1 Cu kideu pelane ga helet ket teu nah hekwa de nzwa. 2 Penui naimiak kepetle mbeuh mie ge, penui Shinar deu ga langkie ge ngaulu nah penui cika lunghdi. 3 Penui ket ket dade rangdi, "Gwanglu, anui tangdei keniak lwe ru tak lugo." Penui tangtsu nding tangdei le rutak kelu kang keu nah mortar nding kehania keu. 4 Penui cu, "Gwang lu! Anui anui ziemne namdi ge nah tsukwa petün ting tung cang kecu ge tei cu go, nah anui katei anui zi teigo. Anui ciciulu mecai, anuide kideu reu pelane ga tei zangradi zielu." 5 Cine RAMPAUBE namdi de nah tsukwa de Adam leuhme ne ketei de pie zie lie hung. 6 RAMPAUBE rangdi, "Pielo! Penui au mina leuh ge helet de nzwa nah penui tei kera cu au pebang dwa cuh au da! Tie mene penui tei keneube magede teigai kelak gah di zieda. 7 Gwang lu, anui hung delwe cika penui let tei kebwakdi go, iciu eh penuide peu kekwaci tadi lu kerane." 8 Cine RAMPAUBE penui de kideu reu pelane gage teizangdi, nah penui namdi de kwa si ta di. 9 Ciziemne, cide de pezi Babel lie qulu, kedanemene RAMPAUBE cikade kideu pelane let kebwak kedine nah cikade RAMPAUBE penui de kideu pelane peu reu gage teizang gai kedine.

10 Aidung de Shem leuhmedung. Duinai cai mmi kena dau, Shem mmi hai di ge, pe na Arphaxad lunghlu. 11 Arphaxad lungh kelu cai, Shem mmi hai mengei ge lunghlu. Nah pe na keda mipeinadung nah mipuinadung de lunghlu.

12 Arphaxad mmi camrei mengei lunghlu ge, pa pe na Shelah lunghlu. 13 Arphaxad pa pe na Shelah lungh kelu cai ne mmi 403 lunghlu. Pa keda pe napuidung nah pe napeidung de lunghlu.

14 Shelah mmi camrei lungh lu ge, pa pe na Eber lunghlu. 15 Shelah pa pe na Eber lungh kelu cai ne, mmi 403 lunghlu. Pa keda pe napuidung nah pe napeidung de lunghlu.

16 Eber mmi camrei-mdai lunghlu ge, pa pe na Peleg lunghlu. 17 Eber pa pe na Peleg lungh kelu cai ne mmi 430 lunghlu. Pa keda pe napuidung nah pe napeidung de lunghlu.

18 Peleg mmi camrei ge lungh luge, pa pe na Reu lunghlu. 19 Peleg pa pe na Reu lungh kelu cai ne mmi 209 lunghlu. Pa keda pe napuidung nah pe napeidung de lunghlu.

20 Reu mmi camrei-kena lunghlu ge, pa pe na Serug lungh lu. 21 Reu pa pe na Serug lungh kelu cai ne mmi 207 lunghlu. Pa keda pe napuidung nah pe napeidung de lunghlu.

22 Serug mmi camrei lungh luge, pa pe na Nahor lunghlu. 23 Serug pa pe na Nahor lungh kelu cai ne mmi haina ge lunghlu. Pa keda pe napuidung nah pe napeidung de lunghlu.

24 Nahor mmi ngkaiehekui lunghlu ge, pa pe na Terah lunghlu. 25 Terah pa pe na Nahor lungh kelu cai ne mmi 119 lunghlu. Pa keda pe napuidung nah pe napeidung de lunghlu.

26 Terah mmi riakhena lungh kelu cai ne, pa pe na Abram, Nahor nah Haran lunghlu.

27 Cu aidung de Terah leuhme: Terah pe na Abram, Nahor nah Haran lungh lu nah Haran pe na Lot lungh lu. 28 Haran pe pei Terah ringkebam dau, pecu kemna nam, Chaldeame deu* Ur gade tsaidi. 29 Abram nah Nahor penai nau teilu. Abram nau zi cai Sarai nah Nahor nau zi cai Milkah, pa Haran napui, pa au Milkah penai Iskah peibe da. 30 Sarai au nagah pui ge; pa pe na gah.

31 Terah pe na Abram, pe capei Lot, Haran napei nah Abram nau Sarai penui de ngngwa lwe penui de nzang Canaan deudi ga mie kerane Chaldeame deu Ur de gidi. Dede penui Haran nam ga gwanglu nah cika lungh di. 32 Terah mmi 205 lunghlu ge pa Haran nam gade tsaidi.