1 Lebeexxi Mageni Iyyoobi'n hiyye haaso'e qici 2 «Koo Iyyoobi! Isi manji duuchchiniinxa dande'anoke Mageniin, anini welti morome'e injifataachcho ate'n labbee?

Ane'e Mageno moronda'eteki atete kaddettexxe'e

amo ani'a hisichcho hissi.»

3 Iyyoobinna Magenoke'n hiyye haso'ee qici

4 «Gotta! Ani mittilchchi'anna woyi fulabo'noke manijjon

ta'a yoona afo'o anka buqedhe sammi hiyyannolocho malee maa hiyyeta ati'aa hiissichcho hiissanno?

5 Ani mitele woldo haaso'eennen

ta'an elqi'a langaxxa hara haaso'abo'non.»

6 Ookkoneechchi uuduma Mageni diidalloti gidd'n Iyyoobi'n haaso'e hiyyee qici;

7 «Kexxettexxi labballoke kaddoottole hidha duudhedhi;

atee qora'ennen; atinna hiissichcho ani'a hiissi.

8 «Ani murte dasseenneshsha assitee uuddee

ifi qulloonisitatto?

9 Eeger Ati hunna giddo anee Mageniinshsha jabake?

Qonqo atixxi Anee Mageniinxe qonqoshsha banqotishsha dindinda'nee?

10 Iittate kaddoole gaachchanna hunna afeettekenna

ulfaattee saadendendeettekentaa!

11 Hollaantiyye uuddee mufatta'n salphisi

mufe atixxeni insa'nee gani.

12 Ee hollaantiyye duuchcha uuda'n saliphis;

fuggaaleeyyatanna hexxe hexxeenba bir.

13 Rensha insa'neeka seemmat mirqite'e,

duuchchiinga mitteba buttni hunda moogi.

14 Ookkoneechchi uduma hunna atixxe'n ifi anjirttattoxxa aninna bado anxe'n atee faarsannon.

15 «Ani atee dadeneshan Roophetanna dadeennen

Roophetinna qotiyotishsha baddaa dheeddaan.

16 Hidha iseke'n hedheeka jabeennanna

biso iseki giddo hexxeexxe ribotixxa hunna uudi!

17 Eege isexxi birbirsiinke haqichchishsha toggi hitteexxen

tafi iseki hiddi furdakenna jabaken.

18 Miqqe isexxi sageetto gissinammake sibljishshateni

sibljinxe zangeshsha jabaxxen.

19 Ani dadeennexxe dada duuchchanaa'ni hunnaameettete

anee malee isee injfataaki hedhebaan.

20 Biniichi bobba'axxe kooba'ni

ittaaxxi baddaa ise'a lattan.

21 Gaaddisa afeeke haqichchi hundanna qooceti giddo

caffa'a hexxeeba diiphphaani.

22 Gaaddisa affeexxi haqqe isee gaaddissaan

qooccetinna isee buqqani.

23 Wodi'i dage woo'moolenna sodaattabaani

Yordaanoosiki galaani afo'in qico'ni geyoole riffi hitabaan.

24 Ille balleesiyyotinna malxaqqoti sano urre'e

Roophe dande'e abidaaki ayyete?