1 «Ta'a kinni ilenshati ani'a uduma hedheeri ane'n geebeen,

insa'neeki annuwwiir hore anika heeqqaammmake,

worshiinxa duuka me'abaashsha hoyyaanakemmaran.

2 Hunna afebaa manna kadeemmaxxee,

ani'a mitte la'o uwwaakemmabaan.

3 Rakkotenaa'inna solo'okenaa'n kexxeexxa,

gammoojje qiilli giddi'a me'ina'n

hiddichchuwwa qoltina'n corqina'emman.

4 Gammoojjexxe majajjaaxxa haqqeka shafuwwa qoce'naamman,

lujji hiyyabaaka kitikittake hinaake haqichchika hidduwwa qoltina'n indaamman.

5 Moodhalshe raarra'ni shorrinammashsha manni insa'nee olla'akenna'n shorra'emman

6 Marraaba gonphe'e wolo'o giddonna

bowwa'i giddo hexxeexxe baluwwa giddo he'naamman.

7 Gongomi giddo harretishsha haa'insa'emman;

raaquwwa anfeeki giddonna mitteba bukk hina'nee he'na'nemman.

8 Kutik gannaa'na bogakenaa'ni shorremmeemmaxxee

summa afebaakenna woyi fulabaake mannamman.

9 «Ta'a insa'ne anee sirbina'n osolla'ni;

geenbaake manjo kadeennen.

10 Diqante'e anibiri'a shiqa ginbeexxi

tuffante hancufa ane'n cirqanteen

11 Mageni anee hunna hoyyeemmaxxee

bixaalleemake fadhachchisha eeneexxa assineen.

12 Ani edi darre'n fuggoxxa assaaki ke'een

anee abindo'a fonxoro fannen

anee miino'a hanseen.

13 Sa'anno ora kunte;

iitta assino'a insa'nee hoyyaaki* hedhebaak

anee shinno'a ke'ne.

14 Lola'i dare e'yammashsha golla anika enqine e'yine;

duuchchin geechcho daake bira'n ane'n dage.

15 Alaalshite qexerri assitaaxxi yaanee ane'ni daggeen

ulfin anik duuchchi diidallo adhdhite saxxaammalchiisha,

fayyunte anixxinna hurretishsha saxxeen.

16 «Ta'a hedho anixxi yo'oshsha wixxirri hiteen; reyotinna bayya hexxebaan.

17 Hashsha duuchcha micci duuchchi anee ita'n galaan

dhibe anenaa'ni mitte woyyoottebaan.

18 Mageni ela gonphe aneni bira sa'isseen;

lumoxxe ifixe hunnan huute abiddaammaxxe seemmashsha anee hudheen;

odo'wennexxi seemma gunn gunni hite baxxeen.

19 Anee darbe buttinake'n ibiseemmmaxxee

bukotenna bululoke kadeennen.

20 «Ee, Mageno! Atee ye'edheennen

yaane kinni laqqeboxxon;

Uurrenna atee soodatenneni ati kinn ani'aa bucuqqi heteeboxxon.

21 Mararte belo ane'n kexxette

hunna affettexxe duuchchaninna anee gandetten.

22 Diidallot iimaa anee aaxxe ise'ni offo'lishshe, mammarensisse;

hobonbaltetinna elqenna kayya raassaashsha assitette

23 Ati manji duuchchi'a qophpheesemeeke boonchibaa,

reyotibaa? Anee geessissottaate kaddettexxa eg'neennen.

24 «Ani ibeeke minishshaten;

ayyete anee dande'e qammalcha?

Ibe gatebo'nong Mageni anee ijaarabaata?

25 Rakkiyyette oodheennabaa?

Hiyyeeyyetee yaadeennabaa?

26 Eloxxi ani'a kaddaan hiyya'n hedaannan

Elobaaxxi ane'n gelte

ifi ani'a xabaan hiyya'n heqqedhaanaa,

barrandi ane'n dukkande.

27 Godobi anee cuulphiseen, ossa gopheen,

barra barra'inni rakko anee gandeen.

28 Arishshote kadebaang biso anika yaaddo xillisse;

ardiinxe oddo'n ke'ennexxi gargaarisa laqedhaannen.

29 Manjummatenaa'n fulee yayyeti, dayyo,

bargudiinke jaalo kadeennen.

30 Bisi anik xilledhe raachcho'e;

eebbinjjik gubatenne.

31 Gammadinni wodda geebannak gitaarinna suusu'le

anixxi yaaddoti yuusanno wodda geebannoke miya kade.