Iyyoobikaa Maxaafa 16

Iyyoobii’i

1 Iyyoobinna hiyye hiissee haaso’ee qici:

2 «Konnee fakkaataaka haaso’a heddole laqeenneni;

ha’nooxxi jajabeessa rakkote lebbeen.

3 Isi ha’no ca’li hitinee haasottina’n hexxina’naata?

Aninni morondina’n haasottinaashsha asseengechchi maachcho?

4 Ani ha’noote kadee’naa ha’no anete kaddineele,

tuffeti umo ha’no’ni le’misa’nee

Ha’no ta’a hitineexxa duuchcha

aninna ha’no’ni giisse haaso’annan.

5 Iittanni ha’noo jajjabeessateenna

gammachchiisatee heddo elolla haaso’a haaso’annan.

6 «Yaane kinni haaso’onnolenna dhibo anee waalda’neba’a;

sammi hiyye ossonnolenna anenaa’n shollexaba’a.

7 Mageno! Hunna anee hoyyitette;

anka mini hadonna birtette.

8 Anke bisixxi shonqoroora beessisake kaddeen;

huqqinni ankinna cubbichchake kadennexxa kula’neen.

9 Mageni mufate’e biso anka kukkute;

jibbe’e isso ane’ni ga’medhe;

naaphi ankinna ille ane’ni goshe.

10 Manni ane’n bukki hiyye’e afo’o ane’ni cabbedhe;

cee’mina’ni anee kabale.

11 Magen anee fuggaaleeyyetixxenna

xaqartiyyetixxe anga’ni sa’isse uwwe.

12 Nage’inginni hedha’ennan;

yaane kinni Mageni mufate’e anee bulleesse;

gooba anee hudhee butti’a darbe’e;

ane’ni alaame.

13 Gabet lolammaki manni ane’n gumeen

marartebelo kalattuwwa anxa ote kochchise;

ha’lootto anxanna butta dhangalaase;

14 Ege’nemeeke shiyallishsha,

anee wowoxxe kochchise.

15 «Yaadeennaxxee jooniyya seemma odo’wennen;

buttinake’ninna wabbi hiyyenne.

16 Odhishshatenaa’ni kexxeexxa albi anki duuchchi diimmate

gaari illetiki afabo’noshsha anee buqe.

17 Tinni duuchchi kaddee wodda ayye’ninna fuggoxxa assebe’noni;

Mageno ca’itte qalbenni soodata’ennen.

18 «Ane’ni geltexxa bake tennee butta shoxxoxxe!

Dhugaatee raarennexxi raarenna buqende gattaashsha assitoxxe’e!

19 Ani’a dhugaa kulaakinna

ani’a baasse’e haaso’aaki iima hedheeni.✝16:19 Iyo. 19:25.

20 Jaaluwwi anki anee cee’meen;

ani kinni Magenonge’ni oodhannon.

21 Lame manjixxa yaane afe’e araarsammake manjishsha,

silaani manjinxanna Mageniinxa yaane afe’e araarsaaki hedheele.

22 «Bari ankinna muda’ni me’a’neeni me’ine hingabaabaa me’onna’a,

heenoxxe wogga calla gattaani.