insa'neke baalloomanaa'n ibiseexxi

bakka insa'neexxe'n wele uggo'a qorte maraba'a.

25 Tennexxee huje insa'neexxa eg'neemmaxxee

mitte hashsha'n mootummatena'n fugussee balleessaan.

26 Hujjeemmaxxe xaqaro'a

cubbaaleeyye manji edo mura woxisaan.

27 Tenneenna insa'ne'ni assa'neechchi Isoo hordofa waaleemmaxxeetenna

seera isikanna balalli hineemmaxxeeten.

28 Hiyyeeyye miince Mageniinba raartaashsha assinee

Magenkinna raare insa'neexxa laqe.

29 Yaane kinn Mageni sammi hiyyoole, ayyi isoo aallata dande'a?

Alba isika sho'edhoole, ayyi isoo uuda dande'a?

Isi manjokena'ninna, gosa gosake ardi iimi darren.

30 Tinninna kaddeechchi jallichchi manji arda galchabaashsha,

arda gibaaki moyanji fonxoro insa'ne'a fayabaashshaten.

31 «Dedha mitti manji Mageno,

‹Ani ta'i qico balleesseenne; langaxxa balleessabe'non.

32 Heenee cubbo hujennexxa ane'n leellishi

balleessoonolenna langaxxa higabe'non hiyyee manji hedhee?›

33 Eega ati aadde aaga gibbaattelchchinni ati shiqishshaatteke yaadishsha

Mageni halcha atixxa muuxxaani hitee heqqitatto?

Tenne atende ifi'a mudhdhitattoxxe malee ani ati'a murabe'non

tennexxe ati egendettexxa haaso'i.

34 «Hiyyaannexxa laqa'neeki beeki mani duuchchi

qalbeeffata'neeki manninna ane'ni hiyya'nee qici,

35 ‹Iyyoobi haaso'anee malee ege'nechchchi hedhebaan

haaso'i isiki giddo mitte gumma hexxebaan.›

36 Fuggaaleessi manni hiissammake hiissichcho hiissemmaxxee

Iyyoobi geyaa qico'n hega uudemuummadu!

37 No'o edo seera sa'iyyoti

Mageno haaso'ik hurqiyyot tuffateen

Iyyoobi cubbo huje'e jallotanna lephpheen.»