1 «Leewaataani hiyyemaaka Abbayya giddika biniinchcha malxaaqqoti abbaayya giddii'ni dandeette abidatto?

Yookaani afo'o isika wodaroti dandeette bixaaldatto?✝

2 Sano isixxe'nni malxaqqo e'yishshe'e

qeqqeshsha isike'ni malxaqqo uggite'e dandeette abiddatto?

3 Isi'a marartattoshsha atee kadhataa?

Atee sobata'nee?

4 Ati'a garbumma hujo'aa duuchchi wodda hedho'a

ati'a ishshi hiyye ajajemaa?

5 Isoo ci'atishsha abidde'e usurtatto?

Yookaani duubarri atik daa'wataashsha usurte waaldatto?

6 Qulxu'metixxi daddalto isoo hidhdhito'a gadhaffa?

wowoxxe'e qoodenda?

7 Eetetteba goga isika bagedik urte

umo isika wolaanitichchiki woxxa'ni kochchissatto?

8 Dandeettottole angati isoo kiisi

isinni welti abixxitatoxxi wo'lanichcho hara deetaboxxoxxe kaddaan

higge langaxxa isinni wo'laancho abixxitaboxxon

9 Leewaataani hiyyemaake biinchinni welti wo'laancho abixxe'e injifatanno hiyya dharaken

iso uudeeki duuchchi alaayye'e gilgilaan.

10 Eeganni iso shiyiyyo konne qico a'urtoole

anee moroma dande'aakita ayyete?

11 Iimati butti'a hedheechchi duuchchi anilchchoni

hiissannoshsha ani'a liqeesseek ayyete?

12 «Laawaataanixxe lekkaxxara; hunna isixxike jabeennixxara

elle biraaki isike bisixxara haaso'ebo'nok waalabo'non.

13 Isika dibba goganna

kallaada isika dande'e dulaaki ayyete?

14 Tennee yo'oshsha sodaachchissaaxxi isixxi isso hexxeeka afoo'o maaqe'e

ayyete qeqqeshsha isika maaqaaki?

15 Isike dudduriki gogi googeessiki cayyendeexxe wontuwwashshaten

yo'oshsha weli iima dhabbite'eemmaxxee sibiljiinsha jabaattaan

16 Mitti mitteke'ni jaba qicinni dhabbemeemmaxxee

diidallo midde oddotenaa'ni saxaa qici hedhebaan.

17 Duuchchiing mitti mittiki welti dhaabbemeeke kaddeemmaxxee

mittilchinna welinaa'ni dande'e garar hiissa dande'amabaan.

18 Isi heexifataa wodda

ifi xalaqisa'n leellaan

ille isixxinna gorsixxe arishshoshsha iffaan.

19 Afo'o iskenaa'ni giiratiki bubeni fulaani

giiratixxi qaanqenna facaataan.

20 Meshe dhaanbeexxe boosonaa'n fuldammaxxe wiliilleshsha

sano isixxee'ni wiliille tuqu tuqu hitaan.

21 Afo'o isikeenaa'ni fulaaki eebbinji giira ha'ishshaan

giiratiki bubenjinna afo'o isikenaa'ni fulaan.

22 Goobi isikixxi lumma hunna affeenni

albi isikiki gaachchanni yo'oshsha sodaachchisaaken.

23 Maali isiki weli iima dhaabeemeeke kadeemmaxxee

bisi isiki sibljinshhsa jabaatanai.

24 Godobi isik kinjinsha jabakeni

jabeenni isikinna daamiinke kinjiishshaten

25 Kunni biniinchi ke'aaxxa yanna

hunnaameeyye midde alalte gilggiildaan.

26 Fedheeki bagedi wolaantichchikinna marciki ontoole

isoo maadoossabaani.

27 Bagedi iso'ni goroole micciinsha bututaan

sageetto giisinaaki sibiljinna quqi iteeke haqichchishsha bullo'aan.

28 Gabe iso'ni darbinoole sodaate baajabaan

looyyatiki kinji isi'a hicaaciinshaten.

29 Mogidi isi'a badda'atishshateni

bagedo iso'ni darbinoole oso'lee qere qere hiyyaan.

30 Dhoqqe giddo godobiki me'aa wodda isiki qari callik gogi

buttina qotiyotike sibiljishsha dadaaraan.

31 Abbaayya ebbee wodi'isha daanfisaan

meshete'n ganfeexxe Zayiteshsha finissaan.

32 Isi sa'eeki ori ifaan

Abbaayyati wodi'inna honbe luggaan.

33 Dada duuchchanaa'ni iso'ni sodaachchisaachchi mitti hedha gopheemmaxxee

buttate'ni isoo geyaaki biniinchi hara hedhebaan.

34 Isi yo'oshsha lumolla dada duuchcha midde tuffataani

isi biniinchi duuchchike moyanjon.