1 ሳሎት ፆሳ ቦንቹዋ ሃሳዮሶና፤

ሳሎ ጉፋንይ እያ ኩሸ ኦሱዋ አዋጄስ።

2 እስ ጋላስ ሀራ ጋላሳስ ሄሳ ኦዴስ፤

እስ ቃም ሀራ ቃማስ ኤራተ ቆንጭሴስ።

3 ኦድ ዎይኮ ቃል ባዋ፤

ኤንታ ግርሳይ ስኤተና።

4 ግዶሽን ኤንታ ኦዳይ ሳአ ኡባን ላለትስ፤

ኤንታ ቃላይ ቢታ ጋፃ ጋክስ።

አው ደእያ በሲ ፆሳይ ሳሎን ጊግስስ።

5 ባ ሶፐ ከይያ ምሽራዳ፥

ጋደ ዎፃናዉ ኡፋይትድ ጊግዳ አሳዳ፥

አዋይ ዎንታ ዎንታ ከዬስ።

6 እስ ባጋ ሳሎ ጋፃፐ ከይድ፥

ሀራ ባጋ ሳሎ ጋፃ ጋካናዉ ቤስ፤

እያ ሱላፐ ጌምያባይ ባዋ።

7 ጎዳ ህገይ ሱረ፤

ሸምፖ ዛሬስ።

ጎዳ ኪታይ አማነትዳይሳ፤

አኬክ ፓጭዳይሳታ ጭንጫ ኦስ።

8 ጎዳ ዎጋይ ልከ፤

ዎዛና ኡፋይሴስ።

ጎዳ ኪታይ ጌሽ፤

አይፈ ፖእሴስ።

9 ጎዳስ ያሽ ጌሽ፤

መርናዉ ኤቅድ ደኤስ።

ጎዳ ፕርዳይ ኩመ ቱማነ ፅሎ።

10 ዎርቃፈ አድ ኮየቴስ፤

ዋላህ ባይና ዎርቃፈ አድ ሎኦ።

ኤሳፈ አድ ሎኦ

እልሎ ኤሳፈ አድ ማልኦ።

11 ነ አይለይ ናገታና መላ ዞሬስ፤

ነ ህግያ ናጎይ ዳሮ ጎኤስ።

12 ባ ቆሁዋ ደመይ ኦኔ?

አቤት ጎዳዉ፥ ጌምዳ ናጋራፐ ታና ጌሻ።

13 ታና ነ አይልያ፥

ኤርሸ ኦያ ናጋራፐ ናጋ።

ናጋር ታና ሃሮና መላ ማዳ፤

ሄ ዎደ ታኒ ሱረ ግዳና፥

ግታ ባላፐ ጌያና።

14 አቤት ጎዳዉ፥ ታ ዛላዉ፥ ታና ዎዘይሶ፤

ታ ዶናፐ ከይያ ቃላይነ

ታ ዎዛና ቆፋይ ነና ኡፋይስያባ ግዶ።