1 Iyyoobi higgeenna haaso'ake'n ke'e hiyyee qici: 2 «Dhugaatixxa murte mura gibexxi,

hedho anixxi ane'ni qaraaritaashsha asseeki duuchchiinxa dande'aaki Mageni ege'neexxa,

3 Mageni hafuura ani giddo uge'na'aa

hedhooti hedhenne qico,

4 Haranga fuggok haaso'i afo'o anikenaa'ni fulabaan,

anki arrabi dhara haaso'abaan.

5 Ha'no haasoottineexxa duuchchiinxi dhugaaten hiyye haranga adhdhabo'non;

reyannoxxe barra qico'n dhugaatenaa'n mishikki hiyyabo'non.

6 Dhugaate'n galneshshanni galanno malee walaabo'no

lubboti hedhenne baro duuchcha tenne yaane'n anee godobi qoxxi hiyyaachchi hedhebaan.

7 «Naapha anika cubbaaleeyyetishsha

anee gareeraakanna fuggaaleeyetishsha Mageni insa'ne'n muraan.

8 Mageni lubbo adhdhee baro insa'neeka haruunsaa wodda

Mageno magenoonfatabaak maa kaduu?

9 Rakko insa'ne'n daggaabaro Mageni oodhishsha insa'neexxa laqaa?

10 Duuchchiinxa dande'aake Mageno'n gammanda?

Yanna yanna'i'n isoo ye'ee'na?

11 «Mageni hittee qico hunnameessake kadeexxa ha'noo barachchiisannon;

duuchchiinxa dande'aak Mageninna asso'a hedeexxa ha'noo sho'abo'non.

12 Ha'nooqqa tenee duuchcha egendinneenni hexxinee

maayeeteta tennee woyi fuldabaaxxa yaane haasoottinaachch?»

13 «Duuchchiinxa danide'aak Gootti

fuggichchakanna xaqartichcha manjo xixaaki konneechchinni butti'a hedhee qicinniten.

14 Heddo oose afeexxe kaddoolenna bagedik muddaan

ila isixinna ittaachcho gophphee so'lo'witaan 15 ookkoo'ni gattemmaxxi dhukkubiki muddaan

aruwwa insa'neexxi midde insa'ne'a ooxxabaan.

16 Fuggaaleeyye lakkoonne dhaaqanbabaaka bireetika sibiliijo tuu'ltan

tennete hinabaxxa oddonona afaan.

17 Yaane kinni fuggichchi afeexxa seemma qullyyete oddo'witan

tuuleemmaaka biretika sibiljo Mageniink manni adhdhaan.

18 Ijaadhdhineeki mininna magenijoletikenna

midha heqqe'nammaxxe xeleephphotike fooqishsha diigemaan.

19 Fuggaaleessi manji duroomeemmaxxe shene hiyyee diiphaan;

dammaqa wodda kinni karra isixxi duuchcha ibbeeba gophaan.

20 Lola'i dedhange'n dagee'naa alaanaammashsha dedhange'n alaayye qexerri hiyyaan.

Hashshati hobonbaltetinna isoo ibisseeba gonphaan.

21 Boroti darrexxi diidallo mine isikenaa'ni isoo dukke adhdhite me'itaan.

22 Baqate fulo'a hiyyoolenna

diidallo hunnati isi dare'n gandaan.

23 Diidallotinna iso'n caldeen

hexxeemaba hexee iso'n fiissiteen.»