Mateus 18

Mufananidzo woMuranda Asingaregerere

21 Zvino Pita adouya kwaari achiti, "Ishe, hama yangu inganditadzire kangani ndichimbondoiregerera? Kanomwe chere?"

22 Jesu adoti kwaari, "Handiti kwauri kanomwe, asi makumi manomwe yadopetewa kanomwe. 23 "Saka umambo hwokudenga hungaenzanisiwe namambo waida kunhadzirisa zvikwerete novaranda vache. 24 Paadothanga kuverenga, umwe wanga ano chikwerete chozviuru gumi zvomasaga yondarama, adouyisiwa kwaari. 25 Nondava yokutadzirira kuripa, ishe wache adoraira kuti iye atengesewe, pabodzi nomukadzi wache novana nozvese zvaanga anazvo, kuti chikwerete chiripiwe. 26 Muranda adogodama nomabvi pamberi pache ndokuti, ‘Ishe ndiitirei mwoyo murefu, ndichakuripai zvese.’ 27 Tenzi womuranda adoita tsitsi, ndokumuregerera kuti aende zvache.

28 Asi muranda mubodzi bodziyo, paadobirika pakarepo, adouya kunoumwe muranda biyache wanga ano chikwerete kwaari chomakobiri zana yanonzi dhinari adomubata pahuro achiti, ‘Ripa chikwerete chako.’ 29 Muranda biyache adogodama nomabvi achimukumbira achiti, ‘Ndiitire mwoyo murefu, ndichakuripa.’ 30 Asi iye adoramba ndokuenda komuisa mutorongo kusvikira waripa chikwerete. 31 Zvino varanda biyache pavadoona zvanga zvaitiwa, vadoshungurudziwa nazvo chaizvo, ndokuenda konyepa tenzi wavo zvese zvanga zvaitika. 32 Ipopo tenzi adodaidza muranda ndokuti kwaari, ‘Iwe muranda adoipa! Ndidokuregerera chikwerete chiye chese ndava wanga wandikumbira, 33 ko wanga usingafaniriwo kuitira tsitsi muranda biyako kunge zvandidokuitira iwepa?’ 34 Noukari tenzi wache adomuendesa kuno vokutorongo, kuti atambudziwe kusvikira aripa chikwerete chache chese.

35 Zvakarezvo ndizvo zvichaitiwa naBaba vangu vokudenga kwamuri umwe noumwe, kana musingaregerere hama yenyu zvichibva pamwoyo."