1 «Hedho anee gibisseeni

anee gubba'neexxa yaane

mitte gatisebe'nongi haaso'aanneni

2 Mageno hiyyaana qici,

Atee balleessennelchcho kuli malee

ane'ni murtoxxe'e.

3 Anee konne qico rakissetexxi maa alfitatto?

Fuggaaleeyyetike yaada'ni gammada'n

atixxe anganni daddetteka manjo anee salphissatto?

4 Atixxi ille no'oxxishshatee?

Yookini manji uudaashsha ati uuddatto?

5 Woga atixxi manjiinxishsha harumaxxee

bari atiki manjiinkishsha heenokee?

6 Balleessa anixxa mayyee uudda'ette?

Anika dedha mayee hordofatto?

7 Balleessanjoke kadebe'noxxanna

atixxe anganaa'ni ayyinna anee dande'eexxi gatisabaaxxa atinni egende'etteni.

8 «Anga atixxenni atinni anee dadde'e giissitetteni

ta'ata ettene atixxe anganninni wirri assitee anee balleesitaatte?

9 Faariinke miyishsha anee buttinakenaa'ni giissitettexxa qaabbati

ta'ata, buttinake kadonnaa wirri assite anee bulleessitottaatee?

10 Munde adotishsha ittichchite'e

anixxe ama godobi giddo anee dadde'e

11 Biso anika maalikinna gogiki buqqe'e

miqetinna hidduwwiki mitteba abidissette

12 Lubbo ani'a uttee anee eteetten

heqqa atixxeni anee hedhoti uggiteete.

13 «Adana tennee yaane duchcha godobi giddo sho'exxeetan

tennee assitottanna mudhdhiteettaxxee kaddeexxa, ta'a ege'nenne

14 Balleessa hujaannole mufeti gandottaa

anee dooyyita'etten

15 Cubbo hujoonnole ikkiwoddi rakkote'ni ibba'enne

eloxxa hujoonnolenna ulfinna alfabo'noni,

yaaddoti cuqurto'e

shooko odo'waa'ennen

16 Holanno hiyyinnole

neenqiinsha anee adanda'ni

atixxe lumoxxe hunnanni anee miita'n hexxatton.

17 Ati atixxa dhugaaka kulaara ane'n iyyedagaton;

mufe atixxanna ane'n bira sa'isittaton;

sannachcha atikanna lebbe lebbe ane'n wocci assittaton.

18 «Mageno! Maayee ilemabe'noshsha assagophphette?

Ayyinna anee afebaang reyeennele eloxxemmani!

19 Dademebe'nong gatuunnadu

ama anixxike godobanaa'n fulenneshshanni mogemeennele woyyamma'a.

20 Harumake barobaa hedha'enneki?

Konne harumake baro'ni ballo'o mittengele inqo gammadonna'a ane'e wocci assi

21 Illeema higabo'noke himmi hiyyeekenna

dukana dimma bogibaa me'ebe'no edidarre.

22 Me'aanneki boginna dukkanatike gaaddisikenna seeri hedheba bonnon

ookko hedheeki ifini dukkanatishshateni.»