1 ኢታ ኦይሳታ ጋሶን ይሎቶፓ፤

ናጋራ ኦይሳታ ቃናቶፓ።

2 ኤንቲ ማታዳ ኤሶን መላና፤

ቦንጮዳ ሹልድ ቆቆፈታና።

3 ጎዳን አማነታ፤ ሎኦባ ኦ፤

ቢታ ቦላ ኡታ፤ ፓላህን ደአ።

4 ጎዳን ኡፋይታ፤

እ ነ ዎዛና አሙዋ እማና።

5 ነ ኦግያ ሀዳራ ጎዳስ እማ፤

እያን አማነታ፤ እ ነዉ ኦና።

6 እ ነ ፅሎተ ዎንታ ፃልቀዳ፥

ነ ፕርዳ ሴታ ጋላሳ አዋዳ ፖእሳና።

7 ጎዳ ስንን ስእ ጋዳ ደአ፤

ዳንዳአን ናጋ፤

ኢታ አሳታ ሀልቾይ ፖለትን በአዳ ይሎቶፓ።

8 ሀንቆ አጋ፤ ይሎ ተቃ፤

ሄስ መቶን የጌስ።

9 ኢታ ኦይሳት ቆለትድ ያና፤

ሽን ጎዳን ኡፋይስ ዎይሳት ቢታ ላታና።

10 ኢታ ኦይሳት ጉ ዎደፐ ጉየ ደኦኮና፤

ነ ኤንታ ኮያዳ ደማካ።

11 ሽን አዳት ቢታ ላታና፤

ሳሮተን ኡፋይትድ ዳና።

12 ኢታ አስ ሎኦ አስ ይሳናዉ ማቀቴስ፤

ባ አቻ ኤንታ ቦላ ጋርጬስ።

13 ሽን ጎዳይ ኢታታ ቦላ ሚጬስ፤

ኤንታዉ ዮ ጋላስ የይሳ ኤሬስ።

14 ኢታ አሳት ማንቆታነ መቶታንቾታ ዎናዉ፥

ሱረ ሄመተይሳታ ሹካናዉ፥

ባንታ ማሻ ሾዶሶና፤

ባንታ ዶንግያ ዋፆሶና።

15 ሽን ኤንታ ማሻይ ኤንታ ዎዛናን ገላና፤

ኤንታ ዶንገይ መቃና።

16 ፅሎ አሳስ ደእያ ጉባይ፥

ኢታ አሳስ ደእያ ዳሮባፐ ሎኦ።

17 አይስ ጊኮ፥ ኢታታ ዎልቃይ መቃና፤

ሽን ጎዳይ ፅሎታ ዘምፕሴስ።

18 ሱረ አሳታ ኦግያ ጎዳይ ኤሬስ፤

ኤንታ ላታይ መርናዉ ኤንታባ ግዳና።

19 ኢታ ዎደ ሱረ አሳት ዬላቶኮና፤

ኮሻ ዎደ ኤንቲ ካልድ ማና።

20 ሽን ኢታ አሳት ሀይቃና፤

ጎዳ ሞርከት ጪሻዳ ቆቆፈታና፤

ጩያዳ አይፈፐ ጌማና።

21 ኢታ አስ ታልእድ ዛረና፤

ሽን ፅሎ አስ ኬሀተን እሜስ።

22 ጎዳን አንጀትዳይሳት ቢታ ላታና፤

ሽን እ ባድዳይሳት ያና።

23 አሳ ኦገይ ጎዳ ኡፋይስኮ፥

ጎዳይ እያ ታንጉዋ ካለስ፤ ምንስ።

24 እ በትኮካ ኩንደና፤

ጎዳይ እያ ኩሽያ ኦይክድ ካትሴስ።

25 ታኒ ፓማስ፤ ሀእ ጭማስ፤

ሽን ፅሎ አስ የገትን፥

እያ ናይት ካ ዎስሽን በአብከ።

26 እ ኡባ ዎደ ኬሀተን እሜስ፤

ጮ ታልኤስ፤

እያ ናይት ሀራታስ አንጆ ግዳና።

27 ኢታፐ ሃካ፤ ሎኦ ኦ፤

ነ አዱሳ ላይ ዳና።

28 ጎዳይ ፅሎ ፕርዳ ዶሴስ፤

አማነተይሳታ እ የገና።

ኤንቲ መርናዉ ናገቶሶና፤

ሽን ኢታታ ኮቻይ ያና።

29 ፅሎት ቢታ ላታና፤

ያን መርናዉ ዳና።

30 ፅሎ አሳ ዶናፐ ጭንጫተ ከዬስ፤

እያ እንፃርሳይ ፅሎ ኦደቴስ።

31 ፆሳ ህገይ እያ ዎዛናን ደኤስ፤

እያ ቶሆይ በተና።

32 ኢታ አስ ፅሎ አስ ጌዴስ፤

እያ ዎናዉ ኮዬስ።

33 ሽን ጎዳይ እያ ኩሸን አድ እመና፤

ፕርደታናዉ ኤቅያ ዎደ እያ ቦላ ፕርድሰና።

34 ጎዳን ኡፋይስ ኦ፥ እያ ኪታ ናጋ፤

ነና ቢታ ላትስድ ግታያና፤

ኢታ አሳት ይሽን ነ በአና።

35 ናጋራንቾይ ልባኖሰ ዝጋዳ፥

ድጭድ ቁ ቁ ግን ታ በአስ።

36 ሽን ታ ስማዳ ያን ደማብከ፤

ኮይንካ በንትቤና።

37 ቦረይ ባይና አስ በአ፤

ሱረ አስ አኬካ፤

ሳሮ አሳስ ዉርሰይ ሎኦ ግዳና።

38 ሽን ናጋራንቾት ያና፤

ኤንታ ዉርሰይ ኦማና።

39 ፅሎታ አቶተይ ጎዳፐ ዬስ፤

እ መቶ ዎደ ኤንቲ ናገትድ አትያ በሰ።

40 ጎዳይ ፅሎታ ማዴስ፤ አሼስ፤

ኤንቲ እያኮ ባቃትዳ ግሾ፥

እ ኤንታ ኢታታፐ አሼስ፤ ናጌስ።